- 1
- A i haere ano a Hamahona ki Kaha, a ka kitea e ia tetahi wahine puremu ki reira, a haere atu ana ki a ia.
- 2
- A ka korerotia ki nga Kahi, ka meatia, Kua tae mai a Hamahona ki konei. Na, ka karapotia ia e ratou, ka whanga hoki ratou ki a ia i te roa o te po i te kuwaha o te pa. Na, takoto puku ana ratou i te roanga o taua po; i mea hoki, Me patu ia e tatou i te ata, ina awatea.
- 3
- Heoi takoto ana a Hamahona, turuawaenga noa; katahi ia ka whakatika i waenganui po, a ka mau ki nga keti o te kuwaha o te pa, ki nga pou hoki e rua: na, maranga atu ana ia, me aua mea, me te tutaki hoki; a amohia ana i runga i ona pokohiwi, a kawea ana ki runga ki te tihi o te maunga i te ritenga atu o Heperona.
- 4
- A, muri iho ka aroha ia ki tetahi wahine i Awa Horeke, tona ingoa ko Terira.
- 5
- Na, ka haere mai nga rangatira o nga Pirihitini ki taua wahine, a ka mea ki a ia, Whakawaia ia kia kitea ai no hea tona kaha nui, ma te aha hoki ia e taea ai e matou te here, te pehi; a kotahi mano kotahi rau nga pīhi hiriwa e hoatu e tenei, e tenei, o matou ki a koe.
- 6
- Katahi ka mea mai a Terira ki a Hamahona, Tena, whakaaturia mai ki a au no hea to kaha nui, he aha hoki te mea e herea ai, e pehia ai koe?
- 7
- Na, ko te meatanga atu a Hamahona ki a ia, Ki te herea ahau e ratou ki nga aka hou, kahore nei i maroke, katahi au ka kaha-kore, a ka rite ki tetahi atu tangata.
- 8
- Na, ka maua mai e nga rangatira o nga Pirihitini etahi aka hou e whitu ki a ia, he mea kahore ano i maroke noa; a herea ana ia e ia ki aua mea.
- 9
- (I te wahine ano hoki e noho ana nga kai whanga, i te ruma i roto.) Na, ko tana meatanga mai ki a ia, Nga Pirihitini, e Hamahona, he mea i a koe! Na, motumotuhia ana e ia nga aka: koia ano kei te motunga o te miro muka ina pāngia e te ahi. Heoi kihai i mohiotia tona kaha.
- 10
- Katahi ka mea a Terira ki a Hamahona, Nana, kua mamingatia ahau e koe, kua korero teka koe ki a au; tena ra, whakaaturia mai ki a au ma te aha koe e mau ai te here?
- 11
- Na, ko tana meatanga mai ki a ia, Ki te ata herea ahau e ratou ki nga taura hou kahore ano i meatia ki te mahi, katahi ahau ka kaha-kore, ka rite ki tetahi atu tangata.
- 12
- Na, ka mau a Terira ki nga taura hou, a herea ana ia ki aua mea; a ka mea ki a ia, Nga Pirihitini, e Hamahona, he mea i a koe! (i te ruma ano hoki i roto nga kai whanga e noho ana.) Na, kua motu i a ia ano he miro.
- 13
- Na, ka mea a Terira ki a Hamahona, He maminga tau ki a au, he korero teka a mohoa noa nei? whakaaturia mai ki a au ma te aha koe e mau ai te here? Ka mea mai ia ki a ia, Ki te whatua e koe nga makawe e whitu o toku matenga ki roto ki te whenu.
- 14
- Na, titia iho e ia ki te titi, a ka mea ki a ia, Nga Pirihitini, e Hamahona, he mea i a koe! Na, tona ohonga ake i tana moe, maranga atu ana me te titi o te mea whatu, me te whenu ano hoki.
- 15
- Na, ko te meatanga mai a te wahine ki a ia, Na te aha koe i mea ai, E aroha ana ahau ki a koe, kahore nei hoki tou ngakau i riro mai i a au? Ka toru enei mamingatanga āu i a au, kihai ano hoki i whakaaturia mai e koe ki a au no hea tou kaha nui.
- 16
- Nawai a, tu katoa nga ra i tana akinga i a ia ki ana kupu, i tana tohe ki a ia, a mate noa iho tona wairua i te hoha;
- 17
- Katahi ka whakaaturia e ia ki a ia tona ngakau katoa, a ka mea ki a ia, Kahore ano i pa noa he heu ki toku mahunga; he Natari hoki ahau ki a Ihowa no te kopu mai ano o toku whaea: ki te heua ahau, katahi ka riro toku kaha, a ka kaha-kore ahau, ka rite ki te mano tangata.
- 18
- A, te kitenga o Terira kua whakaaturia tona ngakau katoa ki a ia, na, ka tono tangata atu ia ki te karanga i nga rangatira o nga Pirihitini, hei mea atu, Haere mai ano aianei, kua whakaaturia mai hoki tona ngakau katoa ki a au. Na, ka haere mai nga rangatira o nga Pirihitini ki a ia, me te kawe mai i te moni i o ratou ringa.
- 19
- Na, ka whakamoe ia i a ia ki runga i ona turi, a ka karanga ki tetahi tangata ka mea hoki kia heua e ia nga makawe e whitu o tona mahunga; na, ka timata tana whakaiti i a ia, a mahue ake ia i tona kaha.
- 20
- Na, ko ta tera meatanga atu, Nga Pirihitini, e Hamahona, he mea i a koe! Na, maranga ana ia i tana moe, ka mea, Ka haere atu ahau ki waho, ka pera me mua ra, whakaoioi iti i a au. Heoi kihai ia i matau kua mawehe atu a Ihowa i a ia.
- 21
- Katahi ia ka hopukia e nga Pirihitini, a pokaia ana e ratou ona kanohi, kawea ana ki raro ki Kaha; na, herea ana ia ki nga mekameka parahi; a hei kai huri mira ia i roto i te whare herehere.
- 22
- Heoi kua timata nga makawe o tona mahunga te tupu i muri iho i tona heunga.
- 23
- Na, ka huihui nga rangatira o nga Pirihitini ki te patu i tetahi whakahere nui ki a Rakono ki to ratou atua, ki te whakamanamana ano hoki: i mea hoki, Kua homai to tatou hoa riri a Hamahona e to tatou atua ki o tatou ringa.
- 24
- A, te kitenga o te iwi i a ia, ka whakamoemiti ki to ratou atua: i mea hoki, Kua homai to tatou hoa riri e to tatou atua ki o tatou ringa, nāna nei hoki to tatou whenua i huna, he tokomaha hoki o tatou i patua e ia.
- 25
- A i o ratou ngakau e koa ana, ka mea ratou, Karangatia a Hamahona, hei mea takaro ma tatou. Katahi ka karangatia a Hamahona i roto i te whare herehere, a takaro ana ia i to ratou aroaro: na, ka whakaturia ia e ratou ki te takiwa o nga pou.
- 26
- Na, ko te meatanga atu a Hamahona ki te tamaiti i pupuri nei i tona ringa, Tukua ahau kia whawha atu ki nga pou tokomanawa o te whare hei okiokinga atu moku.
- 27
- A ki tonu te whare i te tāne i te wahine; i reira ano hoki nga rangatira katoa o nga Pirihitini: na, i runga i te tuanui, ki te whakaaro iho, e toru mano nga tangata me nga wahine, e matakitaki ana ki nga mahi takaro a Hamahona.
- 28
- Katahi ka karanga a Hamahona ki a Ihowa, ka mea, E te Ariki, e Ihowa, kia mahara ki a au, whakakahangia hoki ahau, e te Atua, aianei a, heoi rawa, kia riro rawa mai i a au aianei he utu i nga Pirihitini mo oku kanohi e rua.
- 29
- Na, hopukia atu ana e Hamahona nga pou tokomanawa e rua o waenga, i tu ai, i mau ai te whare, tetahi ki tona matau, tetahi ki tona maui.
- 30
- Na, ko te meatanga a Hamahona, Kia mate tahi ahau me nga Pirihitini. Te tino pikonga iho, me te whakapau ano i tona kaha; heoi hinga ana te whare ki runga ki nga rangatira, ki runga hoki ki te iwi katoa i roto. Na, tini atu i ana i patu ai i tona oranga te hunga i mate, i whakamatea nei e ia, i tona matenga.
- 31
- Katahi ka haere mai ona teina ki raro, ratou ko te whare katoa o tona pāpā, a tangohia ana ia e ratou, kawea atu ana, tanumia ana ki te takiwa o Toraha o Ehetaoro, ki roto ki te rua o Manoa o tona pāpā. A e rua tekau nga tau i whakarite whakawa ai ia mo Iharaira.
Address: 
Phone: 
Email: