- 1
- Taukiri e! kua noho mokemoke te pa i ki nei i te tangata! kua rite ia ki te pouaru; te mea i nui nei i roto i nga iwi, te rangatira i roto i nga kawanatanga, kua waiho hei kai homai takoha.
- 2
- Nui atu tana tangi i te po; kei ona pāpāringa ona roimata: te hunga katoa i aroha ki a ia, kahore o ratou kai whakamarie mona; kua tinihanga ona hoa ki a ia, hei hoa riri ratou mona.
- 3
- Kua whakaraua atu a Hura i roto i te tangihanga, i roto i te whakamahinga nui: kei te noho ia i roto i nga tauiwi, kahore e kitea he tānga manawa: hopukia ana ia e ona kai whai i roto i nga wahi kuiti.
- 4
- Kei te tangi nga huarahi o Hiona, no te mea kahore he tangata e haere mai ana ki nga hakari nui, kua ururuatia ona kuwaha katoa, e aue ana āna tohunga, āna wahina kei te pouri; ko ia, mamae noa iho ia.
- 5
- Ko ona hoa riri hei tino tangata, kei te noho humarie ona hoa whawhai; no te mea kua whiua ia e Ihowa mo ona hē maha: kua riro ana tamariki hei pārau i te aroaro o te hoa riri.
- 6
- Kua riro katoa te ataahua o te tamahine a Hiona, kua rite ona rangatira ki nga hāta kihai i tutaki ki te wahi kai; haere kaha-kore ana ratou i te aroaro o te kai whai.
- 7
- I nga ra o tona tangihanga, o ona aitua i mahara a Hiruharama ki ana ahuareka katoa o nga ra o mua, i te takanga o tana iwi ki roto ki te ringaringa o te hoa riri, a kahore he kai awhina mai mona: te kitenga o nga hoa riri i a ia, kata ana ratou ki ana hapati.
- 8
- Nui atu te hara o Hiruharama; na reira ia i whakakopikopikoa ai; te hunga katoa i whakahonore i a ia, kua whakahawea ki a ia: no te mea kua kite nei ratou i a ia e noho tahanga ana: kei te aue ia, kei te hoki ki muri.
- 9
- Kei ona kurupatu tona poke, kahore ona mahara ki tona whakamutunga, na, he hunga whakamiharo tona heketanga iho; kahore he kai whakamarie mona. E Ihowa, titiro mai ki toku mate: kua whakanui hoki te hoa riri i a ia.
- 10
- Kua wherahia atu te ringaringa o te hoa riri ki runga ki ana mea ahuareka katoa; kua kitea nei hoki e ia nga iwi e haere mai ana ki tona wahi tapu, era i ako ra koe kia kaua ratou e uru ki roto ki to whakaminenga.
- 11
- Kei te aue tona iwi katoa; kei te rapu taro ratou, e hoatu ana e ratou a ratou mea ahuareka hei utu kai, hei whakahauora ake mo te wairua. Titiro mai, e Ihowa, whakaaro mai, e whakahaweatia ana hoki ahau.
- 12
- He kahore noa iho ianei tenei ki a koutou, e te hunga e haere nei i te ara? whakaaro mai, titiro mai, e rite ana ranei tetahi mamae ki toku mamae, e mahia nei moku, ki ta Ihowa nei whiu moku i te ra i mura ai tana riri?
- 13
- Kua ungā mai nei e ia he ahi i runga ki roto ki oku wheua, riro tonu atu i taua ahi, kua horahia e ia he kupenga mo oku waewae, kua whakahokia ahau ki muri; kua tukua ahau e ia ki te kahore noa iho, ki te whakaruhi, a pau noa te ra.
- 14
- Te ioka o oku hē herea iho e tona ringa, whiri rawa, kua eke ake ki runga ki toku kaki: kua he i a ia toku kaha, kua tukua ahau e te Ariki ki roto ki nga ringaringa o te tangata, a kahore oku kaha ki te whakatika ake.
- 15
- Kua takatakahia e te Ariki oku marohirohi katoa i roto i a au, kua karangatia atu e ia he huihuinga tangata ki a au hei wawahi i aku taitamariki, kua takatakahia e te Ariki te tamahine wahina a Hura, ano he takahanga waina.
- 16
- Na enei mea ahau i tangi ai: toku kanohi, tarere ana te wai o toku kanohi; no te mea kei tawhiti atu i a au te kai whakamarie hei whakahauora ake i toku wairua; aku tamariki kei te noho kau noa iho, no te mea kua kaha te hoa riri.
- 17
- Kua wherahia atu ona ringaringa e Hiona, a kahore he kai whakamarie mona: na Ihowa te whakahau mo Hakopa, kia karapotia ia e ona hoa riri: kua rite a Hiruharama i roto i a ratou ki te wahine e paheke ana.
- 18
- Tika tonu ta Ihowa; i whakakeke atu hoki ahau ki tana kupu. Tena, whakarongo mai, e nga iwi katoa, titiro mai hoki ki toku mamae; kua riro aku wahina, aku taitamariki, i te whakaraunga.
- 19
- I karanga atu ahau ki te hunga i aroha ki a au, heoi kei te tinihanga ratou ki a au; oku tohunga, oku kaumatua, hemo noa iho ratou i roto i te pa, i a ratou e rapu kai ana ma ratou hei whakahauora ake i o ratou wairua.
- 20
- Titiro mai, e Ihowa, he mamae hoki toku, e ohooho ana oku whekau; toku ngakau hurikiko ana i roto i a au: he nui noa atu hoki toku whakakeke: i waho ko te hoari ki te whakamoti, i roto kei te mate te rite.
- 21
- Kua rongo ratou kei te aue ahau, tē ai he kai whakamarie moku. Kua rongo oku hoa riri katoa ki toku matenga, koa ana ratou ki to meatanga i tenei: e kawea mai ano e koe te ra i karangatia e koe, a ka rite ratou ki a au.
- 22
- Kia tae atu to ratou kino katoa ki to aroaro: meatia ano hoki ki a ratou tau i mea mai ai ki a au mo aku hē katoa: ka maha nei hoki oku auetanga; toku ngakau whakaruhi rawa.
Address: 
Phone: 
Email: