- 1
- (Ki te tino kai whakatangi, ki a Ierutunu. He himene na Rawiri.) He pono tatari ana toku wairua ki te Atua: kei a ia te whakaoranga moku.
- 2
- Ko ia anake toku kohatu me toku whakaoranga, toku pa hoki, e kore e nui toku ngaueuetanga.
- 3
- Kia pehea te roa o ta koutou tatauranga ki te tangata? ka patua koutou katoa; ka rite ki te taiepa kua wharara, ki te wawa oioi noa.
- 4
- Heoi ano ta ratou e runanga ai ko te turaki i a ia i tona wahi teitei: e whakaahuareka ana ratou ki te teka; e manaaki ana o ratou mangai, a e kanga ana a roto i a ratou. Hera.
- 5
- Tatari marie, e toku wairua, ki te Atua anake: ko ia anake taku e tumanako atu nei.
- 6
- Ko ia anake toku kohatu, me toku whakaoranga, toku pa hoki; e kore ahau e whakangaueuetia.
- 7
- Kei te Atua te whakaoranga moku, te kororia ano moku; kei te Atua te kohatu o toku kaha, me toku piringa.
- 8
- Whakawhirinaki atu ki a ia i nga wa katoa; ringihia, e te iwi, o koutou ngakau ki tona aroaro: hei piringa mo tatou te Atua. Hera.
- 9
- He pono he mea memeha noa nga ware, he teka noa nga rangatira: ki te paunatia ratou, māmā noa ake ratou tahi te horihori.
- 10
- Kaua e whakawhirinaki ki te tukino, kei wairangi hoki ki te pahua: ki te tini haere nga taonga, kei whakamanawa atu o koutou ngakau ki reira.
- 11
- Kotahi korerotanga a te Atua, ka rua oku rongonga i tenei, No te Atua te kaha.
- 12
- Nau ano hoki, e te Ariki, te mahi tohu: rite tonu hoki ki tana mahi tau utu ki te tangata.