- 1
- A, te rongonga o Hanaparata, ko Topia, ko Keheme Arapi, ko era atu ano hoki o o matou hoa riri, kua hangā e ahau te taiepa, a kahore he wahi pakaru i mahue: kahore ano ia kia oti noa i a au nga tatau te whakatu ki nga kuwaha.
- 2
- Na ka unga tangata mai a Hanaparata raua ko Keheme ki a au, ka mea, Haere mai, tatou ka komiti ki tetahi o nga pa ririki i te mānia i Ono: i mea hoki raua kia meatia mai he hē ki a au.
- 3
- Katahi ahau ka unga tangata atu hei ki atu, He nui te mahi e mahi nei ahau; e kore e ahei kia heke atu ahau. Kia whakamutua hei aha te mahi? ka whakarerea nei hoki e ahau, ki te heke atu ahau ki a korua?
- 4
- Na, e wha a raua tononga tangata mai ki a au, ko taua tikanga na ano; heoi whakahokia atu ana e ahau ko aua kupu ra ano ki a raua.
- 5
- Katahi a Hanaparata ka unga mai i tana tangata ki a au, ko te rima ia o nga ngarenga mai, ko taua tikanga ano hoki, he pukapuka tuwhera ano kei roto i tona ringa.
- 6
- Ko te mea tenei i tuhituhia ki taua pukapuka, Kua paku te rongo ki nga tauiwi, a, e ki ana a Kahamu, tenei koutou ko nga Hurai te mea nei kia whakakeke: koia i hangā ai e koe te taiepa, kia meinga ai koe hei kingi mo ratou; ko ta nga korero hoki tenei.
- 7
- Kua whakaturia ano hoki e koe etahi poropiti hei karanga i a koe ki Hiruharama, hei ki, Kua whai kingi a Hura. Na, ka whakaaturia atu enei kupu ki te kingi. Tena, haere mai, kia korerorero taua.
- 8
- Katahi ahau ka unga tangata atu ki a ia, hei ki atu, Ehara kau enei mea kua korerotia mai na e koe; he mea tito noa hoki na tou ngakau ake.
- 9
- Ta ratou katoa hoki, he whakawehi i a matou; i mea ratou, Tera o ratou ringaringa e whakawarea ki te mahi, e kore ai e mahia. Na, e te Atua, whakakahangia oku ringaringa.
- 10
- Katahi ahau ka haere ki te whare o Hemaia tama a Teraia, tama a Mehetapeere, he mea tutaki hoki ia ki roto; a ka mea ia, Kia runanga tatou ki te whare o te Atua ki roto i te temepara, kia tutakina hoki e tatou nga tatau o te temepara; tera hoki ratou e haere mai ki te patu i a koe; ina, ko a te po ratou haere mai ai ki te patu i a koe.
- 11
- Na, ko taku meatanga atu, Tera ranei e oma te tangata e rite ana ki a au nei? ko wai hoki o te hunga e rite ana ki a au e haere ki roto ki te temepara, kia ora ai. E kore ahau e tae.
- 12
- Katahi ahau ka mahara iho ehara ia i te mea unga mai na te Atua, heoi hei he moku tana kupu i poropiti ai: he mea utu hoki ia na Topia raua ko Hanaparata.
- 13
- I utua ai ia, kia wehi ai ahau, a ka pera, ka hara; kia whai mea ai ratou hei ingoa kino, hei tawainga ma ratou ki a au.
- 14
- Kia mahara, e toku Atua, ki a Topia raua ko Hanaparata, ki enei mahi raua, ki a Noaria ki te poropiti wahine, ki era atu ano hoki o nga poropiti i mea nei ki te whakawehi i a au.
- 15
- Na, kua oti te taiepa i te rua tekau ma rima o Eruru; e rima tekau ma rua nga ra.
- 16
- A, te rongonga o o matou hoa riri katoa, te kitenga o nga tauiwi i tetahi taha o matou, i tetahi taha, te tino hokinga iho o o ratou whakaaro: i kite hoki ratou he mea mahi tenei mahi e to matou Atua.
- 17
- He tini ano hoki nga pukapuka a nga rangatira o Hura i aua ra i tae ki a Topia, me ā Topia ano hoki i tae mai ki a ratou.
- 18
- He tokomaha hoki i Hura i oati ki a ia; he hunaonga hoki ia ko Hekania tama a Araha; a, i tango ano tana tama a Iehohanana i te tamahine a Mehurama tama a Perekia.
- 19
- I korerotia mai ano hoki e ratou ana mahi pai ki toku aroaro: i kawea ano e ratou aku kupu ki a ia. Heoi tukua mai ana e Topia etahi pukapuka hei whakawehi i a au.
Address: 
Phone: 
Email: