- 1
- I te rua tekau ma wha o nga ra o tenei marama ka huihui mai nga tamariki a Iharaira, noho puku ana, he taratara ano hoki nga kakahu, he oneone ano kei runga i a ratou.
- 2
- Na, ka wehea mai nga uri o Iharaira i roto i nga tangata ke katoa: tu ana ratou, whakina ana e ratou o ratou hara, me nga kino a o ratou mātua.
- 3
- Tu ana ratou i to ratou wahi; a, i tetahi ano o nga wehenga e wha o te ra ka korerotia e ratou te pukapuka o te ture a Ihowa a to ratou Atua, i tetahi atu ano o nga wehenga e wha o te ra ka whaki atu ratou, ka koropiko atu ki a Ihowa ki to ratou Atua.
- 4
- Katahi ka whakatika ki runga ki te turanga, etahi Riwaiti, ko Hehua, ko Pani, ko Karamiere, ko Hepania, ko Puni, ko Herepia, ko Pani, ko Kenani; nui atu to ratou reo ki te karanga ki a Ihowa ki to ratou Atua.
- 5
- Na, ko te meatanga a nga Riwaiti, a Hehua, a Karamiere, a Pani, a Hahapania, a Herepia, a Horiia, a Hepania, a Petahia, Whakatika, whakapai atu ki a Ihowa ki to koutou Atua, a, ake ake ake: kia whakapaingia ano hoki tou ingoa kororia e whakanuia nei ki runga ake i nga whakapainga, i nga whakamoemititanga katoa.
- 6
- Ko koe, ina, ko koe anake a Ihowa; nau i hanga te rangi, te rangi o nga rangi, me o reira tini mea, te whenua, me nga mea katoa i runga, nga moana, me nga mea katoa i roto, ko koe hoki te kai whakaora o aua mea katoa, e koropiko ana hoki te ope o te rangi ki a koe.
- 7
- Ko koe a Ihowa te Atua; nau i whiriwhiri a Aperama, a, kawea mai ana e koe i Uru o nga Karari, huaina iho e koe tona ingoa ko Aperahama.
- 8
- I kitea hoki e koe he ngakau pono tona ki tou aroaro, na, whakaritea ana e koe he kawenata ki a ia, he mea kia homai te whenua o nga Kanaani, o nga Hiti, o nga Amori, o nga Perihi, o nga Iepuhi, o nga Kirikahi, kia homai ki ona uri. Na, kua mana nei i a koe o kupu; e tika ana hoki koe.
- 9
- I kitea ano e koe te tukinotanga o o matou mātua i Ihipa, i whakarongo ano hoki ki ta ratou karanga i te Moana whero:
- 10
- Na, homai ana e koe nga tohu me nga merekara, he meatanga ki a Parao ratou ko ana tangata katoa, ko te iwi katoa ano hoki o tona whenua: i mohio hoki koe ki ta ratou whakakake ki a ratou. Na, kua whai ingoa koe; koia ano tenei inaianei.
- 11
- I wahia ano hoki e koe te moana ki to ratou aroaro, a, whiti ana ratou i te wahi maroke i waenganui o te moana. Tena ko nga kai aru i a ratou, makā ana e koe ki nga rire, ano he kohatu ratou i nga wai kaha.
- 12
- I arahina ano hoki ratou e koe ki te pou kapua i te awatea, ki te pou ahi ano hoki i te po, hei whakamārama i to ratou ara e haere ai ratou.
- 13
- I heke iho ano koe ki runga ki Maunga Hinai, a korero mai ana ki a ratou i runga i te rangi; homai ana e koe ki a ratou nga whakariteritenga tika, me nga ture pono, nga tikanga, me nga whakahaunga pai.
- 14
- I whakaaturia ano e koe tou hapati tapu ki a ratou; i whakahaua iho ano hoki e koe nga whakahaunga, nga tikanga, nga ture ki a ratou, he mea whakapuaki mai na to pononga na Mohi.
- 15
- I homai ano e koe he taro i te rangi mo to ratou mate-kai; i whakaputaina mai he wai i te kohatu mo to ratou mate-wai; i ki mai ano ki a ratou kia haere ratou ki te tango i te whenua i oati ai koe ka hoatu ki a ratou.
- 16
- Heoi ka whakakake ratou, o matou mātua, ka whakapakeke i o ratou kaki, kihai hoki i whakarongo ki au whakahaunga.
- 17
- Na, kihai ratou i whakaae kia whakarongo, kihai i mahara ki au merekara i mahia e koe i roto i a ratou, heoi kua pakeke o ratou kaki, whakakeke ana ratou, whakaritea ana e ratou he rangatira, kia hoki ai ratou ki ta ratou mahi pononga. Ko koe ia he Atua muru hara, he tohu tangata, e atawhai ana, e puhoi ana ki te riri, e nui ana te aroha, a kihai i whakarere i a ratou.
- 18
- I ta ratou hanganga ano hoki i te kuao kau, i te mea whakarewa, i ta ratou kianga, Ko tou Atua tenei i kawea mai ai koe i Ihipa, a nui atu a ratou whakapataritaringa,
- 19
- He maha ano ia au mahi aroha, a kihai koe i whakarere i a ratou i te koraha; kihai ratou i mahue i te pou kapua i te awatea, hei arahi i a ratou i te ara, i te pou ahi ano hoki i te po, hei whakamārama i a ratou, i te huarahi ano hoki e haere ai ratou.
- 20
- I homai ano e koe tou wairua pai hei whakaako i a ratou, kihai hoki to mana i kaiponuhia ki o ratou mangai: i homai ano e koe he wai ki a ratou mo to ratou mate-wai.
- 21
- E wha tekau nga tau i atawhaitia ai ratou e koe i te koraha, a kihai ratou i hapa ki tetahi mea; kihai o ratou kakahu i tawhitotia, kihai ano hoki o ratou waewae i pupuhi.
- 22
- I homai ano e koe nga kingitanga me nga iwi ki a ratou, a wehewehea atu ana ratou ki nga kokonga: na, kua riro mai i a ratou te whenua o Hihona, te whenua o te kingi o Hehepona, me te whenua o Oka kingi o Pahana.
- 23
- I whakanuia ano e koe a ratou tamariki kia rite ki nga whetu o te rangi, a kawea mai ana ratou ki te whenua i ki ai koe ki o ratou mātua ka haere ratou ki reira tango ai.
- 24
- Na, haere mai ana nga tamariki, riro ana te whenua i a ratou, a pehia ana e koe ki to ratou aroaro nga tangata whenua, nga Kanaani, homai ana e koe ki o ratou ringaringa, ratou, o ratou kingi, me nga iwi o te whenua, kia meatia ki a ratou ta ratou i pai ai.
- 25
- Na, kua riro i a ratou nga pa kaha, me te oneone momona, kua whiwhi ano hoki ki nga whare e ki tonu ana i nga mea pai katoa, ki nga poka wai kua oti te keri, ki nga māra waina, oriwa, ki nga rakau hei kai, i tona tini, a kai ana ratou, ka makona, kua whai kiko, a, koa ana ratou ki te nui o au mea pai.
- 26
- Na, ka tutū ratou, a ka whakakeke ki a koe, makā ana e ratou to ture ki muri ki o ratou tuara, patua iho e ratou o poropiti i whakaatu tikanga nei ki a ratou, kia tahuri ai ratou ki a koe; nui atu a ratou whakapataritaringa.
- 27
- Na, hoatu ana ratou e koe ki te ringaringa o o ratou hoa riri, a whakatoia iho ratou e ratou; heoi i nga wa i mate ai ratou, i karanga ratou ki a koe; a, whakarongo mai ana koe i te rangi, he maha hoki o mahi aroha, homai ana e koe he kai whakaora ki a ratou, i ora ai ratou i te ringaringa o o ratou hoa riri.
- 28
- A ka whai tānga manawa nei ratou, kei te mahi ano ratou i te kino ki tou aroaro: na, whakarerea atu ana ratou e koe ki te ringaringa o o ratou hoa riri, a ko era hei rangatira mo ratou. Na, ka hoki mai ratou, ka karanga ki a koe, a ka whakarongo mai koe i te rangi; rite tonu tau ki au mahi aroha, a, he maha nga wa i whakaorangia ai ratou e koe;
- 29
- I whakaatu tikanga ano koe ki a ratou, kia hoki mai ai ratou ki to ture, heoi whakakake ana ratou, kihai hoki i whakarongo ki o whakahaunga; na, ka hara ki o whakariteritenga, (he mea enei e ora ai te tangata, ki te mahia e ia;) whakahokia mai ana e ratou te pokohiwi, whakapakeketia ana o ratou kaki, kihai hoki i rongo.
- 30
- He maha ano nga tau i kukume roa ai koe ki a ratou, i whakaatu tikanga ai ki a ratou, he mea na tou wairua i roto i o poropiti, heoi kihai i tahuri mai o ratou taringa, na, hoatu ana ratou e koe ki te ringaringa o nga iwi o nga whenua.
- 31
- He nui ia no tou aroha, tē whakapotoa rawatia ai ratou e koe, tē whakarerea ai ratou; he Atua atawhai hoki koe, he Atua aroha.
- 32
- Na, e to matou Atua, e te Atua nui, e te Atua kaha, e wehingia ana, e pupuri nei i te kawenata, i te mahi tohu, kei iti ki tau titiro iho te he katoa i pa mai nei ki a matou, ki o matou kingi, ki o matou rangatira, ki o matou tohunga, ki o matou poropiti, ki o matou mātua, ki tou iwi katoa, o nga ra iho ano o nga kingi o Ahiria, a tae noa ki tenei ra.
- 33
- Tika tonu ia tau, nga mea katoa i takina mai nei ki a matou; he pono hoki tau mahi, ko ta matou ia e kino ana.
- 34
- O matou kingi, o matou rangatira, o matou tohunga, o matou mātua, kihai i mahia e ratou tau ture, kihai hoki i tahuri mai ki o whakahaunga, ki o whakaaturanga i whakaaturia e koe ki a ratou.
- 35
- I te mea kei a ratou te kingitanga, me tou pai nui i hoatu nei e koe ki a ratou, me te whenua nui, whenua momona, i hoatu nei e koe ki to ratou aroaro, kihai ratou i mahi ki a koe, kihai hoki i tahuri mai i ā ratou mahi kino.
- 36
- Nana, he pononga nei matou inaianei; a, te whenua i homai e koe ki o matou mātua, a, ko ratou hei kai i ona hua, me ona pai, nana he pononga matou i taua whenua nei.
- 37
- A, nui atu ona hua ma nga kingi i meinga nei e koe hei kingi mo matou, no te mea i hara matou; he rangatira ano ratou no o matou tinana, no a matou kararehe, he pera ano me ta ratou i pai ai; nui atu hoki te he i a matou nei.
- 38
- He whakaaro na matou ki tenei katoa i whakarite ai matou i te kawenata pono, tuhituhi rawa, hīritia iho e o matou rangatira, e o matou Riwaiti, e o matou tohunga.
Address: 
Phone: 
Email: