- 1
- Nga tikanga o te ngakau i roto i te tangata me te kupu e whakahokia mai e te arero, na Ihowa era.
- 2
- He ma nga ara katoa o te tangata ki ona kanohi ake; e paunatia ana ia e Ihowa nga wairua.
- 3
- Whakatakā atu o mahi ki runga ki a Ihowa, a ka whakapumautia au whakaaro.
- 4
- He mea hanga na Ihowa nga mea katoa mona ake, me te tangata kino nei ano mo te ra o te kino.
- 5
- He mea whakarihariha na Ihowa nga tangata ngakau whakake katoa; ahakoa awhi nga ringa ki a raua e kore ia e whakaharakoretia.
- 6
- Ko te mahi tohu tangata me te pono hei pure mo te kino; ma te wehi hoki kia Ihowa ka mawehe atu ai te tangata i te kino.
- 7
- Ki te paingia e Ihowa nga ara o te tangata, ka meinga e ia ko ona hoa riri nei ano kia mau te rongo ki a ia.
- 8
- Te mea iti i runga i te tika pai atu i nga hua maha ki te kahore he tikanga.
- 9
- Ta te ngakau o te tangata he whakaaro ki tona ara; ta Ihowa ia he whakatika i tana hikoinga.
- 10
- He kupu poropiti kei nga ngutu o te kingi; e kore tona mangai e poka ke ina whakarite whakawa.
- 11
- Te taimaha tika, te pauna tika, na Ihowa; he mahi nana nga kohatu katoa o te putea.
- 12
- He mea whakarihariha ki nga kingi te mahi i te kino; na te tika hoki i u ai te torona.
- 13
- He mea ahuareka ki nga kingi nga ngutu tika: e aroha ana hoki ratou ki te tangata e korero tika ana.
- 14
- He karere mo te mate te riri a te kingi: ka whakamarietia e te tangata whakaaro nui.
- 15
- He ora kei te māramatanga o te mata o te kingi: tana manakohanga mai ka rite ki te kapua o to muri ua.
- 16
- Te whiwhi ki te whakaaro nui, ano te pai! pai atu i te koura. Ko te whiwhi hoki ki te matauranga te mea e hiahiatia nuitia atu i te hiriwa.
- 17
- To te hunga tika huarahi he mawehe atu i te kino: te tangata e mau ana i a ia tona ara, ka mau ano i a ia tona wairua.
- 18
- I mua ake o te whakangaromanga ko te whakakake, i mua ake hoki i te takanga ko te wairua whakapehapeha.
- 19
- Te ngakau whakaiti, a ko te hunga iti ano hei hoa, pai atu i te uru ki ta te hunga whakakake tuwhanga i nga taonga.
- 20
- Te tangata e mahi mohio ana i tetahi mea, ka kite ia i te pai: na, te tangata e whakawhirinaki ana ki a Ihowa, ka hari ia.
- 21
- Ka karangatia te ngakau whakaaro nui he matau; ma te reka ano o nga ngutu ka neke ake ai te mohio.
- 22
- Te tangata i te matauranga ka ai tera hei puna ora mona; he wairangi ia te ako i nga wairangi.
- 23
- Ka whakaakona tona mangai e te ngakau o te tangata whakaaro nui: ma konei ano ka nui ai te kupu mohio o ona ngutu.
- 24
- He honikoma nga kupu ahuareka, he reka ki te wairua, he rongoa ki te wheua.
- 25
- He huarahi ano tera e tika ana ki ta te tangata titiro iho; tona mutunga ia ko nga huarahi ki te mate.
- 26
- Te tangata e mahi ana, e mahi ana mona ake; no te mea e akiakina ana ia e tona mangai.
- 27
- E keria ana te kino e te tangata kino, he ahi hoki e ka ana kei ona ngutu.
- 28
- He rui totohe ta te tangata whanoke; ta te tangata kawe korero he wehewehe i nga hoa tupu.
- 29
- Ta te tangata nanakia he whakawai i tona hoa, a kawea ana e ia ki te ara kahore i pai.
- 30
- E whakamoe ana ia i ana kanohi he mea kia whakaaroa ai e ia nga mea whanoke; e oraora ana ona ngutu, te otinga o tana he kino.
- 31
- He karauna kororia te mahunga hina ki te mea ka kitea i runga i te ara o te tika.
- 32
- Engari rawa te tangata manawanui i te tangata kaha, te tangata e pehia ana e ia tona wairua i te tangata i horo ai te pa.
- 33
- E makā ana te rota ki roto ki te kokorutanga o te kakahu; kei a Ihowa ia te tikanga katoa.
Address: 
Phone: 
Email: