- 1
- Na, ka haere mai te anahera a Ihowa i Kirikara ki Pokimi, a ka mea, Naku koutou i haere mai ai i Ihipa, naku hoki koutou i kawe mai ki te whenua i oati ai ahau ki o koutou matua; i mea ano hoki ahau, E kore e whakatakā e ahau taku kawenata ki a koutou.
- 2
- Kaua ano hoki koutou e whakarite kawenata ki nga tangata o tenei whenua; me pākaru a ratou aata. Heoi kihai nei koutou i rongo ki toku reo. Na te aha tenei mahi a koutou?
- 3
- Koia hoki ahau ka mea nei, E kore ahau e pei i a ratou i to koutou aroaro; a ka waiho ratou hei whiu mo o koutou kaokao; ko o ratou atua hoki hei rore mo koutou.
- 4
- A, te korerotanga a te anahera a Ihowa i enei kupu ki nga tamariki katoa a Iharaira, na, ka ara te reo o te iwi, ka tangi.
- 5
- Na, huaina iho e ratou te ingoa o taua wahi ko Pokimi: i patu whakahere ano hoki ratou ma Ihowa ki reira.
- 6
- Na, i ta Hohua tukunga i te iwi kia haere, ka haere nga tamariki a Iharaira ki tona wahi ki tona wahi, ki te tango i te whenua.
- 7
- A i mahi te iwi ki a Ihowa i nga ra katoa o Hohua, i nga ra katoa ano hoki o nga kaumatua i roa ake nei o ratou ra i o Hohua, i kite nei i nga mahi nui katoa a Ihowa i meinga e ia mo Iharaira.
- 8
- Na, ka mate a Hohua tama a Nunu, te pononga a Ihowa, kotahi rau kotahi tekau ona tau.
- 9
- A tanumia iho e ratou ki te rohe o tona kāinga, ki Timinata-herehe, ki Maunga Eperaima, ki te taha ki te nota o Maunga Kaaha.
- 10
- Na, ka kohia atu ano hoki taua whakatupuranga katoa ki o ratou matua: a ka ara ake tetahi whakatupuranga ke i muri i a ratou, kihai nei i mohio ki a Ihowa, ki nga mahi ano hoki i mahia e ia mo Iharaira.
- 11
- Na, ka mahi ano nga tamariki a Iharaira i te kino i te tirohanga a Ihowa, ka mahi hoki ki nga Paara.
- 12
- A whakarerea ake e ratou a Ihowa te Atua o o ratou matua i whakaputa mai nei i a ratou i te whenua o Ihipa, haere ana ki te whai i nga atua ke, i nga atua o nga iwi i tetahi taha i tetahi taha o ratou, a koropiko ana ki a ratou, na, ka mea ratou i a Ihowa kia riri.
- 13
- Heoi whakarerea ana a Ihowa e ratou, a mahi ana ki a Paara raua ko Ahataroto.
- 14
- Na, ka mura te riri a Ihowa ki a Iharaira, a tukua ana ratou e ia ki nga ringa o nga kai pahua hei pahua i a ratou, a hokona ana ratou e ia ki te ringa o o ratou hoa riri i tetahi taha i tetahi taha; kihai hoki i taea e ratou i muri iho te tu ake i te aroaro o o ratou hoa riri.
- 15
- I o ratou haerenga katoatanga, kei runga i a ratou te ringa o Ihowa mo te kino; i rite hoki ki ta Ihowa i korero ai, ki ta Ihowa hoki i oati ai ki a ratou; na, nui atu to ratou matenga.
- 16
- A i whakaara ake ano a Ihowa i etahi kai whakariterite hei whakaora i a ratou i te ringa o o ratou kai pahua.
- 17
- Heoi kihai ano ratou i whakarongo ki o ratou kai whakariterite; na, kei te puremu ratou, kei te whai ki nga atua ke, kei te koropiko ki a ratou: hohoro tonu ta ratou peka ke atu i te ara i haere ai o ratou matua, ara, i te whakarongo ki nga whakahaunga a Ihowa; kihai tenei i meatia e ratou.
- 18
- A i nga wa i whakaara ake ai a Ihowa i nga kai whakariterite mo ratou, na, i te kai whakariterite a Ihowa, a whakaorangia ake ratou e ia i te ringa o o ratou hoa riri i nga ra katoa o te kai whakariterite: i puta ke hoki nga whakaaro a Ihowa i a ratou e aue ana i o ratou kai tukino, i o ratou kai whakatoi.
- 19
- A, te matenga o te kai whakariterite, ka hoki ratou, nui atu to ratou takanga i to o ratou matua; i haere hoki ki te whai i nga atua ke, mahi atu ai ki a ratou, koropiko atu ai ki a ratou; kihai i whakamutua a ratou mahi, me ta ratou tikanga pakeke.
- 20
- Na, ka mura te riri a Ihowa, a ka mea ia, Na, kua whakapaheketia nei e tenei iwi taku kawenata i whakahaua atu e ahau ki o ratou matua; kihai ano ratou i rongo ki toku reo;
- 21
- Na, heoi ano aku peinga i tetahi tangata i mua i a ratou o nga iwi i mahue i a Hohua i tona matenga.
- 22
- Kia ai ratou hei whakamatautau maku i a Iharaira, e mau ranei ratou ki te ara o Ihowa, e haerea ranei e ratou; e rite ranei te mau ki ta o ratou matua, kahore ranei.
- 23
- Na, ka waiho era iwi e Ihowa, kihai hoki i hohoro te peia; kihai ano hoki i tukua atu ki te ringa o Hohua.
Address: 
Phone: 
Email: