- 1
- (He inoi na te ngakau mamae, i a ia e pehia iho ana, a maringi a wai ana tana tangi ki te aroaro o Ihowa.) Whakarongo, e Ihowa, ki taku inoi: kia puta atu hoki taku tangi ki a koe.
- 2
- Kaua e hunā tou mata ki a au i te ra e pouri ai ahau; whakatitahatia mai tou taringa ki a au: hohoro te whakahoki kupu mai ki a au i te ra e karanga atu ai ahau.
- 3
- Ka memeha atu hoki oku ra, ano he paoa: wera iho oku iwi ano he mounga.
- 4
- Kua pakia toku ngakau, kua memenge, ano he tarutaru; i wareware ai ahau ki te kai i taku taro.
- 5
- Piri tonu oku iwi ki toku kiri i toku reo aue.
- 6
- E rite ana ahau ki te perikana i te koraha, ki te koukou i te wahi mokemoke.
- 7
- Mataara tonu ahau; toku rite kei te pihoihoi mokemoke i runga i te tuanui.
- 8
- E tawai mai ana oku hoa riri ki a au i te ra roa; kua oati ano ki te he moku te hunga e haurangi mai ana ki a au.
- 9
- Kainga ana e ahau te pungarehu, ano he taro: whakananua iho taku wai ki te roimata;
- 10
- I to riri hoki, i to weriweri; nau hoki ahau i hapai ake, a taia iho ano ahau e koe.
- 11
- E rite ana oku ra ki te atarangi e whakawairua kau ana: a kua memenge ahau, ano he tarutaru.
- 12
- Ko koe ia, e Ihowa, te ora tonu ake ake, me te maharatanga ki a koe, tera whakatupuranga tera whakatupuranga.
- 13
- Tera koe e whakatika, e aroha ki a Hiona; kua taka mai hoki te wa, te tino wa, hei atawhainga atu i a ia.
- 14
- E manakohia ana hoki e o pononga ona kohatu, a e awangawanga ana ki tona puehu.
- 15
- Penei ka wehingia te ingoa o Ihowa e nga tauiwi, tou kororia hoki e nga kingi katoa o te whenua.
- 16
- Kei te hanganga a Ihowa i a Hiona te kitea ai tona kororia.
- 17
- Ka tahuri ia ki te inoi a te rawa-kore: e kore ano e whakahawea ki ta ratou inoi.
- 18
- Ka tuhituhia tenei mo to muri whakatupuranga: a ka whakamoemiti ki a Ihowa te iwi meake hangā.
- 19
- Mona i titiro mai i te tiketike o tona wahi tapu: i titiro iho a Ihowa i runga i te rangi ki te whenua.
- 20
- Ki te whakarongo ki te aue a te herehere, ki te wewete i te hunga kua motuhia mo te mate.
- 21
- Kia whakapuakina ai te ingoa o Ihowa i Hiona: me te whakamoemiti atu ki a ia i Hiruharama;
- 22
- I te huihuinga mai o nga iwi, o nga kingitanga, ki te mahi ki a Ihowa.
- 23
- Whakangoikoretia iho e ia toku kaha i te ara: whakatorutorua ana e ia oku ra.
- 24
- I mea ahau, E toku Atua, kaua ahau e tangohia i waenganui o oku ra: kei tera whakatupuranga ou tau.
- 25
- Nonamata te whenua i whakaturia ai e koe, a he mahi nga rangi na ou ringa.
- 26
- Ko era e hemo atu, ko koe ia e mau tonu: ka tawhitotia katoatia ano hoki me he weweru; ka whakaputaia ketia e koe, ano he kakahu, ae ra, ka whakaputaia ketia.
- 27
- Ko koe tonu koe, kahore hoki he mutunga o ou tau.
- 28
- Ka whai nohoanga nga tamariki a o pononga, ka whakapumautia ano o ratou uri ki tou aroaro.
Address: 
Phone: 
Email: