- 1
- Ki te hara hoki tetahi, ki te rongo hoki ki te reo whakaoati, a ka meinga hei kai whakaatu i tona kitenga ranei, i tona mohiotanga ranei; ki te kahore e whakaaturia mai e ia, ka wahā e ia tona hara.
- 2
- Ki te pa te tangata ki tetahi mea poke, ki te tinana ranei o tetahi kirehe poke, ki te tinana ranei o tetahi kararehe poke, ki te tinana ranei o te mea ngoki, ara, o te mea poke, a e ngaro ana i a ia; ka poke ia, ka whai hara.
- 3
- Ki te pa ranei ia ki te poke tangata ki nga tini poke e poke ai te tangata a e ngaro ana i a ia; ka whai hara ia, ina mohiotia e ia.
- 4
- Ki te oati ano hoki tetahi, he mea puaki mai i ona ngutu, mo te pai ranei, mo te kino ranei, mo nga tini mea e puaki mai i te tangata ina oati, a e ngaro ana i a ia; ka mohiotia e ia, na, ka whai hara ia i tetahi o enei.
- 5
- A ki te mea kua whai hara ia i tetahi o enei mea, na, me whaki mai e ia kua hara ia i taua mea;
- 6
- A ka kawea mai tana whakahere mo te he ki a Ihowa, mo tana hara i hara ai ia, he uha no te kahui, he reme, he kuao koati ranei, hei whakahere hara; a ma te tohunga e mea he whakamarietanga mona mo tona hara.
- 7
- A ki te kahore e taea e ia te kawe mai tetahi reme, katahi ka kawea mai e ia ki a Ihowa mo tana he i he ai ia, kia rua nga kukupa, kia rua ranei nga pi kukupa; tetahi hei whakahere hara, tetahi hoki hei tahunga tinana.
- 8
- A me kawe mai raua e ia ki te tohunga, ka whakahere ai e ia, ko te mea mo te whakahere hara ki mua, ka kikini ai i tona pane i te ritenga mai o tona kaki, otiia kaua e motuhia rawatia atu:
- 9
- Na, ka tauhiuhia atu e ia tetahi wahi o nga toto o te whakahere hara ki te taha o te aata; ka whakate atu ai i te toenga o te toto ki te turanga o te aata; he whakahere hara tena mea.
- 10
- Ko te rua ia me tuku hei tahunga tinana; kia rite ki te tikanga: a ka mea whakamarietanga te tohunga mona, ano tona hara i hara ai ia, a ka murua.
- 11
- A ki te kahore e taea e ia te kawe mai i nga kukupa e rua, i nga pi kukupa ranei e rua, na me kawe mai tana whakahere e te tangata i hara, te wahi whakatekau o te epa paraoa, hei whakahere hara; kaua e meatia iho ki te hinu, kaua ano hoki e meatia e ia he parakihe ki runga: he whakahere hara hoki.
- 12
- A me kawe mai e ia ki te tohunga, a ka aohia ake e te tohunga, kia ki tona ringa, he whakamaharatanga ki taua mea, ka tahu ai ki runga ki te aata, kia rite ki nga whakaherenga ahi ki a Ihowa: he whakahere hara taua mea.
- 13
- A ka mea whakamarietanga te tohunga mona, mo tona hara i hara ai ia ki tetahi o enei, a ka murua: a ma te tohunga te toenga, kia rite ki te whakahere toto-kore.
- 14
- A i korero mai ano a Ihowa ki a Mohi, i mea,
- 15
- Ki te kino te mahi a tetahi, he hara pohehe, ki nga mea tapu a Ihowa; na, me kawe mai e ia tana whakahere mo te he ki a Ihowa, kia kotahi hipi toa, ki te mea koha-kore, no roto i te kahui hipi, me whakarite ano e koe ona utu ki nga hekere hiriwa, kei nga hekere o te wahi tapu te tikanga, hei whakahere mo te he:
- 16
- Ka utu ai i te hara i hara ai ia ki te mea tapu, me tapiri mai ano hoki e ia ki te wahi whakarima, ka homai ai ki te tohunga: a ka mea whakamarietanga te tohunga mona ki te hipi toa e whakaherea ana mo te he, a ka murua tona hara.
- 17
- A ki te hara tetahi, a ka mea i te mea e tika ke ana i tetahi o nga whakahaunga a Ihowa, i te mea e kore e tika kia meatia; ahakoa e kore e mohiotia e ia, kua whai hara ia, a ka wahā e ia tona kino.
- 18
- A me kawe mai e ia he hipi toa ki te tohunga, he mea koha-kore, no roto i te kahui, (me whakarite ano hoki e koe tona utu,) hei whakahere mo te he: a ka mea whakamarietanga te tohunga mona, mo tona pohehetanga i pohehe ai ia, a kihai nei i matau, a ka murua tona he.
- 19
- He whakahere tena mo te he: he pono rawa tona he ki a Ihowa.
Address: 
Phone: 
Email: