- 1
- Ko au te tangata kua kite i te ngakau pouri, he mea na te rakau o tana riri.
- 2
- I arahina ahau e ia, i kawea ki te pouritanga, kahore hoki he māramatanga.
- 3
- He pono kua tahuri mai ia ki a au, kua anga mai tona ringa ki a au, a pau noa te ra.
- 4
- Kua meinga nei e ia oku kikokiko me toku kiri kia rite ki o te koroheke, mangungu kau i a ia oku wheua.
- 5
- Kua hangā he mea e ia hei whawhaitanga ki a au, karapotia ana ahau ki te wai kawa, ki te raruraru.
- 6
- Kua meinga ahau e ia kia noho ki nga wahi pouri kia pera me te hunga kua mate noa ake.
- 7
- Kua oti ahau te taiepa mai e ia, tē puta atu ahau, kua meinga e ia toku mekameka kia taimaha.
- 8
- I taku karangatanga atu ano hoki, i taku hamamatanga atu, i araia mai e ia toku inoi.
- 9
- Kua oti ano hoki oku ara te taiepa mai e ia ki nga kohatu tarai, whakakopikopikoa ake e ia oku ara.
- 10
- I rite ia ki te pea e whanga ana ki a au, ki te raiona i nga wahi ngaro.
- 11
- Whakangaua ketia ana e ia oku ara, haehaea putia iho ahau, meinga ana ahau e ia kia noho kau noa iho.
- 12
- Kua whakapikoa e ia tana kopere, a whakaturia ake ahau e ia hei koperenga pere.
- 13
- Kua meinga e ia nga pere o tana papa pere kia ngoto ki roto ki oku whatumanawa.
- 14
- Kua waiho ahau hei katanga mai ma toku iwi katoa, hei waiata ma ratou a pau noa te ra.
- 15
- Kua whakakīa ahau e ia ki nga mea kawa, whakainumia rawatia ana ahau e ia ki te womawori.
- 16
- Whatiwhatīa ana hoki e ia oku niho ki nga kirikiri, hipokina ana ahau e ia ki te pungarehu.
- 17
- Kua pangā atu e koe toku wairua kei tata ki te rangimarie, kua wareware ahau ki te pai.
- 18
- Ki tonu ake ahau, Kua kore he pumautanga moku, kahore he tumanakohanga atu maku ki a Ihowa,
- 19
- I a au ka mahara nei ki toku ngakau mamae, ki toku pouri, ki te womawori, ki te wai kawa.
- 20
- Maharahara tonu toku wairua, piko tonu iho i roto i a au.
- 21
- E whakahokia ake ana tenei e ahau ki toku ngakau, i tumanako ai ahau.
- 22
- He mahi tohu na Ihowa tē poto ai tatou; e kore hoki ana mahi aroha e mutu.
- 23
- I tenei ata, i tenei ata, e hou tonu ana, he nui to pono.
- 24
- Ko Ihowa te wahi maku, e ai ta toku wairua, no reira ka tumanako atu ahau ki a ia.
- 25
- E pai ana a Ihowa ki te hunga e tumanako atu ana ki a ia, ki te wairua e rapu ana i a ia.
- 26
- He pai ano kia tumanako atu te tangata, kia tatari marie atu ano hoki ki ta Ihowa whakaoranga.
- 27
- He mea pai ano mo te tangata kia amohia e ia te ioka i tona tamarikitanga.
- 28
- E noho ana ia ko tona kotahi, e whakarongo puku ana, nona hoki i amo.
- 29
- E tukua iho ana e ia tona mangai ki te puehu, me kahore he tumanakohanga atu.
- 30
- E tukua atu ana e ia tona pāpāringa ki te tangata e papaki ana i a ia: kapi tonu ia i te tawai.
- 31
- E kore hoki e mau tonu ta Ihowa panga:
- 32
- Ahakoa whakapouri ia, ka aroha ano ia, ka rite ano ki te nui o tana mahi tohu.
- 33
- Kahore hoki ona ngakau whiu, whakapouri ranei, i nga tamariki a te tangata.
- 34
- Te kuru i nga herehere katoa o te whenua ki raro i ona waewae,
- 35
- Te whakapeau ke i ta te tangata ina whakaritea te whakawa i te aroaro o te Runga-rawa,
- 36
- Te whakariro ke i ta te tangata ina totohe, e kore tena e whakapaingia mai e te Ariki.
- 37
- Ko wai tenei hei ki mai, a ka oti, i te mea kihai i whakahaua mai e te Ariki?
- 38
- He teka ianei e puta mai ana te kino raua ko te pai i roto i te mangai o te Runga-rawa?
- 39
- He aha te tangata ora, i amuamu ai, te tangata ina whiua ona hara?
- 40
- Kia rapua, kia kimihia atu o tatou ara, kia tahuri atu ano hoki ki a Ihowa.
- 41
- Kia ara atu o tatou ngakau me o tatou ringa ki te Atua i te rangi.
- 42
- I he matou, i whakakeke atu; kihai ano koe i muru i to matou he.
- 43
- Kua hipokina nei e koe ki te riri, tukinotia ana matou e koe: tukitukia ana e koe, kihai ano i tohungia e koe.
- 44
- Hipokina ana e koe he kapua ki a koe, kei puta atu ta matou inoi.
- 45
- Kua meinga matou e koe hei paru tahinga, hei mea e akiritia atu ana i roto i nga iwi.
- 46
- Kua hamama mai nga mangai o o matou hoa riri katoa ki a matou.
- 47
- Ko te wehi, ko te rua, kei a matou, te whakamoti me te wawahi.
- 48
- Kei te tarere nei nga awa wai i toku kanohi, mo te wawahanga hoki o te tamahine a toku iwi.
- 49
- Maturuturu ana te wai i toku kanohi, kahore hoki e mutu, tē ai he pariratanga,
- 50
- Kia titiro mai ra ano a Ihowa, kia kite mai ra ano ia i runga i te rangi.
- 51
- E meatia iho ana toku ngakau e toku kanohi, he whakaaro hoki ki nga tamahine katoa o toku pa.
- 52
- Ano he manu ahau e whaia tonutia ana e oku hoa riri, he mea take-kore,
- 53
- Ngaro iho i a ratou toku ora i roto i te poka, kua makā e ratou he kohatu ki runga ki a au.
- 54
- Here ana nga wai i runga i toku māhunga: i mea ahau, Ka motuhia atu ahau.
- 55
- I karanga ahau ki tou ingoa, e Ihowa, i roto i te poka i raro.
- 56
- Kua rongo nei koe ki toku reo; kaua e hunā tou taringa ki te tānga o toku manawa, ki taku karanga.
- 57
- I whakatata mai koe i te ra i karanga atu ai ahau ki a koe, i ki mai koe, Kaua e wehi.
- 58
- Kua tohea e koe, e te Ariki, nga tohe a toku wairua, kua hokona e koe toku ora.
- 59
- Kua kite koe, e Ihowa, i te he i mahia ki a au: mau e whakarite toku whakawakanga.
- 60
- Kua kite koe i to ratou mauahara katoa, i ā ratou whakaaro katoa moku.
- 61
- Kua rongo koe ki ta ratou tawai, e Ihowa, ki ā ratou whakaaro katoa moku;
- 62
- Ki nga ngutu o te hunga e whakatika mai ana ki a au, ki ta ratou tikanga moku, a pau noa te ra.
- 63
- Tirohia mai to ratou nohoanga iho, to ratou whakatikanga ake; ko au te waiatatia nei e ratou.
- 64
- Hoatu he utu ki a ratou, e Ihowa, kia rite ki te mahi a o ratou ringaringa.
- 65
- Hoatu ki a ratou he ngakau pakeke, to kanga ki a ratou.
- 66
- Whaia ratou i runga i te riri, whakangaromia atu ratou i raro i nga rangi o Ihowa.
Address: 
Phone: 
Email: