- 1
- Na, ka eke ia ki te kaipuke, ka whiti ki tawahi, ka haere ki tona pa.
- 2
- Na, ka kawea mai e ratou ki a ia tetahi para ru tiki, e takoto ana i runga i te moenga; a, te kitenga o Ihu i to ratou whakapono, ka mea ia ki te para ru tiki, E tama, kia maia; ka oti ou hara te muru.
- 3
- Na, ka mea etahi o nga Karaipi ki a ratou ano, E kohukohu ana tenei tangata.
- 4
- A ka kite a Ihu i o ratou whakaaro, ka mea ia, He aha i kino ai nga whakaaro o roto o o koutou ngakau?
- 5
- Ko tehea hoki te mea takoto noa, ko te mea, Ka oti ou hara te muru; ko te mea ranei, Whakatika, haere?
- 6
- Otira kia mātau ai koutou, he mana muru hara to te Tama a te tangata i runga i te whenua, (katahi ia ka mea atu ki te para ru tiki,) Whakatika, tangohia ake tou moenga, a haere ki tou whare.
- 7
- Na, whakatika ana ia, haere ana ki tona whare.
- 8
- A, te kitenga o nga tāngata, ka miharo, ka whakakororia i te Atua i homai ai tenei mana ki nga tāngata.
- 9
- A i a Ihu e haere ana i reira, ka kite ia i tetahi tangata, ko Matiu te ingoa, e noho ana i te whare tango moni; a ka mea ki a ia, Arumia mai au. Na, whakatika ana ia, aru ana i a ia.
- 10
- A i a ia e noho ana i roto i te whare, na, he tokomaha nga pupirikana me nga tāngata hara i haere mai, i noho tahi ki a Ihu ratou ko ana akonga.
- 11
- A te kitenga o nga Parihi, ka mea ki ana akonga, He aha to koutou Kai whakaako ka kai tahi ai me nga pupirikana me nga tāngata hara?
- 12
- Otira ka rongo a Ihu, ka mea ki a ratou, Kahore he aha o nga tāngata ora e meatia ai e te rata, engari o te hunga e mate ana.
- 13
- Na, haere koutou, akona te tikanga o tenei, Ko tāku e pai ai ko te tohu tangata, haunga te patunga tapu: kihai hoki ahau i haere mai ki te karanga i te hunga tika, engari i te hunga hara, kia ripeneta.
- 14
- Me i reira ka haere mai ki a ia nga akonga a Hoani, ka mea, He aha i maha ai o matou ko nga Parihi nohoanga pukutanga, a kahore o akonga e noho puku?
- 15
- Na, ko te meatanga a Ihu ki a ratou, E ahei ranei nga tamariki o te whare marena te tangi, i te mea kei a ratou te tāne marena hou? Na, tera e tae mai nga ra, e tangohia ai te tāne marena hou i a ratou, a ko reira noho puku ai ratou.
- 16
- E kore e makā, e te tangata tetahi wahi o te kahu hou hei papaki mo te kahu tawhito, no te mea ka riro tetahi wahi o taua kakahu i te whakakapi, a ka nui rawa te pakaru.
- 17
- E kore ano hoki e ringihia te waina hou ki roto ki nga ipu tawhito: kei pakaru nga ipu, a ka maringi te waina, kore ake nga ipu: erangi e ringihia ana te waina hou ki roto ki nga ipu hou, a ka ora e rua e rua.
- 18
- I a ia e korero ana i enei mea ki a ratou, na, ka haere mai tetahi rangatira, ka koropiko ki a ia, ka mea, Tenei kua marere taku tamahine: otira māu e haere ake, e whakapa tou ringa, ki a ia, a ka ora.
- 19
- Na, ka whakatika a Ihu ratou ko ana akonga, a aru ana i a ia.
- 20
- Na, ko te haerenga mai ki muri i a ia o tetahi wahine, tekau ma rua nga tau i mate ai i te pakaruhanga toto, a pa ana ki te taniko o tona kakahu:
- 21
- I mea hoki i roto i a ia, Kia pa kau atu ahau ki tona kakahu, ka ora ahau.
- 22
- Na, ka tahuri a Ihu, a ka kite i a ia, ka mea, Kia maia, e ko; na to whakapono koe i ora ai. A ora ake te wahine i taua wa ano.
- 23
- A, te taenga atu o Ihu ki roto ki te whare o te rangatira, a ka kite i nga kai whakatangi putorino me nga tāngata e ngangau ana,
- 24
- Ka mea ia ki a ratou, Whakaatea: kahore hoki i mate te kotiro, erangi e moe ana. A kataina iho ia e ratou.
- 25
- Heoi ka oti nga tāngata te pei ki waho, ka tomo atu ia ki roto, ka mau ki tona ringa, a ara ake ana te kotiro.
- 26
- A pakū ana tenei rongo puta noa i taua whenua.
- 27
- A i a Ihu e haere atu ana i reira, tokorua nga matapo i aru i a ia, ka karanga ake, ka mea, E te tama a Rawiri, kia aroha mai ki a maua.
- 28
- A ka tapoko ia ki te whare, ka haere mai nga matapo ki a ia: na, ka mea a Ihu ki a raua, E whakapono ana ranei korua e taea tenei e ahau? Ka mea mai raua ki a ia, Ae, e te Ariki.
- 29
- Me i reira ka pa ia ki o raua kanohi, ka mea, Kia rite ki to korua whakapono te meatanga ki a korua.
- 30
- Na, kua kite o raua kanohi; katahi ka whakatupato a Ihu i a raua, ka mea, Kia mahara kei rangona e te tangata.
- 31
- Ko raua ia, te putanga atu ki waho, korerotia nuitia ana ia puta noa i taua whenua.
- 32
- I to raua haerenga atu, na, ka kawea mai ki a ia tetahi tangata wahangu, he rewera tona.
- 33
- A ka oti te rewera te pei, ka whai reo te wahangu; a miharo ana te mano, ka mea, Kahore ano i kitea te penei i roto i a Iharaira.
- 34
- Otira ka mea nga Parihi, Na te rangatira o nga rewera tāna peinga rewera.
- 35
- Na, ka haereerea e Ihu nga pa katoa me nga kāinga koraha, a ka ako, i roto i o ratou whare karakia, ka kauwhau i te rongo pai o te rangatiratanga, me te whakaora i te tini o nga mate, me te tini o nga turorotanga o te iwi.
- 36
- A, tona kitenga i nga mano, ka toko ake tona ngakau aroha ki a ratou, e mauiui ana hoki ratou, e marara ke ana, me he hipi hepara kore.
- 37
- Katahi ia ka mea ki ana akonga, Ko te kotinga e nui ana, ko nga kai mahi e ruarua ana;
- 38
- Na, inoi atu ki te Ariki nāna te kotinga, kia tonoa mai e ia he kai mahi ki tana kotinga.
Address: 
Phone: 
Email: