- 1
- Katahi ka waiata a Tepora raua ko Paraka tama a Apinoama i taua ra, ka mea,
- 2
- Whakapaingia a Ihowa mo te takitakinga i nga mate o Iharaira, i te iwi i hihiko noa mai.
- 3
- Whakarongo, e nga kingi, kia whai taringa mai, e nga rangatira; maku, ae ra, maku e waiata atu ki a Ihowa; ka himene atu ahau ki a Ihowa Atua o Iharaira.
- 4
- E Ihowa, i tou putanga mai i Heira, i tou haerenga mai i te parae i Eroma, i wiri te whenua, i maturuturu iho ano hoki nga rangi; i maturuturu iho ano hoki nga wai o nga kapua.
- 5
- I rere a wai nga maunga i te aroaro o Ihowa, taua Hinai hoki, i te aroaro o Ihowa Atua o Iharaira.
- 6
- I nga ra o Hamakara tama a Anata, i nga ra o Taere, i takoto kau nga huarahi, i haere hoki nga tirahaere i nga ara i tahaki.
- 7
- I takoto kau nga kāinga koraha o Iharaira, i takoto kau, a, whakatika noa ahau a Tepora, whakatika noa ahau hei whaea mo Iharaira.
- 8
- I whiriwhiria e ratou nga atua hou; katahi ka puta te whawhai ki nga kuwaha: i kitea ranei he pukupuku, he tao ranei, i roto i nga mano e wha tekau o Iharaira?
- 9
- Kei nga kai whakatakoto tikanga o Iharaira toku ngakau; i hihiko noa mai ratou i roto i te iwi. Whakapaingia a Ihowa.
- 10
- Korero mai, e nga kai eke kaihe ma; e te hunga e noho ana ki te whakawa, e te hunga e haere ana i te ara.
- 11
- Ka ora nei i te reo o nga kai kopere nga utuhanga wai; ka korerotia e ratou i reira nga mahi tika a Ihowa, nga mahi tika ki ona kāinga koraha i roto i a Iharaira: katahi te iwi o Ihowa ka haere ki raro ki nga kuwaha.
- 12
- Maranga, maranga, e Tepora: maranga, maranga, whakahuatia he waiata: whakatika, e Paraka, hereherea hoki o herehere, e te tama a Apinoama.
- 13
- Katahi ka meinga e ia te mea i mahue hei rangatira mo nga ariki o te iwi: kua meinga ahau e Ihowa hei rangatira mo nga mea nunui.
- 14
- No roto i a Eperaima tetahi pakiaka o ratou hei whawhai ki a Amareke, i muri i a koe, e Peniamine, i roto i ou iwi; i haere mai nga kai whakatakoto tikanga i roto i a Makiri; no roto i a Hepuruna nga kai rahurahu i te pene a te kai tuhituhi.
- 15
- I a Tepora ano hoki nga rangatira o Ihakara. I rite ano hoki a Ihakara ki a Paraka. I tonoa ratou i raro i ona waewae ki te raorao. He nui nga whakaaroanga a te ngakau ki nga wehewehenga a Reupena.
- 16
- He aha koe i noho ai i roto i nga taiepa hipi, whakarongo ai ki nga tangi a nga kahui? He nui nga rapurapunga a to ngakau ki nga wehewehenga a Reupena.
- 17
- I tapapa a Kireara ki tera taha o Horano: he aha hoki a Rana i noho ai i runga i nga kaipuke? Ko Ahera, noho tonu mai i te taha o te moana, tapapa ana ia i ona wahi pakaru.
- 18
- He iwi a Hepuruna e whakahawea ana o ratou wairua ki te mate; raua ano ko Napatari i nga wahi teitei o te parae.
- 19
- I haere mai nga kingi, i whawhai, na ka whawhai nga kingi o Kanaana ki Taanaka, ki te taha o nga wai o Mekiro. Kihai tetahi moni i riro mai hei taonga mo ratou.
- 20
- I whawhai mai i runga i te rangi; i whawhai nga whetu i o ratou huarahi ki a Hihera.
- 21
- I kahakina atu ratou e Awa Kihona, e taua awa tawhito, e Awa Kihona. E taku wairua, kua takahia te kaha e koe.
- 22
- Mongamonga noa i reira nga matimati o nga hoiho i nga takatakahanga, i nga takatakahanga a o ratou metararahi.
- 23
- Kangā a Meroho, e ai ta te anahera a Ihowa; kangā rawatia ona tangata; mo ratou kihai i haere mai hei awhina mo Ihowa, hei awhina mo Ihowa ki te whawhai ki te hunga nunui.
- 24
- Kia manaakitia i roto i nga wahine a Taere wahine a Hepere Keni; kia manaakitia i roto i nga wahine o te teneti.
- 25
- I tonoa a ia he wai mona, he waiu tana i homai ai, kawea mai ana e ia he pata i roto i te peihana rangatira.
- 26
- Totoro atu ana tona ringa ki te titi, tona matau ki te hama a nga kai mahi; hamā iho e ia a Hihera, akina iho tona pane; titia iho hoki e ia tona rahirahinga, a puta noa.
- 27
- Kupapa iho ana ia ki ona waewae, hinga ana, takoto ana: i kupapa ia, i hinga, ki ona waewae: te wahi i kupapa ai ia, hinga tonu iho ia i reira, mate rawa.
- 28
- I titiro mai te whaea o Hihera i te matapihi, i karanga hoki i te wini whakakahokaho, Na te aha i roea ai te haere mai o tana hariata? na te aha i puhoi ai nga wira o ana hariata?
- 29
- Ka whakahokia mai e nga mea mohio o ana wahine rangatira; ko ia ano hoki hei whakahoki ake i te kupu ki a ia ano.
- 30
- Kahore ranei ratou i tupono atu, i wehe i te taonga? he kotiro, tokorua nga kotiro ki ia tangata ki ia tangata; he taonga kotingotingo ta Hihera, he taonga kotingotingo, he mea whakairo ki te ngira, he mea kotingotingo, he mea whakairo ki te ngira i tetahi taha i tetahi taha mo nga kaki o te hunga i te taonga parakete?
- 31
- Kia pena te huna o ou hoa riri katoa, e Ihowa; a kia rite te hunga e aroha ana ki a ia ki te ra i tona putanga kaha mai. Na, e wha tekau nga tau i ata takoto ai te whenua.
Address: 
Phone: 
Email: