- 1
- A i mea ano a Ihowa ki a Mohi, Korero atu ki nga tohunga ki nga tama a Arona, mea atu ki a ratou, Kei poke tetahi i te tupapaku o tona iwi:
- 2
- Engari i tona whanaunga, i te mea e tata ana ki a ia, i tona whaea, i tona papa, i tana tama, i tana tamahine, i tona tuakana, teina ranei,
- 3
- I tona tuahine hoki, ki te mea he wahina, he mea e tata ana ki a ia, a kahore ana tane: e poke ano ia i a ia.
- 4
- Kaua ia e whakapoke i a ia kia noa mo te ariki o tona iwi.
- 5
- Kaua e whakatiwhaia o ratou mātenga, kaua hoki e heua nga taha o o ratou pahau, kaua ano hoki e haea to ratou kikokiko.
- 6
- Kia tapu ratou ki to ratou Atua, kaua hoki e whakanoatia te ingoa o to ratou Atua: no te mea ko ratou hei whakahere i nga whakahere ahi a Ihowa, i te kai a to ratou Atua: mo reira kia tapu ratou.
- 7
- Kaua ratou e tango i te wahine puremu, i te mea noa ranei, hei wahine; kaua ano hoki ratou e tango i te wahine i whakarerea e tana tane: he tangata tapu hoki ia no tona Atua.
- 8
- Mo reira me whakatapu ia e koe, mana hoki e whakahere te kai a tou Atua: kia tapu ia ki a koe: e tapu ana hoki ahau a Ihowa, tou kai whakatapu.
- 9
- Me te tamahine hoki a tetahi tohunga, ki te whakanoa ia i a ia, ki te puremu, kua whakanoatia e ia tona papa: me tahu ki te ahi.
- 10
- Me te tino tohunga hoki, te tangata o ona teina i ringitia nei tona mātenga ki te hinu whakawahi, a i whakatohungatia hei kakahu i nga kakahu, kaua ia e whakarere atu i te taupoki o tona mātenga, kaua ano hoki e haea ona kakahu;
- 11
- Kaua hoki ia e haere atu ki tetahi tupapaku mate, kaua ano hoki ia e whakapoke i a ia mo tona papa, mo tona whaea ranei;
- 12
- Kaua hoki ia e haere ki waho o te wahi tapu, kei noa i a ia te wahi tapu o tona Atua; kei runga hoki i a ia te karauna o te hinu whakawahi a tona Atua: ko Ihowa ahau.
- 13
- Me tango ano hoki e ia he wahine i tona wahinatanga.
- 14
- He pouaru, he wahine ranei i whakarerea, he wahine noa ranei, he wahine puremu ranei, kaua enei e tangohia e ia: engari me tango e ia he wahina i roto i tona iwi ake hei wahine.
- 15
- Kaua hoki e whakanoatia e ia ona uri i roto i tona iwi: ko Ihowa hoki ahau te whakatapu nei i a ia.
- 16
- A i korero ano a Ihowa ki a Mohi, i mea,
- 17
- Korero atu ki a Arona, mea atu, Ki te mea he koha to tetahi o ou uri i o ratou whakatupuranga, kaua ia e whakatata mai ki te whakahere i te kai a tona Atua.
- 18
- Kaua hoki e whakatata mai tetahi tangata he koha tona: te matapo, te kopa, te tangata he ihu parehe tona, i hira ake ranei tetahi wahi ona,
- 19
- Te tangata ranei i whati te waewae, i whati ranei te ringa,
- 20
- Te tuara piko ranei, te mea i pu-whenua te tupu, ki te papahewa ranei tona kanohi, ki te mea ranei he papaka, he hakihaki ranei tona, ki te mea ranei kua komurumurua ona mea;
- 21
- Kaua tetahi tangata o nga uri o te tohunga, o Arona, ki te mea he koha tona, e whakatata mai ki te whakahere i nga whakahere ahi a Ihowa: he koha tona, kaua ia e whakatata mai ki te whakahere i te kai a tona Atua.
- 22
- Me kai e ia te kai a tona Atua, te mea tapu rawa, me te mea tapu.
- 23
- Otiia kaua ia e haere atu ki te arai, e whakatata ranei ki te aata; he koha hoki tona; kei noa i a ia oku wahi tapu: ko Ihowa nei hoki ahau te whakatapu nei i a ratou.
- 24
- Na, ka korerotia e Mohi ki a Arona, ratou ko ana tama, ki nga tamariki katoa ano hoki a Iharaira.
Address: 
Phone: 
Email: