- 1
- A i korero mai ano a Ihowa ki a Mohi raua ko Arona, i mea,
- 2
- Ki te mea he puku to te kiri o te kikokiko o tetahi tangata, he paku ranei, he wahi tua-kanapa ranei, a, ka rite tena mea i te kiri o tona kikokiko ki te pānga mai o te repara; na, me kawe mai ia ki a Arona ki te tohunga, ki tetahi ranei o ana tama, o nga tohunga:
- 3
- Na, ka tirohia iho e te tohunga te mea i pa ki te kiri o te kikokiko: a ki te mea kua puta ke, kua ma te huruhuru o te wahi i pāngia, a, ki te titiro atu, kua hohonu iho te mea i pa mai i te kiri o tona kikokiko, he pānga mai tena no te repara: a ka titiro mai te tohunga ki a ia, a ka mea he poke ia.
- 4
- A ki te mea e ma ana te wahi tua-kanapa o te kiri o tona kikokiko, a ki te titiro atu kihai i hohonu iho i te kiri, a kihai i puta ke, kihai i ma te huruhuru o reira; na, ka tutakina atu e te tohunga te tangata i pangia, kia whitu nga ra:
- 5
- A ka tirohia iho ia e te tohunga i te whitu o nga ra: na, kua tuturu te mea i pa mai ra, ki tana titiro iho, a kihai i horapa atu te mate ki te kiri; katahi ka tutakina atu ano ia e te tohunga, kia whitu atu ano ra:
- 6
- A ka tirohia iho ano hoki ia e te tohunga i te whitu o nga ra: a ki te mea kua tuamangu te mea i pa mai ra, a kihai i horapa atu te mate ki te kiri, na ka mea te tohunga, kahore ona poke: he paku kau: a ka horoia e ia ona kakahu, a ka kore ona poke.
- 7
- Tena ko tenei, kua nui te horapatanga atu o te paku ki te kiri, i muri i tona tirohanga iho e te tohunga kia purea ai ia, me titiro ano te tohunga ki a ia:
- 8
- A ki te mea ka kite iho te tohunga, na kua horapa atu te paku ki te kiri, katahi ka mea te tohunga, e poke ana ia: he repara tena.
- 9
- Ki te pāngia te tangata e te repara, na, me kawe mai ia ki te tohunga:
- 10
- A ka tirohia iho e te tohunga: a ki te mea kua ma te puku o te kiri; a kua puta ke te huruhuru, kua ma, a he wahi ora ano no te kikokiko ora kei te puku;
- 11
- He repara tawhito tena i te kiri o tona kikokiko, a me mea te tohunga e poke ana ia, e kore ano hoki ia e tutakina atu: e poke ana hoki.
- 12
- A ki te horapa noa atu te repara ki te kiri, a ka ngaro i te repara te kiri katoa o te tangata i pangia, o tona mahunga iho, a tae noa ki tona waewae, o nga wahi katoa e titiro ai te tohunga;
- 13
- Na, ka titiro iho te tohunga: a ki te mea kua kapi katoa ona kikokiko i te repara, na, ka mea ia, kahore he poke o te tangata i pāngia; kua puta ke, kua ma katoa: kahore ona poke.
- 14
- Otiia he poke ia i te ra e kitea ai e ora ana tetahi wahi o ona kikokiko.
- 15
- A me titiro iho ano te tohunga ki te kiko ora, a ka mea, e poke ana ia: he mea poke hoki te kikokiko ora: he repara hoki.
- 16
- Otiia ki te hoki ano ki te ma te kikokiko ora, me haere mai ia ki te tohunga;
- 17
- A ka titiro mai te tohunga ki a ia, a ki te mea kua puta ke te wahi i pāngia, kua ma, na, ka mea te tohunga, he poke-kore te tangata i pāngia: kahore ona poke.
- 18
- Me te kikokiko hoki, he whewhe nei to tona kiri i mua, a kua ora,
- 19
- A ka puta ake i te wahi o te whewhe he puku ma, he wahi tua-kanapa ranei, he mea ma, e tuawhero ana, a ka whakakitea mai ki te tohunga;
- 20
- A ki te mea, i te tirohanga a te tohunga, na, kei raro iho i te kiri, ki te titiro atu, a kua puta ke, kua ma te huruhuru o reira; katahi ka mea te tohunga, e poke ana ia, he pānga mai tena no te repara; e tupu mai ana i runga i te whewhe.
- 21
- Tena ko tenei, i te tirohanga a te tohunga, na, kahore he huruhuru ma o reira, a kahore taua mate i raro iho i te kiri engari e tuamangu ana, na, me tutaki atu ia e te tohunga, kia whitu nga ra:
- 22
- A ki te mea kua horapa nui atu ki te kiri, na, ka mea te tohunga, e poke ana ia: he pānga mate tena.
- 23
- Ki te tuturu ia te wahi tua-kanapa ki taua wahi, a kahore e horapa atu, he nawenga whewhe tena; a ka mea te tohunga, kahore ona poke.
- 24
- Ki te mea ranei he weranga ahi kei te kiri o tetahi kikokiko, a he wahi ma, kanapa nei, kei te kikokiko ora i wera nei, he mea tuawhero, he mea ma ranei;
- 25
- Na, ka tirohia iho e te tohunga ki te mea kua puta ke, kua ma, te huruhuru o te wahi kanapa, a ka hohonu iho i te kiri ki te titiro atu; he repara tena e tupu ake ana i runga i te weranga: a me mea te tohunga, e poke ana ia: he pānga tena no te repara.
- 26
- Tena ko tenei, ka tirohia iho e te tohunga, a kahore he huruhuru ma o te wahi kanapa, a kahore taua mate i raro iho i te kiri, otiia e tuapouri ana; na, me tutaki ia e te tohunga kia whitu nga ra:
- 27
- A i te whitu o nga ra me titiro mai te tohunga ki a ia: a ki te mea kua horapa nui atu ki te kiri, katahi ka kiia ia e te tohunga, e poke ana: he pānga tena no te repara.
- 28
- A ki te tuturu te wahi tua-kanapa ki tena wahi, a kahore e horapa atu ki te kiri, otiia e tuapouri ana; he puku tena no te weranga, a ka kiia ia e te tohunga he poke-kore: he nawenga weranga hoki.
- 29
- Ki te pāngia te mātenga, te pahau ranei, o tetahi tangata, o tetahi wahine ranei;
- 30
- Na me titiro te tohunga ki te mea i pa mai: a ki te mea e hohonu iho ana i te kiri ki tana titiro atu; a he ahua ma-kohai nei, he ririki, te huruhuru; katahi ka kiia ia e te tohunga, e poke ana: he patito tena, he repara no te mātenga, no te pahau.
- 31
- A ki te titiro te tohunga ki te patito i pa mai nei, a kihai i hohonu iho i te kiri ki te titiro atu, a kahore o reira huruhuru mangu; na ka tutakina atu e te tohunga te tangata i pangia nei e te patito, kia whitu nga ra:
- 32
- A i te whitu o nga ra ka titiro atu te tohunga ki te mate: a ki te kahore i horapa atu te patito, a kahore ona huruhuru ma-kohai nei, a ki te titiro atu, kahore te patito i hohonu iho i te kiri;
- 33
- Na, ka heua ia, ko te patito ia e kore e heua; a ka tutakina atu e te tohunga te tangata i te patito, kia whitu atu nga ra:
- 34
- A i te whitu o nga ra, me titiro atu te tohunga ki te patito, a ki te kahore i horapa atu te patito ki te kiri, a kahore ano e hohonu iho i te kiri ki te titiro atu; katahi ka kiia ia e te tohunga, he poke-kore: a ka horoia e ia ona kakahu, a ka kore te poke.
- 35
- Otiia ki te horapa nui atu te patito ki te kiri i muri iho i te whakakorenga o tona poke;
- 36
- Na, me titiro ano te tohunga ki a ia: a ki te mea kua horapa tena te patito ki te kiri, e kore e rapua e te tohunga te huruhuru ma-kohai; e poke ana ia.
- 37
- Ki te tuturu ia te patito ki tana titiro iho, a kua tupu te huruhuru mangu ki reira; kua mahu te patito, kahore ona poke: a ka kiia e te tohunga he poke-kore.
- 38
- Ki te mea he wahi kanapa to te kiri o te kikokiko o tetahi tangata, o tetahi wahine ranei, ara, he wahi kanapa ma nei;
- 39
- Na, ka tirohia iho e te tohunga: a ki te mea he ma mangu nei nga wahi kanapa o te kiri o to ratou kikokiko; he papaka tena e tupu ana i te kiri; kahore ona poke.
- 40
- Me te tangata hoki kua horo nga huruhuru o tona matenga, e pakira ana ia, kahore ona poke.
- 41
- Me te tangata hoki kua horo nga huruhuru o te wahi o tona matenga whaka-tona-mata, he rae pakira ia; kahore ona poke.
- 42
- A ki te mea kua pāngia tetahi wahi o te mātenga pakira, o te rae pakira ranei; he mea ma tuāwhero nei, he repara tena e tupu ana i tona mātenga pakira, i tona rae pakira ranei.
- 43
- Na, ka tirohia iho e te tohunga: a ki te ma tuawhero nei te puku i pa mai ki tona mātenga pakira, ki tona rae pakira ranei, ki te rite ki te putanga o te repara ki te kiri o te kikokiko;
- 44
- He repara ia, e poke ana: me mea te tohunga, e poke rawa ana ia; ko tona mātenga i pangia.
- 45
- A ko te repara i pangia nei, me haehae ona kakahu, kia takoto kau hoki tona mātenga, me arai ano hoki tona ngutu o runga, ka karanga hoki, He poke, he poke.
- 46
- Ka poke ia i nga ra katoa e pangia ai; e poke ana ia; me noho ko ia anake, ko waho o te puni te nohoanga mona.
- 47
- Me te kakahu ano hoki i pangia e te repara, ahakoa he kakahu huruhuru, he kakahu rinena ranei;
- 48
- Ahakoa i te whenu, i te aho ranei, i nga mea rinena, huruhuru ranei: ahakoa i te hiako, i tetahi mea hiako ranei;
- 49
- Na, ki te mea he ma-kakariki, he tuawhero ranei, te wahi i pangia o te kakahu, o te hiako ranei, o te whenu ranei, o te aho ranei, o tetahi mea hiako ranei, he pānga mai tena no te repara, a me whakakite atu ki te tohunga:
- 50
- Na, ka tirohia iho e te tohunga te wahi i pangia, a ka tutakina atu e ia te mea i pangia, kia whitu nga ra:
- 51
- A i te whitu o nga ra ka tirohia e ia te wahi i pangia: ki te mea kua horapa atu te mea i pa ki te kakahu, ki te whenu ranei, ki te aho ranei, ki tetahi hiako, ki tetahi mea ranei i hangā ki te hiako: he repara ngau kino te mea i pa mai; he mea poke tena.
- 52
- Na ka tahuna e ia taua kakahu, ahakoa he whenu, he aho ranei, ahakoa he huruhuru, he rinena ranei, ahakoa he mea hiako te mea i pāngia; he repara ngau kino tena; me tahu ki te ahi.
- 53
- A ki te titiro iho te tohunga, a kihai te mea i pa i horapa atu ki te kakahu, ki te whenu, ki te aho, ki tetahi mea hiako ranei;
- 54
- Na, ka whakahau atu te tohunga kia horoia e ratou te mea i pangia, a ka tutakina atu e ia, kia whitu atu ano nga ra:
- 55
- A me titiro iho e te tohunga te mea i pa mai, i muri iho i te horoinga: a ki te mea kihai i rereke te kara o te wahi i pangia, a kihai i horapa atu te mea i pa mai; e poke ana; me tahu e koe ki te ahi; kua ngaua a roto, ahakoa i tiwha te taha ki roto, te taha ranei ki waho.
- 56
- A ki te mea ka kite iho te tohunga, na, kua tuamangu te wahi i pāngia i muri i te horoinga; katahi ka haea atu e ia i roto i te kakahu, i roto ranei i te hiako, i roto ranei i te whenu, i te aho ranei:
- 57
- A ki te kitea ano i te kakahu, i te whenu ranei, i te aho ranei, i tetahi mea hiako ranei; he mea tupu tena: me tahu e koe ki te ahi taua mea i pāngia.
- 58
- A ko te kakahu, te whenu ranei, te aho ranei, te mea hiako ranei i horoia e koe, a kua riro te mate, na, ka horoia ano, a ka kore ona poke.
- 59
- Ko te ture tenei mo te pānga mai o te repara ki te kakahu huruhuru, ki te kakahu rinena ranei, ki te whenu, ki te aho ranei, ki tetahi mea hiako ranei, mo te ki atu he poke-kore, mo te ki atu ranei e poke ana.
Address: 
Phone: 
Email: