- 1
- (Ki te tino kai whakatangi. He himene na Rawiri.) Ka hari te Kingi ki tou kaha, e Ihowa; ano te nui o tona whakamanamana ki tau whakaoranga!
- 2
- Kua homai e koe ki a ia ta tona ngakau i hiahia ai; kihai ano i kaiponuhia e koe ta ona ngutu i inoi ai. Hera.
- 3
- Kei mua nei hoki koe i a ia e homai ana i nga manaakitanga papai; karaunatia ana e koe tona mahunga ki te tino koura.
- 4
- He ora tana i inoi ai i a koe, a kua homai e koe ki a ia, he roa noa atu nga ra ake ake.
- 5
- He nui tona kororia i tau whakaoranga: taupokina ana ia e koe ki te honore, ki te kororia.
- 6
- Nau hoki ia i mea kia manaakitia rawatia ake ake: whakaharitia ana ia e koe ki te koa o to mata.
- 7
- E whakawhirinaki ana hoki te Kingi ki a Ihowa; e kore ano ia e whakangaueuetia, he atawhai hoki no te Runga-rawa.
- 8
- Ka mau i to ringa o hoa riri katoa: ka mau i to ringa matau te hunga e kino ana ki a koe.
- 9
- Ka meinga ratou e koe, kia rite ki te oumu kapura i te wa e riri ai koe: e horomia ratou e Ihowa ina weriweri ia, a ma te kapura ratou e kai.
- 10
- Ka whakamotitia atu e koe o ratou hua i runga i te whenua, o ratou uri i waenganui o nga tamariki a te tangata.
- 11
- No te mea he kino ta ratou i whakatakoto ai mou, he mahi nanakia ta ratou i whakaaro ai, kihai nei i taea e ratou.
- 12
- Mo reira ka meinga e koe kia tahuri o ratou tuara, ina whakatikaia e koe o pere i runga i o aho ki o ratou mata.
- 13
- Ka whakanuia koe, e Ihowa, i runga i to kaha: ka waiata matou, ka himene atu ki tou nui.
Address: 
Phone: 
Email: