- 1
- A, muri iho, ka haereere ano ia ki nga pa ki nga kāinga, ka kauwhau ka whakapuaki i te rongo pai o te rangatiratanga o te Atua: i a ia hoki te tekau ma rua,
- 2
- Me etahi wāhine hoki kua oti nei te whakaora i nga wairua kino, i nga ngoi-koretanga, ko Meri e karangatia nei ko Makarini, e whitu nei nga rewera i puta mai i roto i a ia,
- 3
- Ko Hoana hoki te wahine a Kuha, a ta Herora kai whakahauhau, me Huhana, me era atu tona tini, a na ratou i mahi etahi o o ratou taonga hei mea māna.
- 4
- A ka tini nga tāngata ka huihui mai, a ka tae mai ki a ia i tenei pa i tenei pa, ka korero kupu whakarite ia:
- 5
- I haere atu te kai rui ki te rui i tana purapura: a i a ia e rui ana, ka ngahoro tetahi ki te taha o te ara; a takahia ana, na, kainga ake e nga manu o te rangi.
- 6
- Ko etahi i ngahoro ki runga ki te toka; te tupunga ake, kua maroke, kahore hoki he makuranga.
- 7
- Ko etahi i ngahoro ki roto ki nga tataramoa; a tupu tahi ana nga tataramoa, koaoaotia iho.
- 8
- Ko etahi i ngahoro ki te oneone pai; tupu ana, tatakirau ona hua. Ka mutu enei korero, ka karanga ia, Ko ia he taringa ona hei whakarongo, kia rongo ia.
- 9
- Na, ka ui ana akonga ki a ia, ka mea, He aha te tikanga o tenei kupu whakarite?
- 10
- Ka mea mai ia, Kua hoatu ki a koutou te matauranga ki nga mea ngaro o te rangatiratanga o te Atua: ki era atu ia, he whakarite nga kupu: kia kite ai ratou, a e kore e kite, kia rongo ai, a kore ake e mātau.
- 11
- Na, tenei te kupu whakarite: Ko te purapura te kupu a te Atua.
- 12
- Era i te huarahi, ko nga kai whakarongo; me i reira ka haere mai te rewera, ka kapo i te kupu i roto i o ratou ngakau, kei whakapono ratou, a ka ora.
- 13
- Era i runga i te toka ko te hunga e tango nei i te kupu me te hari ano i to ratou rongonga ai; kahore ia o ratou pakiaka, whakapono ana ratou ehia ake ano ra, a i te wa o te whakamatautau ka mawehe atu.
- 14
- Tera i ngahoro ki roto ki nga tataramoa, ko te hunga e whakarongo ana, a, te haerenga atu, ka koaoaotia e nga whakaaroaronga, e nga taonga, e nga whakaahuareka o te ao, a kore ake e pakari o ratou hua.
- 15
- Ko tera i te oneone pai, ko te hunga e tika ana e pai ana te ngakau, a, te rongonga i te kupu, ka pupuri, a hua ana nga hua i runga i te manawanui.
- 16
- E kore e tahuna te rama e tetahi, a e hipokina ki te oko, e waiho ranei raro i te moenga; engari ka whakaturia ki runga ki te turanga, kia kitea ai te māramatanga e te hunga e tomo mai ana.
- 17
- E kore hoki tetahi mea i hunā, e mahue te whakakite; e kore ano hoki tetahi mea i ngaro, e mahue te mohio te puta mai hoki te māramatanga.
- 18
- Kia tupato ra ki to koutou whakarongo: ki te whai mea hoki tetahi, ka hoatu ano ki a ia; a ki te kahore he mea a tetahi, ko te mea i kiia nāna ake, ka tangohia i a ia.
- 19
- Na, ka haere mai ki a ia tona whaea me ona teina, a kihai ratou i ahei te tutuki atu ki a ia, na te mano hoki.
- 20
- Na, ka korerotia ki a ia, ka mea ratou, Tou whaea me ou teina te tu mai nei i waho, e mea ana kia kite i a koe.
- 21
- Na, ka whakahokia mai e ia, a ka mea ki a ratou, Ko toku whaea me oku teina enei, e rongo nei e mahi nei i te kupu a te Atua.
- 22
- A i tetahi o aua ra, ka eke ia ratou ko ana akonga ki te kaipuke: a ka mea ki a ratou, Tatou ka whakawhiti ki tera taha o te roto. Na, rere ana ratou.
- 23
- A i a ratou e rere ana, ka moe ia: na, ko te putanga mai o tetahi hau, he tupuhi, ki te roto; a ka tomo ratou, tata pu ki te tahuri.
- 24
- Na, ka haere mai ratou, ka whakaara i a ia, ka mea, E kara, e kara, ka mate tatou. Na, ka ara ia, a riria ana e ia te hau, me te ngaru o te moana: a mutu iho, na, kua marino.
- 25
- Na, ka mea ia ki a ratou, Kei hea to koutou whakapono? Mataku ana ratou, miharo ana, ka mea ki a ratou ano, Ko wai ra tenei, ka tapa nei ki nga hau ki te moana, a rongo rawa ki a ia?
- 26
- Na, ka rere atu ratou ki te whenua o nga Kararini, ki tawahi atu o Kariri.
- 27
- A, tona haerenga atu ki uta, ka tutaki ki a ia he tangata no te pa, he rewera ona no mua ke, kahore nei ona kakahu i kakahu ai, kihai ano hoki i noho i roto i te whare, engari ki nga urupa.
- 28
- A, tona kitenga i a Ihu, ka karanga, ka takoto ki tona aroaro, a he nui tona reo ki te mea mai, He aha ahau nāu, e Ihu, e te Tama a te Atua i runga rawa? E, kaua ra ahau e whakamamaetia.
- 29
- (Nāna hoki i mea ki te wairua poke kia puta mai i taua tangata. He maha hoki nga wa i hopukia ai ia e ia: a e tiakina ana ia, he mea here ki nga mekameka ki nga here waewae; heoi motumotuhia ana e ia nga here, a aia ana e te rewera ki te koraha.)
- 30
- Na, ka ui mai a Ihu ki a ia, ka mea, Ko wai tou ingoa? Ka mea ia, Ko Rihiona: he tokomaha hoki nga rewera i tomo ki roto ki a ia.
- 31
- Katahi ka inoi ratou ki a ia kia kaua ratou e tonoa e ia kia haere ki te hohonu.
- 32
- Na, kei reira ano tetahi kahui poaka, he maha, e kai ana i runga i te maunga: a ka inoi ratou ki a ia kia tukua ratou kia tomo ki aua poaka. A tukua ana ratou.
- 33
- A, te putanga mai o aua rewera i roto i te tangata, ka tomo atu ki roto ki nga poaka: na, ko te tino rerenga o te kahui ra te pari ki te moana, a paremo iho.
- 34
- Ano ka kite nga kai whangai i taua mea i meatia, ka whati, ka haere ka korero ki te pa, ki aua whenua hoki.
- 35
- Na, ka haere mai ratou kia kite i taua mea i meatia; a, to ratou taenga atu ki a Ihu, ka kite i te tangata i puta nei nga rewera i roto i a ia, kua oti te whakakakahu, kua tika ona whakaaro, e noho ana ki nga waewae o Ihu: a ka mataku ratou.
- 36
- A korerotia ana ki a ratou e te hunga i kite, te whakaoranga o te tangata i nga rewera.
- 37
- Na, ka mea te huihui katoa o nga kāinga patata o nga Kararini kia mawehe atu ia i a ratou; i mataku whakaharahara hoki ratou: a eke ana ia ki te kaipuke, hoki ana.
- 38
- Na, ka inoi ki a ia te tangata i puta nei nga rewera i roto i a ia, kia meinga hei hoa mona: heoi ka tono atu a Ihu i a ia, ka mea,
- 39
- Hoki atu ki tou whare, korerotia nga mea nui kua meinga nei e te Atua ki a koe. Na, haere ana ia, korerotia ana ki te pa katoa nga mea nui i mea ai a Ihu ki a ia.
- 40
- A ka hoki a Ihu, ka koa te mano ki tona taenga mai: e tatari ana hoki ratou katoa ki a ia.
- 41
- Na, ko te haerenga mai o tetahi tangata ko Hairuha te ingoa, he rangatira ano hoki ia no te whare karakia: a takoto ana ki nga waewae o Ihu, ka inoi ki a ia kia haere ki tona whare:
- 42
- Kotahi ano tana tamahine, he huatahi, kotahi nei tekau ma rua ona tau, a e whakahemohemo ana. Na, i tona haerenga, popō tonu nga mano ki a ia.
- 43
- Na, ko tetahi wahine e mate ana te pakaruhanga toto, tekau ma rua nga tau, a poto katoa tona oranga ki nga rata, kihai ano hoki i taea te whakaora e tetahi,
- 44
- Ka haere mai ia i muri, ka pa ki te taniko o tona kakahu: a mutu iho te rere o ona toto.
- 45
- Na, ka mea a Ihu, Ko wai tenei kua pa nei ki a au? Ano ka whakakahore katoa, ka mea a Pita ratou ko ona hoa, E kara, e pipiri ana nga mano ki a koe, e tutetute ana, a e mea ana oti koe, Ko wai tenei kua pa nei ki a au?
- 46
- Otira i mea ano a Ihu, Kua pa mai ano tetahi ki a au: e mahara ana hoki ahau kua puta atu he mana i a au.
- 47
- A, te kitenga o te wahine kihai ia i ngaro, haere wiri mai ana, takoto ana i tona aroaro, korerotia ana e ia ki a ia i te aroaro o te iwi katoa te mea i pa ai ia ki a ia, me te hohoro o tona oranga.
- 48
- Na, ka mea ia ki a ia, Kia maia, e ko: na to whakapono koe i ora ai; haere marie.
- 49
- I a ia ano e korero ana, ka haere mai tetahi i te whare o te rangatira o te whare karakia, ka mea ki a ia, Kua mate to tamahine; kaua e whakararua te Kai whakaako.
- 50
- A, te rongonga o Ihu, ka whakahokia mai e ia ki a ia, ka mea, Kaua e mataku: ko te whakapono ia kia whakapono, a ka ora.
- 51
- A ka tomo ia ki roto ki te whare, kihai tetahi tangata i tukua e ia kia tapoko, ko Pita anake, ko Hemi, ko Hoani, me te pāpā; raua ko te whaea o te kotiro.
- 52
- A e tangi ana ratou katoa, e aue ana mona. Na, ka mea ia, Kaua e tangi; kahore ia i mate, engari e moe ana.
- 53
- A kataina iho ia e ratou, i mohio hoki ratou kua mate ia.
- 54
- Otira ka oti katoa te pei e ia ki waho, ka mau ia ki tona ringaringa, ka karanga, ka mea, E ko, e ara.
- 55
- Na, hoki mai ana tona wairua, a whakatika tonu ake ia: na, ka mea ia kia hoatu he kai māna.
- 56
- A, miharo tonu ona mātua: na, ka whakatupato ia i a ratou kia kaua e korerotia taua meatanga ki tetahi.
Address: 
Phone: 
Email: