- 1
- Na, ka haere a Hamahona ki raro ki Timinata, a ka kite i tetahi wahine ki Timinata no nga tamahine a nga Pirihitini.
- 2
- Na, ka haere atu ia, a ka korero ki tona papa raua ko tona whaea, ka mea, I kite ahau i tetahi wahine ki Timinata, no nga tamahine a nga Pirihitini: na, ma korua ia e tiki atu aianei hei wahine maku.
- 3
- Na, ko te meatanga mai a tona papa raua ko tona whaea ki a ia; He moti koia no te wahine i roto i nga tamahine a ou tuakana, a toku iwi katoa ano hoki, i haere ai koe ki te tiki wahine i roto i nga Pirihitini kokoti-kore? Katahi ka mea a Hamahona ki tona papa, Tikina atu maku; e pai ana hoki ia ki taku titiro atu.
- 4
- Kihai hoki tona papa raua ko tona whaea i mohio he mea tena na Ihowa, a he take riri ki nga Pirihitini te rapua ana e ia. Na, i taua wa ko nga Pirihitini nga rangatira o Iharaira.
- 5
- Na, ka haere a Hamahona, ratou ko tona papa, ko tona whaea, ki Timinata, a, te taenga mai ki nga mara waina o Timinata, na, ko te hamamatanga o tetahi kuao raiona; rere mai ana hoki ki a ia.
- 6
- Te tino putanga iho o te Wairua o Ihowa ki runga ki a ia. Na, haea ana e ia, me te mea e haehae ana ia i te kuao koati; kahore hoki he mea i tona ringa: kihai hoki i korerotia e ia ki tona papa raua ko tona whaea tana i mea ai.
- 7
- Na, ka haere ia ki raro, a ka korero ki taua wahine; a pai tonu tera ki ta Hamahona titiro iho.
- 8
- A roa iho, na, ka hoki ia ki te tiki i a ia, a, tona pekanga atu kia kite i te tinana o te raiona, na he pokai pi kei roto i te riu o te raiona, me tetahi honi hoki.
- 9
- Na, ka maua atu taua mea e tona ringa, a ka kai haere; a, te taenga atu ki tona papa raua ko tona whaea, ka hoatu ma raua, a kai ana raua kihai hoki i korerotia e ia ki a raua he mea tango mai nana taua honi i roto i te riu o te raiona.
- 10
- Katahi ka haere atu tona papa ki taua wahine, a ka tukua e Hamahona he hakari ki reira; ko te tikanga hoki ia ma nga taitamariki.
- 11
- A, to ratou kitenga i a ia, na, ka tikina atu e ratou etahi hoa e toru tekau, hei noho ki a ia.
- 12
- Na ko te meatanga atu a Hamahona ki a ratou, Me korero atu e ahau he kai ki a koutou: Ki te ata whakakaaturia mai tona tikanga ki a au i nga ra e whitu o te hakari, ki te kitea e koutou, na, me hoatu e ahau etahi hiti ki a koutou, kia toru tekau, kia toru tekau ano hoki nga whakarua mo nga kakahu.
- 13
- A ki te kahore e taea e koutou te whakaatu tona tikanga ki a au, na, kia toru tekau nga hiti e homai e koutou ki a au, kia toru tekau ano hoki nga whakarua mo nga kakahu. Na, ka mea mai ratou ki a ia, Makā mai to kai, a ma matou e whakarongo atu.
- 14
- Na, ko tana meatanga atu ki a ratou, Tana hanga he kai, puta mai ana he kai i roto i a ia; i puta mai ano hoki he reka i roto i te mea kaha. A e toru nga ra kihai i taea e ratou te whakaatu i te tikanga o tena kai.
- 15
- A i te whitu o nga ra ka mea ratou ki te wahine a Hamahona, Whakawaia tou tahu kia whakaaturia mai e ia te kai ki a matou, kei tahuna koe me te whare o tou papa e matou ki te ahi: he pahua koia i a matou i karangatia ai matou e korua? ne ra?
- 16
- Katahi ka tangi atu te wahine a Hamahona ki a ia, a ka mea, Kua kino noa iho koe ki a au, kahore ano hoki ou aroha ki a au: kua makā atu nei e koe he kai ki nga tamariki a toku iwi, a kihai i whakaaturia tona tikanga ki a au. Na, ko tana meatanga mai ki a ia, Nana, kahore ano i whakaaturia e ahau ki toku papa ki toku whaea, a me whakaatu ano e ahau ki a koe?
- 17
- Na, ka tangi atu ia ki a ia i aua rangi e whitu o ta ratou hakari; a i te whitu o nga ra ka whakaaturia e ia ki a ia, he tohe hoki nana ki a ia: a whakaaturia atu ana e ia ki nga tamariki a tona iwi.
- 18
- Katahi ka mea mai nga tangata o te pa ki a ia i te whitu o nga ra, i te mea kahore ano i to noa te ra, Ko tehea te mea reka atu i te honi? ko te aha hoki te mea kaha atu i te raiona? Na, ko tana meatanga atu ki a ratou, Me i kahore taku kau hei parau ma koutou, kihai i kitea e koutou taku kai.
- 19
- Na, te tino putanga mai o te Wairua o Ihowa ki runga ki a ia, a haere ana ia ki raro ki Ahakerono, a patua iho o ratou e toru tekau nga tangata, na, huia ana e ia o ratou, a hoatu ana he whakarua mo nga kakahu o nga kai whakaatu o te tikanga o te kai. Na, mura tonu tana riri, a haere ana ia ki runga ki te whare o tona papa.
- 20
- Heoi riro ana ta Hamahona wahine i tona hoa i waiho hei hoa mona.
Address: 
Phone: 
Email: