- 1
- Aue te mate i a au! e rite ana hoki ahau ki nga kohikohinga o nga hua raumati, ki nga hamunga i te mea e whawhaki karepe ana: kahore he tautau hei kai: hiahia tonu toku wairua ki te hua matamua.
- 2
- Ka ngaro atu te tangata tapu i runga i te whenua: kahore hoki he tangata tika i roto i nga tangata; ratou katoa kei te whanga toto, e whaia ana e ratou tona hoa, tona hoa, ki te kupenga.
- 3
- E mahia marietia ana te kino e o ratou ringaringa, me te tono utu ano te rangatira raua ko te kai whakarite whakawa; te tangata nui ano hoki kei te korero i te mea nanakia a tona wairua: na, whiria ake e ratou.
- 4
- Te tangata pai o ratou, rite tonu ki te tumatakuru: te mea tika, ano he taiepa tataramoa: kei te haere mai te ra o o tutei, te ra e whiua ai koe, ko aianei ratou pokaikaha ai.
- 5
- Kaua e whakapono ki te hoa, kaua e whakawhirinaki ki te kai arahi: kaiponuhia nga tatau o to mangai ki te wahine e takoto ana i to uma.
- 6
- E whakahawea ana hoki te tamaiti ki te pāpā, e whakatika mai ana te kotiro ki tona whaea, te hunaonga ki tona hungawai wahine, nga hoa riri o te tangata ko nga tangata o tona whare.
- 7
- Ko au ia ka titiro atu ki a Ihowa, ka tatari ahau ki te Atua o toku whakaoranga: tera toku Atua e whakarongo ki a au.
- 8
- Kei koa mai ki a au, e toku hoa riri; ki te hinga ahau, ka ara ano ahau; ki te noho ahau i te pouri, ko Ihowa hei whakamārama moku.
- 9
- Ka wāha e ahau te riri a Ihowa, kua hara nei hoki ahau ki a ia, kia tohea ra ano e ia taku tohe, kia whakaritea ra ano e ia taku whakawa: ka whakaputaina atu ahau e ia ki waho ki te māramatanga, a ka kite ahau i tona tika.
- 10
- E kite toku hoa riri, a ka taupokina e te whakama, tera i ki mai ra ki a au, Kei hea a Ihowa tou Atua? e kite oku kanohi i taua wahine: akuanei ia takahia ai, peratia ai me te paru o nga huarahi.
- 11
- I te ra e hangā ai o taiepa, i taua rangi ano ka matara atu te tikanga i whakatakotoria.
- 12
- I taua rangi ka haere mai ia, tae tonu mai ki a koe i Ahiria, i nga pa taiepa ano hoki, i te pa taiepa ano tae noa ki te awa, i tetahi moana ki tetahi moana, i tetahi maunga ki tetahi maunga.
- 13
- Ka ururuatia ano ia te whenua, he mea na ona tangata, mo nga hua hoki o a ratou mahi.
- 14
- Whangaia ki to rakau to iwi, nga hipi o to kāinga tupu e noho mokemoke nei i te ngahere i waenganui o Karamere: kia kai ratou ki Pahana, ki Kireara, kia pera me nga rangi o mua.
- 15
- Ka rite ki nga rangi i haere mai ai koe i te whenua o Ihipa, ka whakakitea e ahau nga mea whakamiharo ki a ia.
- 16
- Ka kite nga iwi, a ka whakama ki to ratou marohirohi katoa: ka kopania te mangai ki te ringaringa, o ratou taringa turi tonu.
- 17
- Ka mitimiti ratou i te puehu, ano he nakahi, ka oho mai ratou i roto i o ratou rua, ano ko nga toke o te whenua; ka wehi ratou ki a Ihowa ki to tatou Atua, ka mataku ano hoki ki a koe.
- 18
- Ko wai te Atua hei rite mou? e murua ana hoki e ia te he, e whakarerea noatia ana hoki e ia te pokanga ketanga a nga morehu o tona wahi tupu? E kore ia e kawe riri a ake ake ake, e ngakau nui ana hoki ia ki te tohu tangata.
- 19
- Tera ia e tahuri, ka aroha ia ki a tatou, ka pehia e ia o tatou kino, ka pangā ano e koe o ratou hara ki nga rire o te moana.
- 20
- Ka whakamanā e koe tau ki a Hakopa, te aroha ki a Aperahama, tau i oati ai ki o matou mātua i nga rangi o mua.
Address: 
Phone: 
Email: