- 1
- Ta te wahine whakaaro nui he hanga i tona whare; ta te wairangi, ko ona ringa nei ano hei wahi iho.
- 2
- Te tangata e haere ana i runga i tona tika, e wehi ana i a Ihowa; te tangata he parori ke ana ara e whakahawea ana ki a ia.
- 3
- He patu whakapehapeha kei te mangai o te wairangi, ma nga ngutu ia o te hunga whakaaro nui ratou ka ora ai.
- 4
- Ki te kahore he kau, ka ma te takotoranga kai; ma te kaha ano o te kau ka nui ai nga hua.
- 5
- E kore te kai whakaatu pono e teka; ka puaki ia te teka i te kai whakaatu teka.
- 6
- Ta te tangata whakahi, he rapu i te whakaaro nui, heoi kahore noa iho; ki te tangata matau ia he mea māmā te matauranga.
- 7
- Haere atu i te aroaro o te tangata kuare, ina kahore e kitea e koe he ngutu matau ona.
- 8
- To te whakaaro nui o te tangata ngarahu pai, he matau i tona ara; to te wairangi o nga kuare, he tinihanga.
- 9
- Ta te hunga wairangi he kata ki te he; na, i roto i te hunga tika ko te aroha.
- 10
- E mohio ana te ngakau ki te mamae o tona wairua ake, e kore ano hoki tona koa e pikitia e te tangata ke.
- 11
- Ka whakangaromia te whare o te hunga kino; ka tupu ia te tapenakara o te hunga tika.
- 12
- He huarahi ano tera e tika ana ki ta te tangata titiro; tona mutunga ia ko nga huarahi ki te mate.
- 13
- Kei te kata nei ano kua mamae te ngakau, a, te mutunga o taua koa he pouri.
- 14
- Te ngakau tahuri ke, ka makona ia i ona ara ake; me te tangata pai ano i tana ake ano.
- 15
- Ta te kuare he whakapono atu ki nga kupu katoa; e ata whakaaro ana ia te tangata tupato ki tana hikoinga.
- 16
- To te tangata whakaaro nui he wehi, he neke atu i te kino; to te kuare he rupahu, he tohe.
- 17
- Te tangata riri wawe he mahi wairangi tana; ka kinongia ano hoki te tangata ngarahu he.
- 18
- He wairangi te whakarerenga iho mo nga kuare; te hunga tupato ia ka karapotia ki te matauranga.
- 19
- He piko iho ta te hunga kino ki te aroaro o te hunga pai; ta te hunga hē ano hoki ki nga kuwaha o te tangata tika.
- 20
- E kinongia ana te rawa-kore e tona hoa ake nei ano; he tokomaha ia nga tangata e aroha ana ki te tangata taonga.
- 21
- Te tangata e whakahawea ana ki tona hoa, he hara tona; tena ko te tangata e atawhai ana ki nga ware, ka hari ia.
- 22
- He teka ianei e kotiti ke ana nga kai hanga i te kino? nga kai hanga ia i te pai ko te atawhai me te pono.
- 23
- E whai hua ana nga mauiuitanga katoa; he rawa-kore ia te tukunga iho o te korero a nga ngutu.
- 24
- Hei karauna o ratou taonga mo te hunga whakaaro nui: he wairangi ia te wairangi o nga kuare.
- 25
- Ka ora nga wairua i te kai whakaatu pono, he korero teka ia ta te mea tinihanga.
- 26
- U tonu, kaha tonu te whakaaro ina wehi ki a Ihowa; ka whai rerenga atu ano hoki ana tamariki.
- 27
- He puna ora te wehi ki a Ihowa e mahue ai nga reti o te mate.
- 28
- Ma te nui o te iwi ka whai honore ai te kingi; ma te kore o te iwi ka taka ai te rangatira.
- 29
- He matauranga nui to te tangata manawanui; te tangata riri wawe, e whakaneke ake ana ia i te wairangi.
- 30
- He ora ki nga kikokiko te ngakau ora; he pirau ia te hae ki nga wheua.
- 31
- Te tangata e tukino ana i te ware, he tawai tana ki tona kai hanga; te tangata e whakahonore ana i a ia, ka atawhai ki te rawa-kore.
- 32
- E turakina iho ana te tangata kino i runga i tona he; erangi te tangata tika ka whai tumanakohanga i tona matenga.
- 33
- Ka ata tau iho te whakaaro nui i roto i te ngakau o te tangata matau; e mohiotia ana hoki a waenganui o nga kuare.
- 34
- Ma te tika ka kake ai te iwi; ma te hara ia ka ingoa kino ai nga iwi.
- 35
- Ka manako mai te kingi ki te pononga mahara; ka anga mai ano tana whakatakariri ki te tangata i puta mai ai te whakama.
Address: 
Phone: 
Email: