- 1
- A i a ia e inoi ana i tetahi wahi, a ka mutu, ka ki atu tetahi o ana akonga ki a ia, E te Ariki, whakaakona matou ki te inoi, me Hoani hoki i whakaako i ana akonga.
- 2
- Ka mea atu ia ki a ratou, Ka inoi koutou, mea atu, E to matou Matua i te rangi, Kia tapu tou ingoa. Kia tae mai tou rangatiratanga. Kia meatia tau e pai ai ki runga ki te whenua, kia rite ano ki to te rangi.
- 3
- Homai ta matou taro ki a matou, to tenei ra to tenei ra.
- 4
- Murua o matou hara; e murua ana hoki e matou o nga tāngata katoa e hara ana ki a matou. Aua hoki matou e kawea kia whakawaia; engari whakaorangia matou i te kino.
- 5
- I mea ano ia ki a ratou, Ko wai o koutou ki te mea he hoa tona, a ka tae atu ki a ia i waenganui po, ka mea ki a ia, E hoa, homai ki a au etahi taro, kia toru;
- 6
- Kua tae mai hoki taku hoa ki a au i te ara, a kahore aku mea e whakatakoto ai ahau māna?
- 7
- A ka whakahokia mai e tera i roto, ka mea, Hoha ki, kāti ra: kua tutakina noatia ake te tatau, a kei te moenga nei matou ko aku tamariki; e kore e ahei kia whakatika atu ahau ki te hoatu ki a koe.
- 8
- Ko taku kupu tenei ki a koutou, Ahakoa kahore ia i whakatika ki te hoatu ki a ia, no te mea he hoa nona, ma tana tohe ano ka ara ake ai ia, ka hoatu ai ki a ia i nga mea i tonoa e ia.
- 9
- A ko taku kupu ano tenei ki a koutou, Inoia, a ka hoatu ki a koutou; rapua, a ka kitea e koutou; patukia, a ka uakina kia koutou.
- 10
- Ta te mea ka whiwhi nga tāngata katoa ina inoi; ka kite ina rapu; a ka uakina ki te tangata e patuki ana.
- 11
- Ko tehea matua o koutou ki te inoia e tana tamaiti tetahi taro, e hoatu ranei ki a ia he kamaka? a ki te inoia he ika, e hoatu ranei ki a ia he nakahi hei ika?
- 12
- A ki te inoia he hua manu, e hoatu ranei ki a ia he kopiona?
- 13
- Ki te mea ko koutou, te hunga kino, e mātau ana ki te hoatu mea papai ki a koutou tamariki: tera noa ake te homaitanga o te Wairua Tapu e to koutou Matua i te rangi ki te hunga e inoi ana ki a ia.
- 14
- Na, e pei rewera ana ia, he wahangu ano hoki ia. A, te putanga mai o te rewera ki waho, ka korero te wahangu; a miharo ana te mano.
- 15
- Na, ka mea etahi o ratou, Na te rangatira o nga rewera na Perehepura tāna peinga rewera.
- 16
- Na, ka whakamatautau etahi, ka mea ki tetahi tohu i a ia i te rangi.
- 17
- Otiia i mātau ia ki ā ratou whakaaro, a ka mea ki a ratou, Ki te tahuri iho tetahi rangatiratanga ki a ia ano, ka kore; a ki te tahuri tetahi whare ki tetahi whare, ka hinga.
- 18
- A ki te tahuri iho a Hatana ki a ia ano, me pehea e tu ai tona rangatiratanga? e mea na hoki koutou, na Perehepura taku peinga rewera.
- 19
- Na, ki te mea na Perehepura taku peinga rewera, na wai te peinga a a koutou tamariki? mo konei hei kai whakahe ratou mo koutou.
- 20
- Tena ki te mea na te ringaringa o te Atua taku peinga rewera, ina, kua tae noa mai te rangatiratanga o te Atua ki a koutou.
- 21
- I te mea ka tiakina tona whare e te tangata kaha, he patu nei tana, ka ata takoto ona taonga:
- 22
- Otira ki te puta mai tetahi e kaha atu ana i a ia, a ka hinga tera, na, ka tangohia ana patu i whakamanawa atu ai ia, ka tuwhatuwhaia ona taonga.
- 23
- Te tangata ehara i te hoa noku, he hoa riri ia ki a au: te tangata kahore e kohikohi tahi maua, e titaritari ana.
- 24
- Ka puta mai te wairua poke i roto i te tangata, ka haereere ia ra nga wahi wai-kore rapu okiokinga ai; a, tē kitea, ka mea ia, Ka hoki atu ahau ki toku whare i puta mai ai ahau.
- 25
- A, te taenga atu, rokohanga atu kua oti te puruma, te whakapaipai.
- 26
- Na, ka haere ia, ka tango i etahi atu wairua tokowhitu, he kino atu i a ia ano; a tomo atu ana, noho ana i reira: a kino atu i te timatanga te whakamutunga o taua tangata.
- 27
- A i a ia e korero ana i enei mea, ka karanga ake tetahi wahine i roto i te mano, ka mea ki a ia, Koa tonu te kopu i kawea ai koe, me nga u i ngotea e koe.
- 28
- Ano ra hoki ko ia, Engari, koa tonu te hunga e whakarongo ana ki te kupu a te Atua, a e mahi ana.
- 29
- Ano ka rupeke mai te mano, ka anga ia ka korero, He whakatupuranga kino tenei: e rapu ana ki tetahi tohu; a e kore tetahi tohu e hoatu, ko te tohu anake o Hona poropiti.
- 30
- I waiho nei hoki a Hona hei tohu ki nga tāngata o Ninewe, ka pera ano hoki te Tama a te tangata ki tenei whakatupuranga.
- 31
- Ka whakatika ngatahi te kuini o te tonga i te whakawakanga me nga tāngata o tenei whakatupuranga, a ka whakatau i te hē ki a ratou: i haere mai hoki ia i nga pito o te whenua ki te whakarongo ki te whakaaro nui o Horomona; a tenei ano tetahi e nui atu ana i a Horomona.
- 32
- Ka whakatika ngatahi nga tāngata o Ninewe i te whakawakanga me tenei whakatupuranga, a ka whakatau i te hē ki a ratou: i ripeneta hoki ratou i te kauwhautanga a Hona; a tenei ano tetahi e nui atu ana i a Hona.
- 33
- Ka tahuna te rama, e kore e waiho e te tangata ki te wahi ngaro, ki raro ranei i te puhera, engari ki runga ki te turanga, kia kitea ai te māramatanga e te hunga e tomo atu ana.
- 34
- Ko te kanohi te rama o te tinana: na, ki te atea tou kanohi, ka mārama ano hoki tou tinana katoa; tena ki te kino, ka pouri ano hoki tou tinana.
- 35
- Na kia tupato kei pouri te māramatanga i roto i a koe.
- 36
- Na, ki te mārama tou tinana katoa, a kahore ona wahi pouri, ka mārama katoa ano, me te mea ko te mura o te rama e whakamārama ana i a koe.
- 37
- I a ia e korero ana, ka kiia ia e tetahi Parihi kia tina tahi raua: a ka haere ia ki roto, ka noho.
- 38
- A, te kitenga o te Parihi, ka miharo, no te mea kahore ia e horoi i mua o te tina.
- 39
- Ka mea mai te Ariki ki a ia, Tenei koutou, e nga Parihi, te horoi nei i waho o te kapa o te rihi; ko roto ia o koutou e kī ana i te pahua i te kino.
- 40
- E te hunga kuare, kihai ianei i hangā a roto e te kai hanga o waho?
- 41
- Engari hoatu nga mea o roto hei atawhainga mo nga rawa-kore; a ka ma nga mea katoa ki a koutou.
- 42
- Na, aue te mate mo koutou, e nga Parihi! e hoatu ana hoki e koutou te wahi whakatekau o te miniti, o te ru, o nga otaota katoa, a kapea ake te whakaritenga whakawa me te aroha ki te Atua: e tika ana ano ko enei kia meatia, kia kaua ano hoki era e kapea.
- 43
- Aue te mate mo koutou, e nga Parihi! ko ta koutou hoki e rawe ai ko nga nohoanga rangatira i nga whare karakia, me nga ohatanga hoki i nga kāinga hoko.
- 44
- Aue te mate mo koutou, e nga Karaipi, e nga Parihi, e te hunga tinihanga! e rite ana koutou ki nga urupa e ngaro ana, a e kore e kitea e nga tāngata e haereere ana i runga.
- 45
- Na, ka whakahokia atu e tetahi o nga kai whakaako o te ture, ka mea ki a ia, E te Kai whakaako, he whakaae ano hoki mo matou enei korero āu.
- 46
- Na, ko tana meatanga mai, Aue te mate mo koutou ano hoki, e nga kai whakaako o te ture! e whakawaha ana hoki koutou i nga tāngata ki nga wahanga e taimaha rawa ana hei pikaunga, a e kore tetahi o o koutou matihao e pa atu ki aua wahanga.
- 47
- Aue te mate mo koutou! ko koutou nei hoki hei hanga i nga urupa o nga poropiti, a na o koutou mātua ratou i whakamate.
- 48
- Na, he kai whakaatu koutou he kai whakaae ki nga mahi a o koutou mātua: na ratou hoki ratou i whakamate, ko koutou hoki hei hanga i o ratou urupa.
- 49
- Na konei ano hoki te matauranga o te Atua i mea ai, Maku e tono atu nga poropiti me nga apotoro ki a ratou, a ka whakamate, ka tukino ratou i etahi o ratou:
- 50
- Kia rapua ai he utu i tenei whakapaparanga mo te toto o nga poropiti katoa, i ringihia nei no te timatanga ra ano o te ao;
- 51
- No te toto o Apera, tae noa ki te toto o Hakaraia i mate ki te takiwa o te āta o te temepara: ae ra, ka mea atu ahau ki a koutou, E rapua ano he utu i tenei whakapaparanga.
- 52
- Aue te mate mo koutou, e nga kai whakaako o te ture! kua tangohia hoki e koutou te kī o te matauranga: e kore koutou e tomo atu ki roto, a e arai ana i te hunga e tomo atu ana.
- 53
- Na, i a ia e korero ana i enei mea ki a ratou, ka timata nga Karaipi me nga Parihi, a kaha rawa ta ratou tohe ki a ia, he mea hoki kia maha atu ai ana korero:
- 54
- E whanga ana hoki mona, e whai ana kia mau tetahi kupu a tona mangai, he whakapa hē ma ratou ki a ia.
Address: 
Phone: 
Email: