- 1
- E taku tamaiti, kei wareware koe ki taku ture; kia puritia hoki aku whakahaunga e tou ngakau.
- 2
- Ma enei hoki ka tapiritia mai ai nga ra roa mau, nga tau maha, me te ata noho.
- 3
- Kei whakarerea koe e te atawhai me te pono, heia ki tou kaki; tuhituhia iho, ko tou ngakau ano hei papa.
- 4
- Penei ka whiwhi koe ki te atawhai, me te matauranga pai i te aroaro o te Atua, o te tangata.
- 5
- Whakapaua atu tou ngakau ki te whakawhirinaki atu ki a Ihowa, kaua hoki e okioki atu ki tou matauranga ake.
- 6
- I ou ara katoa whakaaro atu ki a ia, a mana e whakatika ou huarahi.
- 7
- Kei whakaaro iho koe ki a koe he mohio koe; wehingia a Ihowa, mawehe atu i te kino.
- 8
- Ma reira ka whai ora ai tou pito, ka makuku ai ou wheua.
- 9
- Kia whai kororia a Ihowa i ou rawa, i nga matamua ano hoki o o hua katoa.
- 10
- A ka ki o toa i nga mea maha, ka pakaru ano hoki o rua waina i te waina.
- 11
- E taku tamaiti, kaua e whakahawea ki ta Ihowa papaki, kei ngakau-kore ano koe ina riria e ia.
- 12
- Ka riria hoki e Ihowa te he o tana e aroha ai, ka pera tana me ta te matua ki te tamaiti e matenuitia ana e ia.
- 13
- Ka hari te tangata kua kitea nei e ia te whakaaro nui, me te tangata ano kua whiwhi ki te matauranga.
- 14
- Pai atu hoki te hokohoko o tera i to te hiriwa e hokohokona nei, ona hua i te koura para-kore.
- 15
- Nui atu ona utu i o nga rupi; e kore ano hoki nga mea katoa e minaminatia e koe e rite ki a ia.
- 16
- Kei tona ringa matau nga ra roa; kei tona maui nga taonga me te kororia.
- 17
- Ona huarahi he huarahi ahuareka, ona ara katoa he rangimarie.
- 18
- Ko te rakau ia o te ora ki te hunga e u ana ki a ia; ka hari te tangata e pupuri ana i a ia.
- 19
- He nui ta Ihowa whakaaro i whakaturia ai e ia te whenua; tana whakapumautanga i nga rangi he meatanga na te mohio.
- 20
- He mohio nona i pakaru ai nga rire, i maturuturu ai te tomairangi o nga kapua.
- 21
- E taku tamaiti, kei kotiti ke atu era i ou kanohi, puritia te whakaaro nui me te ngarahu pai.
- 22
- Kei ena he oranga mo tou wairua, he whakapaipai ano mo tou kaki.
- 23
- Penei ka haere koe i tou ara, tē ai he wehi, e kore ano hoki tou waewae e tūtuki.
- 24
- Ka takoto koe, e kore koe e wehi, ina, ka takoto koe, ka reka ano to moe.
- 25
- Kaua e wehi i te mataku huaki tata, i te whakangaromanga ranei o te hunga kino ina pa mai.
- 26
- Ko Ihowa hoki hei okiokinga atu mou, a mana e tiaki tou waewae kei mau.
- 27
- Kaua e kaiponuhia te pai ki te hunga i tika nei ma ratou, i nga wa e whai rawa ai tou ringa hei meatanga.
- 28
- Kaua e mea ki tou hoa, Haere, ka hoki mai ai, a apopo ka hoatu e ahau, ki te mea kei a koe ano te mea e takoto ana.
- 29
- Kei whakatakoto koe i te kino mo tou hoa, kei te noho hu na hoki ia i tou taha.
- 30
- Kei whawhai pokanoa koe ki te tangata, ki te mea kahore ana mahi kino ki a koe.
- 31
- Kei hae koe ki te tangata nanakia, kaua hoki e whiriwhiria tetahi o ona ara.
- 32
- He mea whakarihariha hoki te whanoke ki a Ihowa; kei te hunga tika ia tana whakaaro ngaro.
- 33
- He kanga na Ihowa kei roto i te whare o te tangata kino, he mea manaki ia nana te nohoanga o te hunga tika.
- 34
- He pono ka whakahi ia ki te hunga whakahi, ka puta ia tana atawhai ki te hunga whakaiti.
- 35
- Te wahi pumau mo te hunga whakaaro nui, he kororia; to te kake ia o nga wairangi he whakama.
Address: 
Phone: 
Email: