- 1
- Na, ka whakamine mai a Hohua i nga iwi katoa o Iharaira ki Hekeme, a, ka karanga atu ki nga kaumatua o Iharaira, ki o ratou ariki hoki, me o ratou kai whakariterite, me o ratou rangatira; a tu ana ratou i te aroaro o te Atua.
- 2
- Na, ka mea a Hohua ki te iwi katoa, Ko te korero tenei a Ihowa a te Atua o Iharaira, I noho o koutou matua i mua i tera taha o te awa, a Teraha te matua o Aperahama, te matua hoki o Nahora: i mahi ano hoki ratou ki nga atua ke.
- 3
- Na, tangohia ana e ahau to koutou matua a Aperahama i tera taha o te awa, a aratakina ana, a, puta noa i te whenua katoa o Kanaana, a whakanuia ana tona uri e ahau; i hoatu hoki a Ihaka ki a ia.
- 4
- A, hoatu ana e ahau a Hakopa raua ko Ehau ki a Ihaka: a, hoatu ana e ahau a Maunga Heira ki a Ehau, hei kāinga; ko Hakopa ia, ratou ko ana tamariki, i heke atu ki Ihipa.
- 5
- A, i tono ano ahau i a Mohi, raua ko Arona, a patua iho e ahau a Ihipa, peratia ana me taku i mea ai i waenganui i a ratou: a, muri iho whakaputaina mai ana koutou e ahau.
- 6
- A, whakaputaina mai ana e ahau o koutou matua i Ihipa: a, ka tae koutou ki te moana; na, ka whai mai nga Ihipiana i muri i o koutou matua ki te Moana whero, me nga hariata, me nga hoia eke hoiho.
- 7
- A, ta ratou karangatanga ki a Ihowa, na, tukua iho ana e ia he pouritanga ki te takiwa o koutou o nga Ihipiana; i kawea mai ano hoki e ia te moana ki runga ki a ratou; a taupokina ana ratou: kua kite ano hoki o koutou kanohi i nga mea i mea ai ahau ki Ihipa: a, he maha nga ra i noho ai koutou i te koraha.
- 8
- Na, kawea mai ana koutou e ahau ki te whenua o nga Amori, i noho nei i tera taha o Horano; a whawhai mai ana ratou ki a koutou: a tukua ana ratou e ahau ki o koutou ringaringa, na, riro mai ana to ratou oneone i a koutou; a hunā iho ratou e ahau i to koutou aroaro.
- 9
- Na, te whakatikanga mai o Paraka tama a Tipora kingi o Moana, kei te whawhai ki a Iharaira; a tikina atu ana e ia, karangatia ana a Paraama tama a Peoro, hei kanga mo koutou:
- 10
- Otiia kihai ahau i pai kia whakarongo atu ki a Paraama; na, te tino manaakitanga i manaaki ai ia i a koutou: a, whakaorangia ake koutou e ahau i tona ringa.
- 11
- Na, ka whiti mai koutou i Horano, a ka tae mai ki Heriko: a whawhai mai ana nga tangata o Heriko ki a koutou, nga Amori, nga Perihi, nga Kanaani, nga Hiti, nga Kirekahi, nga Hiwi me nga Iepuhi; a, tukua atu ana ratou e au ki to koutou ringa.
- 12
- A, tonoa atu ana e ahau te honete ki mua i a koutou, a nana ratou i pei atu i to koutou aroaro, nga kingi tokorua hoki o nga Amori; ehara i te mea na to hoari, na to kopere ranei.
- 13
- A, hoatu ana e ahau ki a koutou he whenua kihai nei i mahia e koutou, he pa hoki kihai i hangā e koutou, a noho ana koutou i reira; ehara i te mea whakato na koutou nga mara waina, mara oriwa, e kainga nei e koutou.
- 14
- Na, kia wehi ra koutou i a Ihowa, mahi atu hoki ki a ia i runga i te tika, i runga i te pono: whakarerea atu hoki nga atua i mahi na o koutou matua ki a ratou i tera taha o te awa, i Ihipa hoki; a, mahi atu ki a Ihowa.
- 15
- A, ki te mea e kino ana ki ta koutou whakaaro te mahi ki a Ihowa, ma koutou e whiriwhiri aianei me mahi koutou ki a wai; ki nga atua ranei i mahi ra o koutou matua ki a ratou i tera taha o te awa, ki nga atua ranei o nga Amori, e noho nei koutou ki to ratou oneone: ko au ia me toku whare, ka mahi matou ki a Ihowa.
- 16
- Na ko te whakahokinga mai a te iwi, te meatanga mai, Aue, kia whakarere matou i a Ihowa, kia mahi atu ki nga atua ke!
- 17
- Ko Ihowa nei hoki ko to tatou Atua, ko ia te kai whakaputa mai i a tatou, me o tatou matua, i te whenua o Ihipa, i te whare pononga, nana hoki enei tohu nui i mahi ki to tatou aroaro, nana hoki tatou i tiaki i te huarahi katoa i haere ra tatou, i roto hoki i nga iwi katoa, i haere mai ra tatou ra waenganui i a ratou:
- 18
- Na Ihowa hoki i pei atu i to tatou aroaro nga iwi katoa, ara, nga Amori, i noho i tenei whenua: ina, ka mahi ano matou ki a Ihowa; ta te mea ko ia to tatou Atua.
- 19
- Katahi ka mea atu a Hohua ki te iwi, E kore e ahei i a koutou te mahi ki a Ihowa: he Atua tapu hoki ia; he Atua hae ia; e kore e tukua noatia e ia a koutou mahi tutu, a koutou hara,
- 20
- Ki te whakarere koutou i a Ihowa, a ka mahi ki nga atua ke, na, ka tahuri mai ia ka whakawhiu i a koutou, ka huna hoki i a koutou, i muri iho ano i tana pai ki a koutou.
- 21
- Na ko te meatanga mai a te iwi ki a Hohua, Kahore; engari ka mahi matou ki a Ihowa.
- 22
- Na, ka mea a Hohua ki te iwi, Hei kai whakaatu koutou ki a koutou ano mo ta koutou whiriwhiringa i a Ihowa, kia mahi ki a ia. A, ka mea mai ratou, Ae, hei kai whakaatu.
- 23
- Na whakarerea atu nga atua ke, ena i waenganui i a koutou, whakatahuritia mai hoki o koutou ngakau ki a Ihowa ki te Atua o Iharaira.
- 24
- Katahi ka mea mai te iwi ki a Hohua, Ka mahi matou ki a Ihowa ki to tatou Atua, ko tona reo hoki ta matou e rongo ai.
- 25
- A, whakaritea iho e Hohua he kawenata ki te iwi i taua rangi ano, hoatu ana e ia ki a ratou tetahi tikanga me tetahi ritenga i Hekeme.
- 26
- A, tuhituhia iho e Hohua enei kupu ki te pukapuka o te ture a te Atua, na, ka tango ia i tetahi kohatu nui, a whakaarahia ake i reira i raro iho i tetahi oki, i te taha o te whare tapu o Ihowa.
- 27
- A ka mea a Hohua ki te iwi katoa, Nana, ko tenei kohatu hei kai whakaatu ki a tatou; kua rongo hoki tenei mea i nga kupu katoa a Ihowa i korerotia mai e ia ki a tatou: na, hei kai whakaatu tenei mea ki a koutou, kei whakakahore koutou ki to koutou Atua.
- 28
- Na, tukua ana e Hohua te iwi kia haere, a ia tangata a ia tangata, ki tona kāinga ano.
- 29
- A, muri iho i enei mea, na, ka mate a Hohua te tama a Nunu, te pononga a Ihowa, kotahi rau kotahi tekau nga tau i ora ai ia.
- 30
- A, tanumia iho ia e ratou ki te rohe o tona kāinga, ki Timenata-hera, ki Maunga Eperaima, ki te taha ki te nota o Maunga Kaaha.
- 31
- A, i mahi ano a Iharaira ki a Ihowa i nga ra katoa o Hohua, i nga ra katoa ano hoki o nga kaumatua i hipa ake o ratou ra i o Hohua, i mohio hoki ki nga mahi katoa a Ihowa, i mahi ai ia, he whakaaro nana ki a Iharaira.
- 32
- A, ko nga wheua o Hohepa, i maua mai e nga tamariki a Iharaira i Ihipa, i tanumia e ratou ki Hekeme, ki te wahi o te mara i hokona e Hakopa i nga tama a Hamora matua o Hekeme, ki nga moni kotahi te rau: na, riro mai ana taua wahi i nga tamariki a Hohepa hei kāinga tupu.
- 33
- Na, ka mate a Ereatara tama a Arona; a, tanumia ana e ratou ki tetahi pukepuke i riro mai i a Pinehaha i tana tamaiti, i homai nei ki a ia i Maunga Eperaima.
Address: 
Phone: 
Email: