- 1
- Ano ka tata ratou ki Hiruharama ki Petapaki ki Petani, a ka tae ki maunga Oriwa, tokorua ana akonga i tonoa e ia,
- 2
- I mea ano ia ki a raua, Haere ki te kāinga e anga mai ana ki a korua: a tomo kau atu ki reira, ka kite i tetahi kuao e here ana, kahore ano kia nohoia e te tangata; wetekina, arahina mai.
- 3
- A ki te kī mai tetahi tangata ki a korua, He aha tenei ka meinga ai e korua? ka mea atu, E mea ana te Ariki ki a ia māna; na, ka tukua tonutia mai ki konei.
- 4
- Na, haere ana raua, a ka kitea te kuao e here ana ki te kuwaha i waho i te pekanga o te ara; a wetekina mai ana e raua.
- 5
- A ka mea mai etahi o te hunga e tu ana i reira ki a raua, He aha ta korua e wewete na i te kuao?
- 6
- Na, ka korerotia atu e raua ki a ratou ta Ihu i mea ai: a tukua mai ana raua e ratou.
- 7
- A ka arahina te kuao ki a Ihu, na, wharikitia ana o raua kakahu ki runga ki a ia; a noho ana ia i runga.
- 8
- Na, he tokomaha i whariki i o ratou kakahu ki te ara: ko etahi i kokoti i nga manga o nga rakau, a wharikitia ana ki te ara.
- 9
- Ko te hunga i haere i mua, me te hunga i haere i muri, i karanga, i mea, Ohana; Ka whakapaingia ia e haere mai ana i runga i te ingoa o te Ariki:
- 10
- Ka whakapaingia te rangatiratanga o to tatou matua o Rawiri, e haere mai ana i runga i te ingoa o te Ariki: Ohana i runga rawa.
- 11
- Na, ka tomo atu a Ihu ki Hiruharama, ki roto hoki ki te temepara: a tirotirohia iho e ia nga mea katoa, ko te wa hoki ia o te ahiahi, na, haere ana ia ratou tahi ko te tekau ma rua ki Petani.
- 12
- Na, i te aonga ake, i a ratou kua riro mai i Petani, ka hiakai ia:
- 13
- A, tona kitenga i tetahi piki i tawhiti, he rau ona, ka haere atu, me kore e kitea tetahi mea i runga: a, tona taenga atu, kihai i kitea e ia tetahi mea, he rau anake; ehara hoki i te po piki.
- 14
- Na, ka oho atu a Ihu, ka mea ki taua rakau, Kaua rawa te tangata e kai i tetahi hua ou ake tonu atu; me te whakarongo ano ana akonga.
- 15
- A ka tae mai ratou ki Hiruharama: na, te tomokanga atu o Ihu ki roto ki te temepara, ka anga ka pei ki waho i te hunga e hoko atu ana e hoko mai ana i roto i te temepara, a hurihia ake nga tepara o nga kai whakawhitiwhiti moni, me nga nohoanga o nga kai hoko kukupa;
- 16
- Kihai ano hoki i tukua kia kawea tetahi oko e te tangata ra te temepara.
- 17
- A i whakaako ia, i mea ki a ratou, Kahore koia i tuhituhia, Ka karangatia toku whare he whare inoi mo nga tauiwi katoa? otiia kua meinga nei e koutou hei ana mo nga kai pahua.
- 18
- A i rongo nga Karaipi me nga tohunga nui, a ka rapu ki te peheatanga e whakamatea ai ia: i mataku hoki ratou i a ia, no te mea i miharo te mano katoa ki tana ako.
- 19
- Ano ka ahiahi, ka haere atu ia ki waho o te pa.
- 20
- A i te atatu, i a ratou e haere atu ana, ka kite i te piki kua maroke ake i nga pakiaka.
- 21
- Na, ka mahara a Pita, a ka mea ki a ia, E te Kai whakaako, na, te piki i kangā ra e koe kua maroke.
- 22
- Na, ka whakahokia mai e Ihu, a ka mea ki a ratou, Kia mau te whakapono ki te Atua.
- 23
- He pono hoki taku e mea nei ki a koutou, Ki te mea tetahi ki tenei maunga, Kia rangā atu koe, kia whakatakā ki te moana; a e kore e ruarua tona ngakau, engari ka whakaponohia e ia te putanga mai o nga mea i kiia e ia; ka whiwhi ano ia ki tana i mea ai.
- 24
- Koia ahau ka mea nei ki a koutou, Ko nga mea katoa e tono ai koutou ina inoi, me whakapono ka riro i a koutou, a ka whiwhi koutou.
- 25
- A ka tu koutou ka karakia, ki te mea he take riri to koutou ki tetahi, murua: kia murua ai hoki o koutou hē e to koutou Matua i te rangi.
- 26
- Na, ki te kore koutou e muru, e kore ano hoki to koutou Matua i te rangi e muru i o koutou hē.
- 27
- Na, ka haere mai ano ratou ki Hiruharama: a i a ia e haereere ana i te temepara, ka haere mai ki a ia nga tohunga nui, me nga Karaipi, me nga kaumatua,
- 28
- A ka mea ki a ia, Tena, te mana i meatia ai enei mea e koe? na wai hoki tenei mana i hoatu ki a koe, i mea ai koe i enei mea?
- 29
- Na, ka whakahokia mai e Ihu, ka mea ki a ratou, Maku ano hoki e ui ki a koutou kia kotahi kupu, a ma koutou e whakahoki mai ki a au, katahi ka korerotia atu e ahau ki a koutou te mana i mea ai ahau i enei mea.
- 30
- Te iriiringa a Hoani, no te rangi, no nga tāngata ranei? korerotia mai ki a au.
- 31
- A ka korerorero ratou ki a ratou ano, ka mea, Ki te mea tatou, No te rangi; e mea mai ia, Ha, he aha koutou tē whakapono ai ki a ia?
- 32
- A ki te mea tatou, No nga tāngata; ka mataku ratou i te iwi: ki ta ratou katoa hoki he poropiti pono a Hoani.
- 33
- Na, ka whakahokia atu e ratou, ka mea ki a Ihu, Kahore matou e kite. Na, ko te whakahokinga mai a Ihu, ka mea ki a ratou, E kore ano hoki e korerotia e ahau ki a koutou te mana i mea ai ahau i enei mea.
Address: 
Phone: 
Email: