- 1
- A, te rongonga ki aua mea o nga kingi katoa o tenei taha o Horano, o nga maunga, o nga raorao, o te tahatika katoa hoki o te moana nui i te ritenga atu o Repanona, o te Hiti, o te Amori, o te Kanaani, o te Perihi, o te Hiwi, o te Iepuhi;
- 2
- Na, huihui tahi ana ratou ki te whawhai ki a Hohua ratou ko Iharaira, kotahi tonu te whakaaro.
- 3
- A, te rongonga o nga tangata o Kipeono ki nga mea i meatia e Hohua ki Heriko raua ko Hai,
- 4
- Na, ka mahi tinihanga ratou, ka haere mai, ka mea, he karere mai ratou; ka tango hoki i nga putea tawhito ki runga ki o ratou kaihe, me nga koki waina kua tawhitotia, kua pakarukaru, putiki rawa;
- 5
- Me nga hu tawhito ki o ratou waewae, papaki rawa, ko o ratou kakahu hoki he mea tawhito; ko nga taro katoa hoki, ko o ratou o, he mea maroke, he mea puruhekaheka.
- 6
- Na, haere mai ana ratou ki a Hohua ki te puni ki Kirikara, a mea mai ana ki a ia, ki nga tangata hoki o Iharaira, I haere mai matou i te whenua mamao; na, whakaritea tetahi kawenata ki a matou.
- 7
- Na, ko te ohonga mai o nga tangata o Iharaira ki nga Hiwi, E noho nei ano pea koe i waenganui i a au; a me pehea e whakarite ai ahau i te kawenata ki a koe?
- 8
- Na, ka mea mai ratou ki a Hohua, He pononga matou nau, a ka mea a Hohua ki a ratou, Ko wai ma koutou? i haere mai hoki koutou i hea?
- 9
- Na, ko ta ratou meatanga mai ki a ia, I haere mai o pononga i tetahi whenua i tawhiti noa atu; na te ingoa hoki o Ihowa o tou Atua: i rongo hoki matou ki tona rongo, ki nga mea katoa hoki i mea ai ia ki Ihipa.
- 10
- Ki nga mea katoa ano hoki i mea ai ia ki nga kingi tokorua a nga Amori i tera taha o Horano, ki a Hihona kingi o Hehepona, raua ko Oka kingi o Pahana, i noho ra i Ahataroto.
- 11
- No reira i ki mai ai o matou kaumatua me nga tangata katoa o to matou whenua ki a matou, i mea ai, Maua atu i o koutou ringaringa he o ki te huarahi, a haere ki te whakatau i a ratou, ka mea atu hoki ki a ratou, Ko o koutou pononga matou; na, whakaritea mai tetahi kawenata ki a matou.
- 12
- Ko a matou nei taro i maua mahanatia mai nei i o matou whare hei o mo matou, i te ra i turia mai ai e matou, i haere mai ai ki a koutou; nana, kua maroke, kua puruhekahekatia.
- 13
- Ko enei koki waina hoki, i hou nei i ta matou whakakiinga, na, kua pakarukaru: ko enei kakahu hoki o matou, me o matou hu, kua tawhitotia i te roa whakaharahara o te huarahi.
- 14
- Na, ka tango nga tangata i etahi o o ratou o, ko ta Ihowa whakaaro hoki kihai i uia atu e ratou.
- 15
- A houhia iho e Hohua te rongo ki a ratou, whakaritea ana hoki e ia tetahi kawenata whakaora mo ratou; a i oati ano nga rangatira o te huihuinga ki a ratou.
- 16
- Nawaia, te mutunga o nga ra e toru, muri iho i ta ratou whakaritenga i te kawenata ki a ratou, na, ka rongo ratou, e tata ana ano ratou ki a ratou, e noho ana hoki i waenganui i a ratou.
- 17
- Na, ka hapainga atu e nga tamariki a Iharaira, ka tae atu i te ra tuatoru ki o ratou pa. Ko o ratou pa hoki ko Kipeono, ko Kepira, ko Peeroto, ko Kiriata-tearimi.
- 18
- A kihai nga tamariki a Iharaira i patu i a ratou, no te mea kua oati atu nga rangatira o te huihuinga i a Ihowa i te Atua o Iharaira ki a ratou. A, amuamu katoa ana te huihuinga ki nga rangatira.
- 19
- Na, ka mea mai nga rangatira katoa ki te huihuinga katoa, Kua oati atu tatou i a Ihowa i te Atua o Iharaira ki a ratou; a e kore tenei e taea e tatou te pa atu ki a ratou.
- 20
- Ko tenei ta tatou e mea ai ki a ratou; me whakaora ratou; kei riria tatou mo te oati i oati ai tatou ki a ratou.
- 21
- A i mea ano nga rangatira ki a ratou, me whakaora ratou; otiia me waiho ratou hei tapatapahi rakau, hei utuutu wai mo te huihuinga katoa; kia rite ai ki ta nga rangatira i korero ai ki a ratou.
- 22
- Katahi ka karanga atu a Hohua ki a ratou, a ka korero ki a ratou, ka mea, Na te aha koutou i nuka ai i a matou, i mea ai, Kei tawhiti noa atu matou i a koutou; a e noho nei ano koutou i waenganui i a matou?
- 23
- Na, mo reira ka kangā koutou; e kore e whakakorea he mahi ma tetahi o koutou, te tapatapahi rakau, te utuutu wai hoki mo te whare o toku Atua.
- 24
- Na, ka whakahokia mai e ratou ki a Hohua, a ka mea, Kua tino korerotia ki o pononga nga mea i whakaritea e Ihowa e tou Atua ki a Mohi ki tana pononga mo te whenua katoa, kia hoatu ki a koutou, mo nga tangata katoa hoki o te whenua, kia hunā atu i o koutou aroaro; no reira matou i tino wehi ai i a koutou, kei mate matou, na, meatia ana e matou tenei mea.
- 25
- Na, kei roto tenei matou i o ringa: mau e mea mai te mea e pai ana, e tika ana ki tau titiro kia meatia ki a matou.
- 26
- Na, peratia ana ratou e ia, a whakaorangia ake ratou i te ringa o nga tamariki a Iharaira, a kihai ratou i patu i a ratou.
- 27
- A, waiho iho ratou e Hohua i taua ra hei tapatapahi rakau, hei utuutu wai mo te huihuinga, mo te aata hoki o Ihowa, ki te wahi e whiriwhiri ai ia, a, tae noa mai ki tenei ra.
Address: 
Phone: 
Email: