- 1
- I taua wa ano, ka haere mai nga akonga ki a Ihu, ka mea, Ko wai te nui rawa i te rangatiratanga o te rangi?
- 2
- Na, ka karangatia e Ihu tetahi tamaiti nohinohi, a whakaturia ana e ia ki waenganui i a ratou,
- 3
- Ka mea, He pono taku e mea atu nei ki a koutou, Ki te kore koutou e whakatahuritia, a e penei me nga tamariki nonohi, e kore koutou e tomo atu ki te rangatiratanga o te rangi.
- 4
- Na, ki te whakaiti tetahi i a ia, a ka rite ki tenei tamaiti nohinohi, ko ia te nui rawa i te rangatiratanga o te rangi.
- 5
- A ki te manako tetahi ki tetahi tamaiti nohinohi penei, he whakaaro hoki ki toku ingoa, e manako ana ki a au.
- 6
- Tena ko tenei, ka hē i tetahi tangata tetahi o enei mea nonohi e whakapono nei ki a au, nui ke te pai ki a ia me i whakawerewerea ki tona kakī te kohatu mira kaihe, me i pungaia ia ki te rire o te moana.
- 7
- Aue te mate mo te ao i nga take he! kua tino takoto rawa hoki he putanga mai mo nga take he; otiia aue te mate mo tera tangata e puta mai ai te take he!
- 8
- Ki te hē koe i tou ringa, i tou waewae ranei, poutoa, makā atu: he nui ke hoki te pai ki a koe kia kopa koe, kia ringa mutu, ina tomo atu ki te ora, a kia kore e makā atu ki te ahi kā tonu me nga ringaringa e rua me nga waewae e rua.
- 9
- Ki te hē hoki koe i tou kanohi, hikarohia, makā atu: he nui ke hoki te pai ki a koe kia kotahi tou kanohi, ina tomo atu ki te ora, a kia kore koe e makā atu ki te kapura o te reinga me te mau ano nga kanohi e rua.
- 10
- Kia mahara kei whakahawea koutou ki tetahi o enei mea nohinohi; ko taku kupu hoki tenei ki a koutou, E titiro tonu ana o ratou anahera i te rangi ki te kanohi o toku Matua i te rangi.
- 11
- I haere mai hoki te Tama a te tangata ki te whakaora i te mea i ngaro.
- 12
- Ka pehea to koutou whakaaro? ki te mea he rau nga hipi a tetahi tangata, a ka kotiti ke tetahi o ratou, e kore ianei e waiho e ia nga tekau e iwa ma iwa, ka haere ma runga i nga maunga, rapu ai i te mea i kotiti ke?
- 13
- A ki te kitea e ia, he pono taku e mea atu nei ki a koutou, tera atu tona hari ki taua hipi, i te hari ki nga tekau e, iwa, ma iwa kihai i kotiti ke.
- 14
- Waihoki kahore he ngakau o to koutou Matua i te rangi, kia ngaro tetahi o enei mea nonohi.
- 15
- A ki te hara tou teina ki a koe, haere, korerotia atu tona hara ki a ia, korua anake: ki te whakarongo ia ki a koe, ka riro mai i a koe tou teina.
- 16
- A ki te kore ia e whakarongo, kawea atu hei hoa mou kia kotahi kia tokorua ranei, kia mau ai nga kupu katoa i nga mangai o nga kai whakarongo tokorua tokotoru ranei.
- 17
- A ki te pake ia ki a raua, korerotia atu ki te hahi: a ki te pake ano hoki ia ki te hahi, me waiho e koe hei tau tangata, hei pupirikana.
- 18
- He pono taku e mea atu nei ki a koutou, Ko ā koutou e here ai i te whenua e herea ano ki te rangi: a ko ā koutou e wewete ai i te whenua e wetekia ano ki te rangi.
- 19
- Tenei ano taku kupu ki a koutou, Ki te mea ka tokorua o koutou e rite tahi ana nga whakaaro i te whenua mo tetahi mea e inoi ai raua, e meinga ano mo raua e toku Matua i te rangi.
- 20
- Na te wahi e whakaminea ai te hunga tokorua tokotoru ranei, he whakaaro ki toku ingoa, kei reira ahau kei waenganui i a ratou.
- 21
- Katahi ka haere mai a Pita ki a ia, ka mea, E te Ariki, kia hia nga haranga a toku teina ki a au, me taku whakarere noa iho i tona hara? kia whitu?
- 22
- Ka mea mai a Ihu ki a ia, E kore ahau e mea atu ki a koe, Kia whitu: engari, Kia whitu tekau whitu.
- 23
- Koia i whakaritea ai te rangatiratanga o te rangi ki tetahi kingi, i mea kia korerotia ki a ia ana moni e ana pononga.
- 24
- A ka timata ia te ui, ka kawea mai ki a ia he tangata, tekau nga mano taranata i a ia.
- 25
- A tē whai rawa ia hei utu, ka mea tona ariki kia hokoa ia, tana wahine, me āna tamariki, me ana taonga katoa, hei whakautu.
- 26
- Na, ka tapapa iho taua pononga, ka koropiko ki a ia, ka mea, E te ariki, kia ata hanga ki a au, a ka utua katoatia e ahau ki a koe.
- 27
- Na, ka oho i te aroha te ariki o taua pononga, tuku ana i a ia, a whakarerea noatia iho e ia ana moni tarewa.
- 28
- Heoi, te putanga atu o taua pononga ki waho, ka kite i tetahi o ona hoa pononga, kotahi rau ana pene i a ia: na, hopukia ana e ia, a notia iho te kakī, me te ki atu ano, Utua mai taku nama.
- 29
- Heoi, tapapa iho ana tona hoa pononga ki ona waewae, ka inoi ki a ia, ka mea, Kia ata hanga ki a au, a ka utua katoatia e ahau ki a koe.
- 30
- A kihai ia i pai: heoi haere ana, maka ana i a ia ki te whare herehere, kia utua katoatia ra ano te nama.
- 31
- Na, te kitenga o ona hoa pononga i taua meatanga, nui atu to ratou pouri, a haere ana, whakaaturia mai ana ki to ratou ariki mea katoa i meatia.
- 32
- Katahi ka karanga tona ariki ki a ia, ka mea ki a ia, Pononga kino, i whakarerea noatia e ahau taua moni tarewa katoa i a koe, nāu hoki i inoi mai ki a au:
- 33
- Ehara oti i te tika kia tohungia e koe tou hoa pononga, me ahau hoki i tohu i a koe?
- 34
- Na, ka riri tona ariki, a tukua ana ia ki nga kai whakamamae, kia utua katoatia, ra ano tana nama.
- 35
- Tera, ano e pera toku Matua i te rangi ki a koutou, ki te kore e whakarerea noatia atu i roto i o koutou ngakau nga he a te teina o tenei o tenei o koutou.
Address: 
Phone: 
Email: