- 1
- Na, ka rite te rangatiratanga o te rangi ki nga wahina kotahi tekau, i mau i a ratou rama, a haere ana ki te whakatau i te tāne marena hou;
- 2
- A tokorima o ratou he hunga mahara, tokorima he kuare.
- 3
- Te hunga kuare i mau i a ratou rama, a kihai i mauria he hinu:
- 4
- Te hunga mahara ia i mau hinu atu i roto i a ratou ipu me a ratou rama.
- 5
- Ka whakaroa te tāne marena hou, ka tunewha ratou katoa, ka moe.
- 6
- A i waenganui po ka pa te karanga, E, ka puta te tāne marena hou; haere atu ki te whakatau i a ia.
- 7
- Katahi ka ara katoa aua wahina, ka whakapai i a ratou rama.
- 8
- Na, ko te meatanga atu a te hunga kuare ki te hunga mahara, Homai ki a matou tetahi wahi o ta koutou hinu: kua pirau hoki a matou rama.
- 9
- Na, ko te whakahokinga mai a te hunga mahara, ka mea, Kahore; kei kore e ranea ma matou ma koutou: engari me haere koutou ki nga kai hoko, hoko ai i tetahi ma koutou.
- 10
- A, to ratou haerenga atu ki te hoko, ka tae mai te tāne marena hou; a tomo tahi atu ana me ia ki te marenatanga te hunga kua ata rite: a tutakina ana te tatau.
- 11
- Muri iho ka tae mai era wahina, ka mea, E te Ariki, e te Ariki, uakina ki a matou.
- 12
- Na, ka whakahokia mai a ia, a ka mea, He pono taku e mea atu nei ki a koutou, Kahore ahau e mohio ki a koutou.
- 13
- Kia mataara rapea koutou, e kore hoki koutou e mohio ki te ra ki te haora, e puta mai ai te Tama a te tangata.
- 14
- E rite ana hoki ki te tangata e haere atu ana ki tawhiti, a karangatia ana e ia ana pononga ake, a hoatu ana ki a ratou ana taonga.
- 15
- Ki tetahi i hoatu e ia e rima taranata, ki tetahi e rua, ki tetahi kotahi; ki ia tangata ki ia tangata he mea whakarite ki to ratou uaua; a haere tonu ana ia.
- 16
- Na, ko te haerenga o te tangata i a ia nei nga taranata e rima, hokohokona ana aua mea e ia, a riro mai ana i a ia e rima atu nga taranata.
- 17
- Pera tonu hoki te tangata i nga mea e rua; e rua atu i riro mai i a ia.
- 18
- Te tangata ia i te mea kotahi haere ana, kei te keri ki te whenua, a hunā ana e ia te moni a tona ariki.
- 19
- A, roa rawa iho ka puta te ariki o aua pononga, ka korerotia ana moni e ratou ki a ia.
- 20
- Na, te haerenga mai o te tangata i a ia nei nga taranata e rima, e rima atu nga taranata i mauria mai e ia, a ka mea, E te ariki, e rima au taranata i homai ai ki a au: na, e rima atu nga taranata kua riro mai i a au hei tapiri mo era.
- 21
- Ka mea tona ariki ki a ia, Pai rawa, e te pononga pai, e te pononga pono; pono tonu to mahi ki nga mea ruarua, maku koe e mea hei rangatira mo nga mea maha: uru mai koe ki te hari o tou ariki.
- 22
- Me ia ano hoki i a ia nei nga taranata e rua, na, ka haere mai, ka mea, E te ariki, e rua au taranata i homai ai ki a au: na, e rua atu nga taranata kua riro mai i a au hei tapiri mo era.
- 23
- Ka mea tona ariki ki a ia, Pai rawa, e te pononga pai, e te pononga pono; pono tonu to mahi ki nga mea ruarua, maku koe e mea hei rangatira mo nga mea maha: uru mai koe ki te hari o tou ariki.
- 24
- Na, te haerenga mai o te tangata i a ia nei te taranata kotahi, ka mea, E te ariki, i mātau ahau ki a koe he tangata pakeke koe, e kokoti ana i te wahi kihai i ruia e koe, e kohikohi ana i te wahi kihai i whakatitaria e koe:
- 25
- Na, ka wehi ahau, a haere ana, huna ana i to taranata ki te whenua: na, tau ra.
- 26
- Na, ko te whakahokinga atu a tona ariki, ka mea ki a ia, Pononga kino, pononga mangere, i mātau koe e kokoti ana ahau i te wahi kihai i ruia e ahau, e kohikohi ana i te wahi kihai i whakatitaria e ahau:
- 27
- I tika ano me i kawea e koe taku moni ki nga kai whakawhitiwhiti moni, a ka tae mai ahau, ka riro mai taku me ona hua ano.
- 28
- Ko tenei, tangohia te taranata i a ia, hoatu ki tera i nga taranata kotahi tekau.
- 29
- Ki te whai mea hoki tetahi, ka hoatu ano ki a ia, a ka maha atu ana: a ki te kahore he mea a tetahi, ko ana mea ake ka tangohia i a ia.
- 30
- A makā atu te pononga hua kore ki te pouritanga i waho: ko te wahi tera o te tangi me te teteatanga o nga niho.
- 31
- A te taenga mai o te Tama a te tangata me tona kororia, ratou tahi ko nga anahera tapu katoa, ko reira ia noho ai ki runga ki te torona o tona kororia:
- 32
- A ka whakaminea ki tona aroaro nga iwi katoa: a e wehea ratou e ia etahi, ka peratia me te hepara e wehe nei nga hipi i nga koati:
- 33
- A ka whakaturia e ia nga hipi ki tona taha matau, me nga koati ki maui.
- 34
- Katahi te Kingi ka mea ki te hunga i tona taha matau, Haere mai, e te hunga whakapai a toku Matua, nohoia te rangatiratanga kua rite noa ake mo koutou no te orokohanganga ra ano o te ao:
- 35
- I mate hoki ahau i te hiakai, a whangainga ana ahau e koutou: i mate wai ahau, a whakainumia ana e koutou: he manene ahau, a whakamanuhiritia ana e koutou:
- 36
- I tu tahanga, a whakakakahuria ana e koutou: he turoro, a tirotirohia ana ahau e koutou: i te whare herehere ahau, a haere mai ana koutou ki a au.
- 37
- Na, ko te whakahokinga mai a te hunga tika ki a ia, ka mea, E te Ariki, nonahea matou i kite ai i a koe e hiakai ana, a whangai ana i a koe? e mate ana ranei i te wai, a whakainu ana i a koe?
- 38
- Nonahea matou i kite ai i a koe e manene ana, a whakamanuhiri ana i a koe? e tu tahanga ana ranei, a whakakakahu ana i a koe?
- 39
- A nonahea matou i kite ai i a koe e turoro ana, i te whare herehere ranei, a haere atu ana ki a koe?
- 40
- Ko reira whakahokia atu ai e te Kingi, a ka mea ki a ratou, He pono taku e mea nei ki a koutou, Ko ta koutou i mea ai ki tetahi o aku teina iti rawa nei, he meatanga ia ki a au.
- 41
- Ko reira ia ki atu ai ki te hunga i te taha ki maui, Mawehe atu i a au, e te hunga ka oti nei te kanga, ki te ahi kā tonu, kua kā noa ake nei mo te rewera ratou ko ana anahera:
- 42
- I mate hoki ahau i te hiakai, a kihai i whangainga e koutou: i mate i te wai, a kihai i whakainumia e koutou:
- 43
- He manene ahau, a kihai i whakamanuhiritia e koutou: i tu tahanga, a kihai i whakakakahuria e koutou: he turoro ahau, i te whare herehere, a kihai koutou i tirotiro i a au.
- 44
- Ko reira ano hoki ratou whakahoki mai ai ki a ia, mea ai, E te Ariki, nonahea matou i kite ai i a koe e mate hiakai ana, e mate wai ana, e manene ana, e tu tahanga ana, e turoro ana, i te whare herehere ranei, a kihai i mahia he mea māu?
- 45
- Ko reira whakahokia ai e ia ki a ratou, a ka mea, He pono taku e mea atu nei ki a koutou, I te mea kihai nei i meatia e koutou ki tetahi o nga nonohi rawa nei, ina, kihai i meatia ki a au.
- 46
- Na, ko enei e haere ki te whiunga mutunga kore: ko te hunga tika ia ki te ora tonu.
Address: 
Phone: 
Email: