- 1
- Na, ka karanga mai a Ihowa ki a Mohi, a ka korero mai ki a ia i roto i te tapenakara o te whakaminenga, ka mea,
- 2
- Korero atu ki nga tamariki a Iharaira, mea atu ki a ratou, Ki te kawea mai e tetahi tangata o koutou he whakahere ki a Ihowa, me kawe mai ta koutou whakahere i roto i nga kararehe, ara, i roto i nga kau, i roto ranei i nga hipi.
- 3
- Ki te mea he tahunga tinana tana whakahere no roto i nga kau, me kawe mai e ia tetahi tane, ki te mea kohakore: ka tuku ai e ia ki te whatitoka o te tapenakara o te whakaminenga, hei mea e manakohia ai ia ki te aroaro o Ihowa.
- 4
- A me popoki iho tona ringa ki runga ki te pane o te tahunga tinana; a ka manakohia hei mea mona, hei mea whakamarietanga mona.
- 5
- Na me patu e ia te kau ki te aroaro o Ihowa: a me kawe mai te toto e nga tohunga, e nga tama a Arona, a me tauhiuhi atu te toto ki te aata, a tawhio noa, ki tera i te whatitoka o te tapenakara o te whakaminenga.
- 6
- Na, me tihore e ia te tahunga tinana, a me tapatapahi tenei wahi ona tenei wahi ona.
- 7
- Na, me maka he ahi e nga tama a Arona, a te tohunga, ki runga ki te aata, me whakapai hoki nga wahie ki runga ki te ahi:
- 8
- Katahi ka whakatakotoria marietia e nga tohunga, e nga tama a Arona, nga tapahanga, te pane me te ngako, ki runga ki nga wahie o te ahi i runga i te aata.
- 9
- Ko ona whekau ia me ona waewae, me horoi e ia ki te wai, ka tahu katoa ai e te tohunga ki runga ki te aata hei tahunga tinana, hei whakahere ahi, hei kakara reka ki a Ihowa.
- 10
- A ki te mea no te kahui tana whakahere, no nga hipi, no nga koati ranei, hei tahunga tinana; me kawe mai e ia he tane he mea koha-kore.
- 11
- Ka patu ai e ia ki te taha ki te nota o te aata, ki te aroaro o Ihowa: a ma nga tohunga, ma nga tama a Arona, e tauhiuhi atu ona toto ki te aata, a tawhio noa.
- 12
- Na, ka tapatapahia e ia tenei wahi ona tenei wahi ona, me tona pane, me tona ngako; a ma te tohunga e ata whakatakoto aua mea ki runga ki nga wahie o te ahi i runga i te aata:
- 13
- Ko nga whekau ia, me nga waewae, me horoi e ia ki te wai: a ka kawea katoatia mai e te tohunga, ka tahuna hoki ki runga ki te aata: he tahunga tinana hoki, he whakahere ahi, he kakara reka ki a Ihowa.
- 14
- A ki te mea he tahunga tinana no nga manu tana whakahere ki a Ihowa, na, me kawe mai e ia tana whakahere i roto i nga kukupa, i roto ranei i nga pi kukupa.
- 15
- A ma te tohunga e kawe mai taua mea ki te aata, na, ka kinitia e ia tona pane, ka tahu ai ki runga ki te aata; me whakate atu hoki ona toto ki te taha o te aata:
- 16
- Me tango ano e ia tona puku me tona paru, a ka maka ki te taha ki te rawhiti o te aata, ki te wahi mo nga pungarehu:
- 17
- Na, ka haea e ia, me ona parirau ano, kaua ia e motuhia rawatia: a ma te tohunga e tahu ki runga ki te aata, ki runga ki nga wahie o te ahi: he tahunga tinana tena mea, he whakahere ahi, he kakara reka ki a Ihowa.
Address: 
Phone: 
Email: