- 1
- A i te waru o nga ra ka karangatia e Mohi a Arona ratou ko ana tama, ko nga kaumatua o Iharaira;
- 2
- A ka mea ia ki a Arona, Tikina tetahi kuao kau mau, hei whakahere hara, me tetahi hipi toa hei tahunga tinana, ki te mea koha-kore, ka whakahere ai ki te aroaro o Ihowa.
- 3
- A me korero ano koe ki nga tamariki a Iharaira, me ki atu, Tikina he kuao koati ma koutou hei whakahere hara; me tetahi kuao kau, me tetahi reme, ki te tau-tahi, ki te mea koha-kore, hei tahunga tinana;
- 4
- Me tetahi puru, me tetahi hipi toa hei whakamarietanga, hei patunga tapu ki te aroaro o Ihowa; me tetahi whakahere toto-kore, ki te mea i konatunatua ki te hinu: ko aianei hoki a Ihowa puta mai ai ki a koutou.
- 5
- Na, ka kawea mai e ratou ta Mohi i whakahau ai ki mua o te tapenakara o te whakaminenga: o ka whakatata katoa mai te whakaminenga, ka tu hoki ki te aroaro o Ihowa.
- 6
- Na, ka mea a Mohi, Ko te mea tenei i whakahaua mai e Ihowa kia meatia e koutou: a ka puta mai te kororia o Ihowa ki a koutou.
- 7
- A ka mea a Mohi ki a Arona, Haere ki te aata, whakaherea atu hoki to whakahere hara, me to tahunga tinana, ka mea whakamarietanga ai mou, mo te iwi hoki: ka whakahere atu ai hoki i te whakahere a te iwi, ka mea whakamarietanga ai mo ratou, ka pera ai me ta Ihowa i whakahau ai.
- 8
- Na, ka haere a Arona ki te aata, a patua ana e ia te kuao kau, te whakahere hara, te mea hoki mona.
- 9
- A ka kawea te toto ki a ia e nga tama a Arona: a ka toua e ia tona maihao ki te toto, a pania ana ki nga haona o te aata, i ringitia hoki te toto e ia ki te turanga o te aata:
- 10
- Ko te ngako ia, me nga whatukuhu, me te taupa i runga ake i te ate o te whakahere hara, i tahuna e ia ki runga ki te aata; i peratia ano me ta Ihowa i whakahau ai ki a Mohi.
- 11
- Ko te kikokiko ia, me te hiako, i tahuna e ia ki te ahi i waho o te puni.
- 12
- A i patua ano e ia te tahunga tinana, a ka homai ki a ia e nga tama a Arona te toto, a tauhiuhia ana e ia ki te aata, a, tawhio noa.
- 13
- Na, ka homai e ratou te tahunga tinana ki a ia, ona tapahanga hoki, me te pane; a tahuna ana e ia ki runga ki te aata.
- 14
- A i horoia ano e ia nga whekau me nga waewae, a tahuna ana ki runga ki te tahunga tinana ki runga ki te aata.
- 15
- A i kawea mai ano e ia te whakahere a te iwi, a ka mau ki te koati ki te whakahere hara mo te iwi, a patua ana, e ia, whakaherea atu ana hoki mo te hara; i peratia ano me te tuatahi.
- 16
- A i kawea mai ano e ia te tahunga tinana, a rite tonu ki te tikanga tana meatanga i taua mea.
- 17
- A i kawea mai ano e ia te whakahere toto-kore, a aohia mai ana tetahi wahi e ia, ki tonu te ringa, a tahuna ana ki runga ki te aata, hei tapiri mo te tahunga tinana o te ata.
- 18
- I patua ano hoki e ia te puru, me te hipi toa, hei patunga whakamarietanga, hei mea mo te iwi: a ka homai e nga tama a Arona te toto ki a ia, a tauhiuhia ana e ia ki te aata, a, tawhio noa,
- 19
- Me nga ngako o te puru raua ko te hipi toa, te hiawero, me te whiwhiwhiwhi o nga whekau, me nga whatukuhu, me te taupa i runga i te ate:
- 20
- A i makā iho e ratou nga ngako ki runga ki nga uma, a tahuna ana e ia nga ngako ki runga ki te aata:
- 21
- I poipoia ano e Arona nga uma me te peke matau hei whakahere poipoi ki te aroaro o Ihowa; i peratia ano me ta Mohi i whakahau ai.
- 22
- Katahi ka torona ake te ringa o Arona whaka-te-iwi, a manaakitia iho ratou e ia; na ka heke iho ia i te meatanga i te whakahere hara, i te tahunga tinana, me nga whakamarietanga.
- 23
- Na, ka haere a Mohi raua ko Arona ki roto ki te tapenakara o te whakaminenga, a ka puta mai ano, ka manaaki hoki i te iwi: na, ka puta mai te kororia o Ihowa ki te iwi katoa.
- 24
- I puta mai ano he ahi i te aroaro o Ihowa, a, pau ake te tahunga tinana, me nga ngako, i runga i te aata: a, te kitenga o te iwi katoa, na, ka hamama ratou, a kupapa ana ki raro.
Address: 
Phone: 
Email: