- 1
- A i te amuamunga o te iwi, na, ka kino a Ihowa: a, te rongonga o Ihowa, na, ka mura tana riri, a ka kā te ahi a Ihowa i roto i a ratou, a pau ake te hunga i nga pito ki waho o te puni.
- 2
- Na, ka tangi te iwi ki a Mohi, a ka inoi a Mohi ki a Ihowa, na, ka mate te ahi.
- 3
- A huaina iho e ia te ingoa o tena wahi ko Tapera: no te kaanga hoki o te ahi a Ihowa i roto i a ratou.
- 4
- Na, ka anga ka minamina te hunga i whakauru ki roto ki a ratou: a ka anga ano nga tamariki a Iharaira ka tangi, ka mea, Ma wai e homai he kikokiko hei kai ma tatou?
- 5
- E mahara ana tatou ki nga ika i kainga noatia e tatou ki Ihipa; ki nga kukama, ki nga mereni, ki nga riki, ki nga aniana, me te karika:
- 6
- Ko tenei ia, kua maroke o tatou wairua, a kahore noa iho he mea ke ake i tenei mana hei tirohanga ma tatou.
- 7
- A rite tonu te mana ki te purapura korianara, ko tona ahua hoki i rite ki to te teriuma ahua.
- 8
- I kopikopiko te iwi ki te kohi, a hurihia ana e ratou ki nga mira, i tukia ranei ki te kumete, a tunua ana e ratou ki te kohua, hangā ana hoki hei keke: ko tona reka hoki i rite ki te reka o te hinu hou.
- 9
- A i te taunga iho o te haunui ki runga ki te puni i te po, i tau iho ano hoki te mana ki runga.
- 10
- A i rongo a Mohi i te iwi e tangi ana, puta noa i o ratou hapu, tenei tangata tenei tangata, i nga whatitoka o o ratou teneti: a mura noa iho te riri a Ihowa; ki ta Mohi ano hoki he kino.
- 11
- Na, ko te meatanga atu a Mohi ki a Ihowa, Na te aha koe i atawhai-kino ai i to pononga? na te aha hoki ahau tē manakohia ai e koe, i whakawahā ai e koe tenei iwi katoa hei pikaunga maku?
- 12
- He uri ianei noku tenei iwi katoa? i whanau ranei ratou i a au, i mea ai koe ki a au, Hikitia ki tou uma, (kia rite ki ta te matua atawhai hiki i te potiki,) ki te whenua i oatitia e koe ki o ratou mātua?
- 13
- No hea aku kikokiko hei hoatutanga maku ki tenei iwi katoa? e tangi mai ana hoki ratou ki a au, e mea mai ana, Homai he kikokiko ki a matou hei kai ma matou.
- 14
- E kore tenei iwi katoa e taea e ahau anake te waha, e pehia rawatia ana hoki ahau e ratou.
- 15
- A ki te penei to mahi ki a au, tena, whakamatea rawatia ahau, ki te mea kua manakohia mai ahau e koe; kaua hoki ahau e tukua kia kite i te he moku.
- 16
- Na, ko te meatanga mai a Ihowa ki a Mohi, Huihuia mai ki a au kia whitu tekau nga tangata o nga kaumatua o Iharaira, ara, au e mohio ai he kaumatua no te iwi, he rangatira hoki no ratou, ka kawe mai ai ki te tapenakara o te whakaminenga, kia tu tahi hoki ratou me koe ki reira.
- 17
- A maku e haere iho e korero ki a koe ki reira: me tango ano hoki e ahau tetahi wahi o te wairua, o tera i runga i a koe na, ka hoatu ai ki runga ki a ratou; a ko ratou hei hoa mou ki te waha i te pikaunga, ara, i te iwi; kei wahā e koe anake.
- 18
- Me ki atu hoki e koe ki te iwi, Whakatapua koutou kia rite ai apopo, a ka kai kikokiko koutou: kua tangi nei hoki koutou ki nga taringa o Ihowa, kua mea, Ma wai e homai he kikokiko hei kai ma matou? he pai hoki nga mea i a matou i Ihipa: mo reira ka homai e Ihowa he kikokiko ki a koutou, a ka kai koutou.
- 19
- E kore e whakakotahitia te rangi hei kainga ma koutou, e kore ano hoki e waiho i te rua o nga ra, i te rima ranei o nga ra, i te tekau ranei o nga ra, i te rua tekau ranei o nga ra;
- 20
- Engari kia pau te marama, a puta noa mai i o koutou ihu, a ka ngarurutia e koutou: mo koutou i whakahawea ki a Ihowa e noho nei i waenganui i a koutou, i tangi hoki ki tona aroaro, i mea, Na te aha tatou i haere mai ai i Ihipa?
- 21
- Na, ko te meatanga atu a Mohi, E ono rau nga mano o te iwi kei roto nei ahau i a ratou, he hunga haere i raro, a kua mea mai nei koe, Ka hoatu e ahau he kikokiko ki a ratou, a kia kotahi tino marama e kai ai ratou.
- 22
- Me patu ranei nga hipi me nga kau ma ratou, kia rato ai ratou? me kohi mai ranei nga ika katoa o te moana ma ratou, kia rato ai ratou?
- 23
- Na, ko te meatanga mai a Ihowa ki a Mohi, Kua mutua ranei te ringa o Ihowa? ka kite koe aianei e pono ana ranei taku kupu ki a koe, kahore ranei.
- 24
- Na, ka puta mai a Mohi ki waho, a korerotia ana e ia nga kupu a Ihowa ki te iwi, a huihuia mai ana e ia nga tangata e whitu tekau o nga kaumatua o te iwi, a whakaturia ana ki tetahi taha ki tetahi taha o te tapenakara.
- 25
- Na, ko te hekenga iho o Ihowa i roto i te kapua, te korerotanga hoki ki a ia, na, ka tangohia e ia tetahi wahi o te wairua i runga i a ia, a hoatu ana ki nga kaumatua e whitu tekau: a i te taunga iho o te wairua ki runga ki a ratou, na, ka poropiti ratou, a kore ake i muri iho.
- 26
- A tokorua nga tangata i mahue ki te puni, ko Ererara te ingoa o tetahi, ko Merara hoki te ingoa o tetahi: na, ko te taunga iho o te wairua ki runga ki a raua; no te hunga hoki raua i tuhituhia, otiia kihai i haere ki te tapenakara: na, ka poropiti raua i roto i te puni.
- 27
- Na, ka oma atu tetahi taitamariki ki te korero ki a Mohi, a ka mea, Kei te poropiti a Ererara raua ko Merara i roto i te puni.
- 28
- Na, ko te ohonga mai o te tangata a Mohi, o Hohua tama a Nunu, ko tetahi hoki ia o ana taitamariki, ka mea, E toku ariki, e Mohi, riria raua.
- 29
- Na, ko te meatanga atu a Mohi ki a ia, He whakaaro ki a au i hae ai koe? he oranga ngakau ra me i poropiti katoa te iwi a Ihowa, me i tukua iho hoki e Ihowa tona wairua ki a ratou.
- 30
- Na, ka haere mai a Mohi ki roto ki te puni, a ia, me nga kaumatua o Iharaira.
- 31
- Na, ka puta atu he hau i a Ihowa, a kawea mai ana nga koitareke i te moana, a makā iho e ia ki te taha o te puni, ki te whakaaro atu kia kotahi te ra e haere ai i tetahi taha, kia kotahi ano hoki te ra, ki te whakaaro atu, e haere ai i tetahi taha, a, tawhio noa te puni, me te mea ano hoki e rua nga whatianga te teitei i runga i te mata o te whenua.
- 32
- Na, ka tu te iwi a pau katoa taua ra, me taua po katoa hoki, me te ra katoa hoki i te aonga ake, ki te kohikohi i nga koitareke: kotahi tekau nga homa a te tangata nana te kohinga iti: a horahorangia noatia atu ana e ratou hei kai ma ratou, a, tawhio noa te puni.
- 33
- A i te mea kei o ratou niho ano te kikokiko, i te mea kahore ano i ngaua noatia; na, ko te muranga o ta Ihowa riri ki te iwi, a whuia ana te iwi e Ihowa; he nui whakaharahara te whiunga.
- 34
- Na, huaina iho e ia te ingoa o taua wahi ko Kipiroto-hataawa; no te mea i tanumia e ratou ki reira te hunga i minamina.
- 35
- Na, ka turia atu e te iwi i Kipiroto-hataawa ki Hateroto; a noho ana i Hateroto.
Address: 
Phone: 
Email: