- 1
- E rere ana nga tangata kino i te mea kahore he kai whai: te tangata tika ia, ano he raiona te maia.
- 2
- He hē no te whenua i tokomaha ai ona rangatira; na, kia ai he tangata e mahara ana, e matau ana, ka mau roa nga tikanga.
- 3
- He rawa-kore e tukino ana i nga ware, tona rite kei te ua ta i kore ai te kai.
- 4
- Te hunga e whakarere ana i te ture, he whakamoemiti ta ratou ki te tangata kino: ta nga kai pupuri ia o te ture he ngangere ki a ratou.
- 5
- E kore nga tangata kino e mohio ki te whakarite whakawa: te hunga ia e rapu ana i a Ihowa, ka mohio ratou ki nga mea katoa.
- 6
- Te rawa-kore e haere ana i runga i tona tapatahitanga, engari ia i te tangata he taonga nei ona, a he parori ke ano ona ara.
- 7
- Te tangata e pupuri ana i te ture, he tamaiti mohio ia; te hoa ia o te hunga kakai, ka whakama tona pāpā i a ia.
- 8
- Ki te mea i whakanuia e tetahi ona rawa, he moni whakatupu, he utu i whakanekehia ake, e kohia ana e ia aua taonga mo te tangata e atawhaitia ai te rawa-kore.
- 9
- Te tangata e tahuri ke ana tona taringa, a kahore e rongo ki te ture, tana inoi nei ano he mea whakarihariha.
- 10
- Te tangata e whakariro ke ana i te hunga tika ki te ara he, ka taka ano ia ki roto ki tana poka: he pai ia te taonga mo te hunga ngakau tapatahi.
- 11
- Te tangata taonga, he nui ana whakaaro ki tana mahara iho, ka rapua ia tana e te rawa-kore i mohio.
- 12
- Nui atu te ataahua ina koa te hunga tika; ka ara ia te hunga kino, ka hunā te tangata.
- 13
- Te tangata e hipoki ana i ona he, e kore tana e kake: te tangata ia e whaki ana, a e whakarere ana, ka tohungia.
- 14
- Ka hari te tangata e wehi tonu ana: te tangata ia e whakapakeke ana i tona ngakau, ka taka ki te kino.
- 15
- Kei te raiona e tangi ana, kei te pea e kopikopiko ana te rite mo te tangata kino ina kingi ki te iwi rawa-kore.
- 16
- Nui atu ano hoki te tukino a te rangatira whakaaro-kore: te tangata e kino ana ki te apo ka roa ona ra.
- 17
- Te kai tukino, i mea nei ki te toto o te tangata, ka rere ia ki te rua; kaua tetahi e pupuri i a ia.
- 18
- Te tangata e tapatahi ana te haere, ka ora: te tangata e parori ke ana nga ara, taka tonu iho.
- 19
- Te tangata e ngaki ana i tona oneone, ka makona i te taro: te tangata e whai ana i te hunga wairangi, ka nui tana rawa-kore.
- 20
- Te tangata pono, ka nui nga manaakitanga mona: te tangata e takare ana ki te mea taonga, e kore ia e watea te he.
- 21
- Te whakaaro ki te tangata, ehara tera i te mea pai: kia kotahi hoki te kongakonga taro ka he te tangata pera.
- 22
- Te tangata e takare tonu ana ki te taonga, he kanohi kino tona; e kore hoki ia e whakaaro ka tae mai te kore o te rawa ki a ia.
- 23
- Te tangata i riria ai te he o tetahi, i te mutunga nui atu te manakohanga ki a ia i to te tangata i whakapati nei tona arero.
- 24
- Te tangata e tahae ana i nga mea a tona pāpā, a tona whaea, a e ki ake ana, Ehara i te hē, he hoa ia no te kai whakangaro.
- 25
- Ta te ngakau whakakake he whakapatari pakanga; te tangata ia e okioki ana ki a Ihowa ka tetere.
- 26
- He kuare te tangata e whakawhirinaki ana ki tona ngakau; na, te tangata e haere ana i runga i te whakaaro nui, ka mawhiti ia.
- 27
- Te tangata e hoatu ana ki te rawa-kore, e kore ia e hapa: na, te tangata e huna ana i ona kanohi, ka maha nga kanga mona.
- 28
- Ka ara te hunga kino, ka piri te tangata: na, ki te ngaro ratou, ka tokomaha te hunga tika.
Address: 
Phone: 
Email: