- 1
- Ka hari te hunga e tapatahi ana i te ara, e haere nei i te ture a Ihowa.
- 2
- Ka hari te hunga e whakarite ana i ana whakaaturanga; a e whakapaua ana o ratou ngakau ki te rapu i a ia.
- 3
- E kore ano hoki ratou e mahi i te kino; e haere ana ratou i ona ara.
- 4
- Kua oti matou te whakahau e koe kia ata pupuri i au akoranga.
- 5
- Aue, me i whakatikaia taku ara ki te pupuri i au tikanga!
- 6
- Ko reira ka kore ai e whakama: i a au ka whai whakaaro atu nei ki au whakahaunga katoa.
- 7
- Ka whakamoemiti ahau ki a koe i runga i te ngakau tika, ina ako ahau i au whakariteritenga tika.
- 8
- Ka puritia e ahau au tikanga: kaua ahau e whakarerea rawatia.
- 9
- Ma te aha ka whakama ai te taitamariki i tona ara? kia rite ki to kupu tana whakamaharatanga iho.
- 10
- Kua whakapaua e au toku ngakau ki te rapu i a koe: kei kotiti ke ahau i au whakahaunga.
- 11
- Kua hunā e ahau tau kupu ki roto ki toku ngakau, kei hara ahau ki a koe.
- 12
- E Ihowa, ka whakapaingia koe: whakaakona ahau ki au tikanga.
- 13
- Ka whakapuakina e oku ngutu: nga whakariteritenga katoa a tou mangai.
- 14
- Toku koa i te ara o au whakaaturanga, me te mea no nga taonga katoa.
- 15
- Ka whakaaroaro ahau ki au akoranga, a ka whai mahara ki ou huarahi.
- 16
- He oranga ngakau ki a au o tikanga: e kore ahau e wareware ki tau kupu.
- 17
- Kia atawhai ki to pononga; kia ora ai ahau, kia puritia ai hoki tau kupu.
- 18
- Whakatirohia oku kanohi kia kite ai ahau i nga mea whakamiharo i roto i to ture.
- 19
- He manene ahau i runga i te whenua: kaua au whakahaunga e hunā ki a au.
- 20
- Ka ngaro toku wairua i te matenuitanga atu ki au whakariteritenga i nga wa katoa.
- 21
- Kua riria e koe te hunga whakakake kua oti nei te kanga, e kotiti ke nei i au whakahaunga.
- 22
- Parea atu i a au te tawai me te whakahawea: kua whakaritea hoki e ahau au whakaaturanga.
- 23
- I noho ano hoki nga rangatira ki te korero kino moku: e whakaaro ana to pononga ki o tikanga.
- 24
- Ko āu whakaaturanga ano hoki toku oranga ngakau, me oku hoa whakatakoto whakaaro.
- 25
- Piri tonu toku wairua ki te puehu: kia rite ki to kupu to whakahauoranga i a au.
- 26
- I whakaaturia e ahau oku ara, a whakahoki kupu mai ana koe ki a au: whakaakona ahau ki o tikanga.
- 27
- Whakamatauria ahau ki te ara o au akoranga, a ka korerotia e ahau au mea whakamiharo.
- 28
- E maturuturu iho ana toku wairua i te pouri: kia rite ki tau kupu tau whakaunga ake i a au.
- 29
- Whakamataratia atu i a au te ara teka: kia atawhai mai hoki, a homai to ture.
- 30
- Kua whiriwhiria e ahau te ara o te pono: ka waiho e ahau au whakaritenga whakawa ki toku aroaro.
- 31
- Piri tonu ahau ki au whakaaturanga: e Ihowa, kei whakama ahau.
- 32
- Ka oma ahau i te ara o au whakahaunga, ina whakanuia e koe toku ngakau.
- 33
- E Ihowa, whakaakona ahau ki te ara o au tikanga: a ka whakaritea e ahau taea noatia te mutunga.
- 34
- Whakamatauria ahau, a ka puritia e ahau tau ture; ae, ka whakapaua toku ngakau ki te whakarite atu.
- 35
- Arahina ahau i te ara o au whakahaunga; ko taku hoki tena e whakaahuareka atu nei.
- 36
- Whakaangā toku ngakau ki au whakaaturanga; kaua hoki ki te apo.
- 37
- Whakatahuritia ketia oku kanohi kei kite i te horihori: whakahauorangia ahau i to ara.
- 38
- Whakapumautia to kupu ki to pononga, e wehi nei ki a koe.
- 39
- Kia pahure atu toku tawainga, e wehi nei ahau: e pai ana hoki au whakariteritenga whakawa.
- 40
- Tenei ahau te matenui atu nei ki au akoranga: whakahauorangia ahau i runga i tou tika.
- 41
- Kia puta mai ano hoki āu mahi tohu ki a au, e Ihowa: ara, to whakaoranga, kia rite ki to kupu.
- 42
- Penei ka whai kupu ahau ki toku kai tawai: noku ka whakawhirinaki atu ki tau kupu.
- 43
- Kaua e tangohia rawatia i toku mangai te kupu o te pono: e tumanako atu nei hoki ahau ki o whakaritenga whakawa.
- 44
- Penei ka puritia e ahau tau ture, ake ake.
- 45
- Ka haereere noa atu ano ahau; e rapua ana hoki e ahau au akoranga.
- 46
- Ka korerotia ano hoki e ahau au whakaaturanga ki te aroaro o nga kingi, e kore ano e whakama.
- 47
- Ka waiho ano e ahau hei oranga ngakau moku āu whakahaunga e aroha nei au.
- 48
- Ka torona atu ano oku ringaringa ki au whakahaunga e aroha nei ahau, whakaaroaro ano ki au tikanga.
- 49
- Maharatia te kupu ki to pononga, i meinga nei e koe hei tumanakotanga atu maku.
- 50
- Ko toku oranga ngakau tenei i a au e tangi nei: na to kupu nei hoki ahau i whakahauora.
- 51
- Nui rawa te whakahi ki a au o te hunga whakakake: kihai ahau i peka ke atu i to ture.
- 52
- I mahara ahau ki au whakariteritenga whakawa, e Ihowa, o tua iho; a marie ana toku ngakau.
- 53
- Ma pu ahau i te pahunu: kua whakarerea hoki to ture e te hunga kino.
- 54
- Hei himene maku au tikanga i te whare o toku nohoanga manenetanga.
- 55
- I mahara ahau ki tou ingoa i te po e Ihowa: a puritia ana e ahau to ture.
- 56
- I a au tenei, noku i whakarite i o akoranga.
- 57
- E Ihowa, ko koe toku wahi: kua mea nei ahau kia whakaritea e ahau au kupu.
- 58
- I whakapaua toku ngakau ki te inoi atu ki a koe kia pai mai: kia rite ki to kupu to mahi tohu ki a au.
- 59
- I whakaaro ahau ki oku ara: a anga ana oku waewae ki au whakaaturanga.
- 60
- I hohoro ahau, a kihai i whakaroa ki te whakarite i o whakahaunga.
- 61
- Karapotia putia ahau e nga ropu o te hunga kino: kihai ia ahau i wareware ki to ture.
- 62
- I waenganui po ka ara ahau ki te whakawhetai atu ki a koe mo au whakariteritenga tika.
- 63
- He hoa ahau no te hunga katoa e wehi ana i a koe: no te hunga ano e pupuri ana i au akoranga.
- 64
- E Ihowa, e ki ana te whenua i tau mahi tohu: whakaakona ahau ki o tikanga.
- 65
- Pai rawa tau hanga ki to pononga, e Ihowa; rite tonu ki to kupu.
- 66
- Whakaakona ahau ki te ngarahu pai, ki te matauranga: kua whakapono hoki ahau ki o whakahaunga.
- 67
- I a au kiano i whakawhiua, i he ahau: tena ko tenei ka puritia e ahau to kupu.
- 68
- E pai ana koe, a he pai o mahi: whakaakona ahau ki o tikanga.
- 69
- Kua titoa e te hunga whakakake he teka moku: ka whakapaua toku ngakau ki te whakarite i o akoranga.
- 70
- He ngako rawa o ratou ngakau, koia ano kei te taupa: ko ahau, he oranga ngakau ki a au tau ture.
- 71
- Marie ano ahau kia pehia e te pouri; i ako ai ahau i o tikanga.
- 72
- Ki a au, poka ke atu te pai o te ture a to mangai i nga mano o te koura, o te hiriwa.
- 73
- Na ou ringaringa ahau i hanga, i whakawhaiahua: whakamatauria ahau, kia ako ai ahau ki o whakahaunga.
- 74
- Kia hari te hunga e wehi ana i a koe ina kite i a au: noku i tumanako atu ki to kupu.
- 75
- E Ihowa, e matau ana ahau he tika o whakaritenga whakawa; a he pono nou i pehia ai toku ngakau e koe.
- 76
- Tena ra, waiho tau mahi tohu hei whakamarie moku; kia rite ki to kupu mai ki to pononga.
- 77
- Kia puta mai ki a au āu mahi aroha, kia ora ai ahau; ko tau ture hoki toku oranga ngakau.
- 78
- Kia whakama te hunga whakakake; no te mea kahore he rawa i he ai to ratou hanga ki a au: ko ahau ia ka whakaaroaro ki au akoranga.
- 79
- Kia anga mai ki a au te hunga e wehi ana ki a koe: me te hunga e mohio ana ki au whakaaturanga.
- 80
- Kia tapatahi toku ngakau ki au tikanga; kei whakama ahau.
- 81
- E mate nui ana toku wairua ki tau whakaoranga: ka tumanako atu ahau ki tau kupu.
- 82
- Matawaia ana oku kanohi he meatanga ki tau kupu, e mea ana, Ahea koe whakamarie ai i toku ngakau?
- 83
- Kua rite nei hoki ahau ki te koki i roto i paoa: he ahakoa e kore ahau e wareware ki au tikanga.
- 84
- Ehia nga ra o to pononga? ahea koe whakarite whakawa ai ki te hunga e tukino nei i ahau?
- 85
- Kua keri poka te hunga whakakake moku; he mea hoki kahore e rite ki tau ture.
- 86
- Pono tonu ana au whakahaunga katoa: e tukino pakupaku ana ratou ki a au; awhinatia mai ahau e koe.
- 87
- Wahi iti kua moti ahau i a ratou i runga i te whenua: otira kihai i mahue i a au āu akoranga.
- 88
- Kia rite ki tou aroha to whakahauoranga i a au: a ka puritia e ahau nga whakaaturanga a tou mangai.
- 89
- Pumau tonu to kupu, e Ihowa, i runga i te rangi.
- 90
- Kei tera whakatupuranga, kei tera whakatupuranga tou pono: whakaungia ana e koe te whenua, a e tu nei ano.
- 91
- E tu nei ano inaianei, pera tonu me tau i whakarite ai: he pononga katoa hoki ena mea nau.
- 92
- Me kaua tau ture hei oranga mo toku ngakau, kua ngaro ahau i reira i taku auetanga.
- 93
- E kore ahau e wareware ki au akoranga ake ake, kua whakahauorangia hoki ahau e koe ki ena mea.
- 94
- Nau ahau, mau ahau e whakaora: kua rapua hoki e ahau au akoranga.
- 95
- Kua whangā nei ahau e te hunga kino kia whakamatea: ka whakaaro ahau ki au whakaaturanga.
- 96
- Kua kitea e ahau te mutunga o nga mea tino tika katoa: he nui rawa ia tau ture.
- 97
- Ano toku aroha ki to ture! ko taku tena e whakaaroaro ai i te roa o te ra.
- 98
- Nau, i hira ake ai aku whakaaro i a oku hoa riri, na o whakahaunga e piri tonu nei ki a au.
- 99
- Nui oku mahara i o oku kai whakaako katoa: noku i whakaaroaro nei ki o whakaaturanga.
- 100
- Tera atu toku mohiotanga i to nga kaumatua: no te mea e whakaritea ana e ahau au akoranga.
- 101
- Kua kaiponuhia mai e ahau oku waewae i nga ara kino katoa, kia pupuri ai ahau i tau kupu.
- 102
- Kihai ahau i whakarere i au whakaritenga whakawa; nau hoki ahau i ako.
- 103
- Ano te reka o au kupu ki toku ngao; nui atu i te honi ki toku mangai.
- 104
- Na o akoranga ahau i whai mohio ai: na reira ahau i kino ai ki nga ara teka katoa.
- 105
- He rama to kupu ki oku waewae, he māramatanga ki toku ara.
- 106
- Kua oati ahau, a ka whakamanā ano e ahau: kia puritia e ahau au whakariteritenga tika.
- 107
- He nui te mamae o toku ngakau: e Ihowa, whakahauorangia ahau; kia rite ki to kupu.
- 108
- Manakohia mai, e Ihowa, nga ohaohatanga a toku mangai, whakaakona ahau ki au whakaritenga whakawa.
- 109
- Kei toku ringaringa tonu toku wairua: heoi, kahore ahau e wareware ki tau ture.
- 110
- Kua whakatakotoria e te hunga kino he mahanga moku: heoi kahore ahau i peka ke atu i au akoranga.
- 111
- Ka waiho e ahau au whakaaturanga hei kāinga tupu moku ake ake: ko toku koanga ngakau hoki ena.
- 112
- Ka whakaangā e ahau toku ngakau ki te mahi tonu i au tikanga: a te mutunga ra ano.
- 113
- E whakakino ana ahau ki nga whakaaro teka; ko tau ture ia taku e aroha ai.
- 114
- Ko koe toku piringa me toku whakangungu rakau: e tumanako atu ana ahau ki to kupu.
- 115
- Mawehe atu i a au, e te hunga kino; ka whakaritea hoki e ahau nga whakahaunga a toku Atua.
- 116
- Kia rite ki tau kupu tau tautokonga i a au, kia ora ai ahau: kaua hoki ahau e tukua kia whakama ki taku e tumanako atu nei.
- 117
- Puritia ake ahau, kia ora ai ahau: a ka whai whakaaro tonu ahau ki o tikanga.
- 118
- Kua takahia e koe ki raro te hunga katoa e kotiti ke ana i o tikanga; he horihori hoki to ratou tinihanga,
- 119
- Ka whakakahoretia e koe te hunga kino katoa o te whenua, ano he para matā: koia ahau i aroha ai ki o whakaaturanga.
- 120
- Wiri tonu oku kikokiko i te wehi ki a koe; e mataku ana hoki ahau ki o whakaritenga whakawa.
- 121
- He whakarite whakawa, he tika taku mahi: kaua ahau e tukua atu ki oku kai tukino.
- 122
- Ko koe hei whakakapi mo to pononga mo te pai: kei tukinotia ahau e te hunga whakakake.
- 123
- Matawaia ana oku kanohi i te meatanga ki tau whakaoranga, ki te kupu ano hoki o to tika.
- 124
- Kia rite ki to aroha to mahi ki to pononga: whakaakona hoki ahau ki o tikanga.
- 125
- Ko ahau to pononga; whakawhaimaharatia mai ahau, kia matau ai ahau ki au whakaaturanga.
- 126
- Kua rite te wa hei mahinga ma Ihowa; kua whakakahoretia hoki e ratou to ture.
- 127
- No reira i arohaina rawatia ai e ahau au whakahaunga i te koura, ae, i te tino koura.
- 128
- No reira tika tonu ki a au o akoranga katoa mo nga mea katoa: kino iho ano ahau ki nga ara teka katoa.
- 129
- He mea whakamiharo au whakaaturanga: koia ka whakaritea ai e toku wairua.
- 130
- He mea whakamārama te whakapuakanga o au kupu, he mea whakawhaimahara i nga kuare.
- 131
- I hamama toku mangai, i kihakiha: he matenui hoki noku ki au whakahaunga.
- 132
- Titiro mai ki a au, tohungia hoki ahau: kia rite ki tau hanga ki te hunga e aroha ana ki tou ingoa.
- 133
- Whakatikaia aku hikoinga ki runga i tau kupu: kaua hoki tetahi he e tukua hei rangatira moku.
- 134
- Whakaorangia ahau i te tukinotanga a te tangata: a ka puritia e ahau o akoranga.
- 135
- Kia mārama mai tou mata ki to pononga: whakaakona hoki ahau ki au tikanga.
- 136
- Heke noa nga awa wai o oku kanohi; no te mea kahore e puritia e ratou tau ture.
- 137
- E tika ana koe, e Ihowa, a e tika ana au whakaritenga whakawa.
- 138
- He tika, he pono rawa au whakaaturanga i whakahaua mai e koe.
- 139
- Ka ngaro ahau i toku ngakau whakapuke, mo au kupu ka wareware nei i oku hoa riri.
- 140
- Hore rawa he para o to kupu: koia i arohaina ai e to pononga.
- 141
- He iti ahau, e whakahaweatia ana: heoi kahore e wareware ki au akoranga.
- 142
- He tika pumau tonu tou tika; a he pono tau ture.
- 143
- Kua pa mai ki ahau te pouri me te mamae: ko āu whakahaunga ia toku oranga ngakau.
- 144
- Pumau tonu te tika o au whakaaturanga: whakawhaimaharatia mai ahau, a ka ora ahau.
- 145
- I whakapaua toku ngakau ki te karanga; whakahokia mai he kupu ki a au, e Ihowa; ka whakaritea e ahau au tikanga.
- 146
- I karanga atu ahau ki a koe: whakaorangia ahau, a ka puritia e ahau au whakaaturanga.
- 147
- Kiano te ata i puao noa, kua karanga ahau: i tumanako atu ahau ki tau kupu.
- 148
- I hohoro oku kanohi i nga mata‑aratanga ki te whakaaroaro ki tau kupu.
- 149
- Whakarongo ki toku reo, kia rite ki tou aroha: kia rite, e Ihowa, ki to whakaritenga whakawa to whakahauoranga i a au.
- 150
- E whakatata mai ana te hunga, e whai ana i te mahi nanakia: kei tawhiti atu ratou i tau ture.
- 151
- E tata ana koe, e Ihowa: he pono katoa ano hoki au whakahaunga.
- 152
- Nonamata ahau i matau ai ki au whakaaturanga, he mea whakapumau nau no tua whakarere.
- 153
- Whakaaroa toku matenga, a whakaorangia ahau: kahore hoki ahau e wareware ki tau ture.
- 154
- Whakatikaia taku whakawakanga, whakaorangia hoki ahau: kia rite ki to kupu to whakahauoranga i a au.
- 155
- Kei tawhiti atu i te hunga kino te whakaoranga: kahore hoki ratou e rapu ki au tikanga.
- 156
- E Ihowa, e nui ana au mahi tohu: kia rite ki au whakaritenga whakawa to whakahauoranga i a au.
- 157
- He tokomaha oku kai tukino, me oku hoa riri: kahore ahau e peka atu i au whakaaturanga.
- 158
- I kite ahau i nga kai mahi i te kino, a pouri iho ahau: no ratou kahore e whakarite i tau kupu.
- 159
- Tirohia mai toku aroha ki au akoranga: kia rite ki tou aroha, e Ihowa, tau whakahauoranga i a au.
- 160
- Pono tonu tau kupu no te timatanga ra ano: pumau katoa ano hoki au whakariteritenga tika ake ake.
- 161
- Hore he rawa i tukinotia ai ahau e nga rangatira: heoi e wehi ana toku ngakau i tau kupu.
- 162
- Hari tonu ahau ki tau kupu: ano he tangata kua whiwhi ki te taonga nui.
- 163
- E kino ana ahau, e whakarihariha ana ki te korero teka: ko tau ture taku i aroha ai.
- 164
- Takiwhitu aku whakamoemititanga ki a koe i te ra tahi mo au whakariteritenga tika.
- 165
- He marietanga nui to te hunga e aroha ana ki tau ture: e kore hoki o ratou waewae e tūtuki.
- 166
- E tumanako atu ana ahau ki tau whakaoranga, e Ihowa, e mahi ana hoki i au whakahaunga.
- 167
- Kua puritia e toku wairua au whakaaturanga, ae, e arohaina nuitia ane e ahau.
- 168
- Kua puritia e ahau au akoranga me au whakaaturanga: kei tou aroaro hoki oku ara katoa.
- 169
- Kia tata atu taku tangi ki to aroaro, e Ihowa: kia rite ki to kupu to whakawhaimaharatanga i a au.
- 170
- Kia tae atu taku inoi ki tou aroaro: kia rite ki tau kupu tau whakaoranga i a au.
- 171
- Ka whakapuaki whakamoemiti oku ngutu: ua oti ahau te whakaako e koe ki o tikanga.
- 172
- Ma toku arero e korero to kupu: he tika hoki au whakahaunga katoa.
- 173
- Kia awhinatia mai ahau e tou ringaringa: kua whiriwhiria hoki e ahau au akoranga.
- 174
- E matenui atu ana ahau ki tau whakaoranga, e Ihowa: ko tau ture hoki toku oranga ngakau.
- 175
- Kia ora toku wairua, a ka whakamoemiti atu ki a koe: kia awhinatia mai hoki ahau e au whakaritenga whakawa.
- 176
- Kua kotiti ke ahau me te hipi ngaro: rapua to pononga, e kore hoki ahau e wareware ki au whakahaunga.
Address: 
Phone: 
Email: