- 1
- Na hura, na te pononga a Ihu Karaiti, na te teina o Hemi, ki te hunga kua oti te whakatapu e te Atua Matua, he mea tiaki i roto i a Ihu Karaiti, he hunga karanga:
- 2
- Kia whakanuia ki a koutou te mahi tohu, te rangimarie, me te aroha.
- 3
- E nga hoa aroha, tākare tonu ahau ki te tuhituhi atu ki a koutou mo nga mea o to tatou oranga tahi, i mea hoki me tuhituhi atu ki a koutou, me whakahauhau kia kaha ta koutou tohe ki te whakapono kua oti nei te tuku mai ki te hunga tapu.
- 4
- Kua tomo puku mai hoki etahi tāngata, i tuhituhia i mea mo tenei whakataunga-hē, he hunga karakia kore, whakaputaina ketia ake e ratou te aroha noa o to tatou Atua hei mea mo nga hiahia taikaha, a whakakahore ana ratou ki te Atua ko ia anake nei te rangatira, ki to tatou Ariki hoki ki a Ihu Karaiti.
- 5
- Na, e mea ana ahau kia whakamaharatia koutou, kua mātau noa ake ano hoki koutou ki tenei, i whakaorangia mai e te Ariki te iwi i te whenua o Ihipa, muri iho whakangaromia ana e ia te hunga kihai nei i whakapono.
- 6
- Na, nga anahera kihai nei i mau ta ratou o te timatanga, heoi whakarerea ake e ratou to ratou nohoanga ake, kua waiho e ia i raro i te pouri, mau tonu te here ki nga mekameka, mo te whakawakanga o te ra nui.
- 7
- Ka rite ki Horoma raua ko Komora, me nga pa i tata ki a raua, i pera nei me enei, te puremu, te whai i nga kikokiko ke; kua waiho ratou hei tohu, pangia ana ratou e te whiu, ara e te ahi e ka tonu ana.
- 8
- Ko ta tenei hunga moemoea ano hoki tena, e whakapoke ana i te kikokiko, e whakahawea ana ki te kawanatanga, e korero kino ana ki nga rangatira.
- 9
- Na, Mikaera te tino anahera, i ta raua ngangautanga ko te rewera, i a ia e tohe ana ki te tinana o Mohi, kihai i tae tona aro ki te whakapuaki mai i te kupu kino mona, i a ia e whakawa ana, i mea kau ia, Ma te Ariki koe e riri.
- 10
- Ko enei ia, e korerotia kinotia ana e ratou nga mea kahore nei ratou i mātau: na, nga mea e matauria noatia ake nei e ratou tahi ko nga kararehe whakaaro kore, hē iho ratou i aua mea.
- 11
- Aue te mate mo ratou! kua haere nei hoki ratou i te ara o Kaina, kua torere rawa hoki ki te hē, ara, ki to Paraama utu, na, ko to Kora totohenga hei whakangaromanga mo ratou.
- 12
- He toka moana ratou i roto i a koutou hakari aroha, i a ratou e hakari tahi ana me koutou, e whangai ana i a ratou ano, kahore hoki e mataku: he kapua wai kore e akina ana e nga hau; he rakau kua pirau nei nga rau, he mea hua kore, ka rua nei nga matenga, he mea kua unuhia ake i nga pakiaka;
- 13
- He ngaru pua no te moana, ko to ratou whakama nei i te huka; he whetu atiutiu noa, pouri kerekere te wahi kua rite mo ratou, mo ake tonu atu.
- 14
- I poropititia ano hoki enei e Enoka e te tokowhitu i muri i a Arama, i a ia i mea, Na, kei te haere mai te Ariki me nga mano tini o tona hunga tapu,
- 15
- Kia whakaritea he whakawa mo nga tāngata katoa, a kia riria te hunga karakia kore katoa o ratou mo a ratou mahi karakia kore katoa, i hē ai ratou ki te karakia, mo nga kupu pakeke katoa i korerotia e te hunga hara, e te hunga karakia kore mona.
- 16
- He hunga amuamu ratou, he kowhetewhete, e haere ana i runga i o ratou hiahia ake, tetere rawa ano hoki nga kupu e korero nei o ratou mangai, he hunga miharo kanohi ratou, he mea kia riro mai ai he mea ma ratou.
- 17
- E nga hoa aroha, kia mahara koutou ki nga kupu i korerotia i mua e nga apotoro a to tatou Ariki a Ihu Karaiti;
- 18
- I mea hoki ratou ki a koutou, tera e puta mai te hunga whakamanumanu i te wa whakamutunga, e haere ana i runga i o ratou hiahia karakia kore.
- 19
- He hunga tenei e momotu ke ana i a ratou, he hunga ngakau maori, kahore nei i a ratou te Wairua.
- 20
- Ko koutou ia, e nga hoa aroha, hangā ake koutou hei whare ki runga ki to koutou whakapono tapu rawa, me te inoi ano i roto i te Wairua Tapu,
- 21
- Me te tiaki ano i a koutou i runga i te aroha a te Atua, me te tatari atu ano ki te mahi tohu a to tatou Ariki a Ihu Karaiti, e taea ai te oranga tonutanga.
- 22
- Ko etahi ano tohungia, he mea kowae marie.
- 23
- Ko etahi me whakaora i runga i te mataku, me to mai i roto i te kapura; te kakahu nei ano kua poke i te kikokiko, whakariharihangia.
- 24
- Na, te Mea kaha ki te tiaki i a koutou kei hinga, ki te whakatu hoki i a koutou ki te aroaro o tona kororia he mea koha kore i runga i te hari whakaharahara,
- 25
- Ko ia anake nei te Atua te Mea mātau, to tatou Kai whakaora, waiho atu i a ia te kororia me te nui, te kaha me te mana, aianei a ake ake ake. Amine.
Address: 
Phone: 
Email: