- 1
- A i korero a Ihowa ki a Mohi i te koraha o Hinai, i te rua o nga tau o to ratou haerenga mai i te whenua o Ihipa, i te tahi o nga marama, i mea,
- 2
- Me whakarite ano hoki te kapenga e nga tamariki a Iharaira i tona wa ano.
- 3
- Me whakarite e koutou i te tahi tekau ma wha o nga ra o tenei marama, i te ahiahi, i tona wa ano: kia rite ki ona tikanga katoa, ki ona ritenga katoa, ta koutou meatanga i taua mea.
- 4
- Na, ka korero atu a Mohi ki nga tamariki a Iharaira kia whakaritea e ratou te kapenga.
- 5
- A ka whakaritea e ratou te kapenga i te tahi tekau ma wha o nga ra o te marama tuatahi, i te ahiahi, i te koraha o Hinai: rite tonu ki nga mea katoa i whakahau ai a Ihowa ki a Mohi ta nga tamariki a Iharaira i mea ai.
- 6
- Na, he tangata era i poke i te tinana o tetahi tangata kua mate, i kore ai e ahei te whakarite i te kapenga i taua ra: na ka haere mai ratou ki te aroaro o Mohi raua ko Arona i taua ra;
- 7
- A ka mea mai aua tangata ki a ia, Kua poke matou i te tinana o tetahi tangata kua mate: na te aha matou tē tukua ai ki te whakahere i te whakahere ma Ihowa i tona wa i rite ai, i roto i nga tamariki a Iharaira?
- 8
- Na, ko te meatanga mai a Mohi ki a ratou, E tu koutou, a me whakarongo atu ahau ki ta Ihowa e whakahau ai mo koutou.
- 9
- A i korero a Ihowa ki a Mohi, i mea,
- 10
- Korero atu ki nga tamariki a Iharaira, mea atu, Ki te poke i te tupapaku tetahi tangata o koutou, o o koutou uri ranei, ki te mea ranei kei te haere ia i tawhiti, me whakarite ano e ia te kapenga ki a Ihowa.
- 11
- Me whakarite e ratou i te rua o nga marama, i te tekau ma wha o nga ra, i te ahiahi, me kinaki ki te taro rewena-kore me nga puwha kawa.
- 12
- Kaua tetahi wahi o tena mea e whakatoea e ratou mo te ata, kaua ano hoki e whatiia tetahi o ona wheua; kia rite ki nga tikanga katoa o te kapenga ta ratou meatanga i tena mea.
- 13
- Te tangata ia kahore ona poke a kahore ano i te haere, a e mangere ana ki te whakarite i te kapenga, ina, ka hatepea atu taua wairua i roto i tona iwi: kahore nei hoki i kawea mai e ia te whakahere ma Ihowa i tona wa i rite ai, ka wahā e taua tangata tona hara.
- 14
- A ki te noho he manene i roto i a koutou, a ka mea ki te whakarite i te kapenga ki a Ihowa, kia rite ki nga tikanga o te kapenga, ki nga ritenga ano hoki o taua mea, tana e mea ai: kia kotahi ano ta koutou tikanga mo te manene raua ko te tangata whenua.
- 15
- A i te ra i whakaarahia ai te tapenakara, ka taupokina te tapenakara, e te kapua, ara, te teneti o te whakaaturanga: a, i te ahiahi i rite a runga o te tapenakara ki te ahua ahi, taea noatia te ata.
- 16
- I pera tonu: i taupokina e te kapua i te awatea, e te ahua ahi hoki i te po.
- 17
- Ka riro ake hoki te kapua i runga i te tapenakara, na, muri iho ka haere nga tamariki a Iharaira: a i te wahi i tau ai te kapua i whakaturia ano e nga tamariki a Iharaira o ratou teneti ki reira.
- 18
- Na te ki ano a Ihowa nga haerenga o nga tamariki a Iharaira, na te ki ano a Ihowa o ratou nohoanga iho: i noho ano ratou i nga ra katoa i tau ai te kapua ki runga ki te tapenakara.
- 19
- A he maha nga ra i roa ai te kapua ki runga ki te tapenakara, na ka mahara nga tamariki a Iharaira ki ta Ihowa i whakamahara ai, a kihai i haere.
- 20
- Ko te tikanga ano tena i te wa i torutoru ai nga ra o te kapua ki runga ki te tapenakara; na te ki a Ihowa ta ratou noho i roto i o ratou teneti, na te ki hoki a Ihowa to ratou haerenga.
- 21
- I pena ano i te wa i tuturu ai te kapua i te ahiahi, taea noatia te ata, a ka riro ake te kapua i te ata, na, ka haere ratou: ahakoa, he ao, he po ranei, i riro ake ai te kapua, i haere ano ratou.
- 22
- Ahakoa e rua nga ra, kotahi marama ranei, i roa ai te kapua ki runga ki te tapenakara, i mau ai ki reira, ko ta nga tamariki a Iharaira noho ano tena, kahore hoki i haere: tona rironga ake ki runga, na, ka haere ratou.
- 23
- Na te ki a Ihowa ta ratou noho, na te ki hoki a Ihowa to ratou haerenga: i mahara ratou ki ta Ihowa i whakamahara ai; i whakarite i ta Ihowa kupu i whakapuakina mai e Mohi.
Address: 
Phone: 
Email: