- 1
- Me i reira ka korero a Ihu ki te mano, ki āna akonga ano hoki,
- 2
- Ka mea, Kei te nohoanga o Mohi nga Karaipi ratou ko nga Parihi e noho ana:
- 3
- Nga mea katoa e mea ai ratou hei pupuri ma koutou, puritia, mahia; kei rite ia a koutou mahi ki ā ratou mahi: ta ratou hoki he korero, kahore he mahi.
- 4
- E hereherea ana hoki e ratou nga wahanga taimaha, he nanakia me ka pikaua, a whakawahā iho ki runga ki nga pokihiwi o nga tāngata; heoi kahore ratou e pai kia whakakorikoria ki tetahi o o ratou maihao.
- 5
- Ko a ratou mahi katoa e meatia ana hei matakitakinga ma nga tāngata: e whakawhanuitia ana e ratou a ratou pairakere, e whakanuia ana ano hoki nga taniko o o ratou kakahu;
- 6
- Ko ta ratou e rawe ai ko nga nohoanga rangatira i nga hakari, me nga nohoanga rangatira i nga whare karakia,
- 7
- Me nga ohatanga i nga kāinga hoko, kia karangatia ano hoki e nga tāngata, E rapi, E rapi.
- 8
- Otiia aua koutou e karangatia, E rapi: kotahi hoki to koutou kai arahi, ko te Karaiti; a he tua kana he teina koutou katoa.
- 9
- Kaua ano hoki tetahi e karangatia hei matua mo koutou i runga i te whenua: kotahi hoki to koutou Matua, ko tera i te rangi.
- 10
- Aua ano hoki koutou e karangatia he kai arahi: kotahi ano hoki to koutou kai arahi, ko te Karaiti.
- 11
- Ko te nui rawa hoki o koutou, hei kai mahi ia ma koutou.
- 12
- Ki te whakahira hoki tetahi i a ia, ka whakaititia; a ki te whakaiti tetahi i a ia, ka whakahirangia.
- 13
- Aue te mate mo koutou, e nga Karaipi, e nga Parihi, e te hunga tinihanga! e paia ana hoki e koutou te rangatiratanga o te rangi ki te aroaro o nga tāngata: kahore koutou e tomo, kahore ano hoki e tukua te hunga e tomo ana kia tapoko atu.
- 14
- Aue te mate mo koutou, e nga Karaipi, e nga Parihi, e te hunga tinihanga! no te mea ka pau i a koutou nga whare o nga pouaru, a e inoi roa ana, he ahua kau: mo reira ra he nui rawa te mate e pa ki a koutou.
- 15
- Aue te mate mo koutou, e nga Karaipi, e nga Parihi, e te hunga tinihanga! e taiawhiotia ana hoki e koutou te moana me te whenua, whakaporohiraiti ai i tetahi, ano ka riro mai, ka meinga ia e koutou hei tamaiti mo te reinga kino noa atu i a koutou.
- 16
- Aue te mate mo koutou, e nga kai arahi matapo, e mea nei, Ki te oatitia te whare tapu e tetahi, he mea noa ano; otira ki te oatitia e tetahi te koura o te whare tapu, ka mau tāna!
- 17
- E nga kuare, e nga matapo: ko tehea te mea nui, ko te koura, ko te whare tapu ranei i tapu ai te koura?
- 18
- A, Ki te oatitia e tetahi te āta, he mea noa ano: otira ki te oatitia te whakahere i runga i te āta, ka mau tāna.
- 19
- E nga kuare,e nga matapo, ko tehea te mea nui, ko te whakahere, ko te āta ranei i tapu ai te whakahere?
- 20
- Na, ki te oatitia e tetahi te āta, e oatitia ana e ia tera mea, me nga mea katoa i runga.
- 21
- A, ki te oatitia e tetahi te whare tapu, e oatitia ana e ia tera mea, me te kai noho o roto.
- 22
- A, ki te oatitia e tetahi te rangi, e oatitia ana e ia te torona o te Atua, me te kai noho o runga.
- 23
- Aue te mate mo koutou, e nga Karaipi, e nga Parihi, e te hunga tinihanga! e hoatu ana hoki e koutou te wahi whakatekau o te miniti, o te anihi, o te kumine, a kapea ake nga mea nui o te ture, te whakawa, te tohu tangata, te whakapono: e tika ana ano kia meatia enei, a kia kaua era e kapea.
- 24
- E nga kai arahi matapo, e tātari nei i te waeroa, a horongia ake te kamera.
- 25
- Aue te mate mo koutou, e nga Karaipi, e nga Parihi, e te hunga tinihanga! e horoi nei i waho o te kapa, o te pereti, ko roto ia e kī ana i te pahua, i te taikaha.
- 26
- E te Parihi matapo, mātua horoia a roto o te kapa, o te pereti, kia ma ai ano hoki a waho o aua mea.
- 27
- Aue te mate mo koutou, e nga Karaipi, e nga Parihi, e te hunga tinihanga! e rite ana hoki koutou ki nga urupa kua oti te pani ki te paru ma, he mea ataahua nei a waho ki te titiro atu, ko roto ia kī tonu i nga iwi tupapaku, me nga mea poke katoa.
- 28
- Me koutou ano hoki, ko waho te tika ana ki ta te tangata titiro, ko roto ia e kī ana i te tinihanga, i te kino.
- 29
- Aue te mate mo koutou, e nga Karaipi, e nga Parihi, e te hunga tinihanga! ko koutou nei hoki hei hanga i nga tanumanga, o nga poropiti, hei whakapaipai i nga urupa o nga tāngata tika,
- 30
- A e mea ana, Me he mea i nga ra tatou o o tatou mātua, kihai tatou i uru tahi me ratou ki te whakaheke i te toto o nga poropiti.
- 31
- Na, ka whakaatu nei koutou i a koutou ano, ko koutou nga tamariki a te hunga nana i patu nga poropiti.
- 32
- Tena ra, kia kī i a koutou te mehua a o koutou mātua.
- 33
- E nga neke, e te uri nakahi, me aha ka rere ai koutou i te ki tuku ki te reinga?
- 34
- Na, tenei au te tono nei i nga poropiti ki a koutou, i nga tāngata mahara, me nga Karaipi: a ko etahi o ratou e whakamatea e koutou, e ripekatia; ko etahi o ratou e whiua i roto i o koutou whare karakia, e whāia hoki i tetahi pa ki tetahi pa:
- 35
- A ka utaina ki a koutou nga toto katoa o te hunga tika i whakahekea ki te whenua, no te toto o Apera, o te tangata tika, a tae noa ki te toto o Hakaraia, o te tama a Parakaia, i kohurutia e koutou i te takiwa o te whare tapu o te āta.
- 36
- He pono taku e mea atu nei ki a koutou, Tera e pa mai enei mea katoa ki tenei whakatupuranga.
- 37
- E Hiruharama, e Hiruharama, e whakamate nei i nga poropiti, e aki nei ki te kamaka i te hunga e tonoa ana ki a koe, ano te tini o aku meatanga kia whakaminea o tamariki, kia peratia me te heihei e whakamine nei i ana pi ki raro i ona parirau, a kihai koutou i pai!
- 38
- Na, ka mahue atu ki a koutou to koutou whare kia takoto noa ana.
- 39
- Ko taku kupu hoki tenei ki a koutou, E kore koutou e kite i a au a mua ake nei, kia mea ra ano koutou, Ka whakapaingia ia e haere mai ana i runga i te ingoa o te Ariki.
Address: 
Phone: 
Email: