- 1
- Na, ka haere mai nga tamahine a Teropehara tama a Hewhere, he tama hoki ia na Kireara, a he tama ia na Makiri na te tama a Manahe; no nga hapu ia o Manahe tama a Hohepa: a ko nga ingoa enei o ana tamahine; ko Mahara, ko Noa, ko Hokora, ko Mirika, ko Tirita.
- 2
- A ka tu ratou ki te aroaro o Mohi, ki te aroaro hoki o Ereatara tohunga, ki te aroaro ano hoki o nga rangatira, me te whakaminenga katoa, ki te whatitoka o te tapenakara o te whakaminenga, a ka mea,
- 3
- I mate to matou papa ki te koraha, kahore hoki ia i roto i te hui o te hunga i huihui ki te whawhai ki a Ihowa i roto i te hui a Koraha; engari i mate ia i runga i tona hara ake, kahore ano hoki ana tama.
- 4
- Na te aha i whakakorea ai te ingoa o to matou papa i roto i tona hapu, i a ia kahore nei i whai tama? Homai he wahi ki a matou i roto i nga teina o to matou papa.
- 5
- Na, ka kawea ta ratou korero e Mohi ki te aroaro o Ihowa.
- 6
- A ka korero mai a Ihowa ki a Mohi, ka mea,
- 7
- He tika nga korero a nga tamahine a Teropehara: me hoatu ano tetahi wahi ki a ratou hei kāinga tupu i roto i nga teina o to ratou papa; meinga hoki kia riro mai i a ratou te kāinga tupu o to ratou papa.
- 8
- Me korero ano hoki e koe ki nga tamariki a Iharaira, me ki atu, Ki te mate te tangata, a kahore ana tama, na, me mea e koutou kia riro mai tona kāinga tupu i tana tamahine.
- 9
- A ki te kahore ana tamahine, na, me hoatu e koutou tona kāinga tupu ki ona tuakana, teina ranei.
- 10
- A ki te kahore ona tuakana, teina ranei, na me hoatu e koutou tona kāinga tupu ki te tuakana, teina ranei o tona papa.
- 11
- A ki te kahore he tuakana, teina ranei o tona papa, na, me hoatu e koutou tona kāinga tupu ki tona whanaunga o tona hapu e tata ake ana ki a ia, a ka riro mai a reira i a ia: me waiho hoki tena hei tikanga whakariteritenga ma nga tamariki a Iharaira; kia rite ki ta Ihowa i whakahau ai ki a Mohi.
- 12
- A i mea mai ano a Ihowa ki a Mohi, E piki koe ki tenei maunga ki Aparimi, ka titiro atu ki te whenua ka hoatu nei e ahau ki nga tamariki a Iharaira.
- 13
- A ka kitea e koe, na, ka kohia atu ano hoki koe ki tou iwi, ka peratia me tou tuakana me Arona i kohia atu nei.
- 14
- Mo korua i whakatoi ki taku kupu i te koraha o Tini, i te ngangautanga a te whakaminenga, a kihai i whakatapu i a au i to ratou aroaro, i te wai. Ko te wai o Meripa tena i Karehe i te koraha o Tini.
- 15
- A i korero a Mohi ki a Ihowa, i mea,
- 16
- Kia whakaritea e Ihowa, e te Atua o nga wairua o nga kikokiko katoa, tetahi tangata mo te whakaminenga.
- 17
- Hei haere atu i to ratou aroaro, hei haere mai hoki i to ratou aroaro, hei arahi atu hoki i a ratou, hei arahi mai ano hoki i a ratou; kei rite hoki te whakaminenga a Ihowa ki nga hipi kahore nei o ratou hepara.
- 18
- Na, ko te meatanga mai a Ihowa ki a Mohi, Tangohia mai ki a koe a Hohua tama a Nunu, he tangata hoki ia kei a ia nei te wairua, ka popoki ai ou ringa ki runga ki a ia;
- 19
- Ka whakatu ai hoki i a ia ki te aroaro o Ereatara tohunga, ki te aroaro ano hoki o te whakaminenga katoa, ka whakahau ai i a ia i ta ratou tirohanga iho.
- 20
- Me hoatu ano hoki e koe tetahi wahi o tou kororia ki runga ki a ia, kia rongo ai te whakaminenga katoa o nga tamariki a Iharaira.
- 21
- A ka tu ia ki te aroaro o Ereatara tohunga, a ko ia hei kai tono whakaaro mana, i ta te Urimi e whakarite ai i te aroaro o Ihowa: ma tana kupu e haere atu ai, ma tana kupu hoki e haere mai ai ratou, a ia, me nga tamariki katoa a Iharaira, ara, te whakaminenga katoa.
- 22
- Na, pena ana a Mohi me ta Ihowa i whakahau ai ki a ia: a tangohia mai ana e ia a Hohua, whakaturia ana hoki ki te aroaro o Ereatara tohunga, ki te aroaro ano hoki o te whakaminenga katoa:
- 23
- A pokia iho e ia ona ringa ki runga ki a ia, me te whakahau ano ki a ia i ta Ihowa korero i whakapuakina mai e Mohi.
Address: 
Phone: 
Email: