- 1
- (Ki te tino kai whakatangi. He himene, he waiata.) Hamama, e nga whenua katoa, ki te Atua:
- 2
- Himenetia te kororia o tona ingoa, meinga kia kororiatia te whakamoemititanga ki a ia.
- 3
- Mea atu ki te Atua, Ano te wehi o au mahi! Nui tonu tou kaha i ngohengohe ai ou hoa riri ki a koe.
- 4
- E koropiko katoa te whenua ki a koe; ka himene atu ki a koe; ka himene ratou ki tou ingoa. Hera.
- 5
- Haere mai kia kite i nga mahi a te Atua: mataku rawa tana mahi ki nga tamariki a te tangata.
- 6
- Nana i mea te moana hei tuawhenua: haere a waewae ana ratou ra roto i te roma; hari ana matou ki a ia i reira.
- 7
- Tona kawanatanga, tūturu tonu i runga i tona kaha; e titiro ana ona kanohi ki nga tauiwi; kei whakakake te hunga tutu. Hera.
- 8
- Whakapaingia to tatou Atua, e nga iwi; kia rangona te reo whakamoemiti ki a ia.
- 9
- Nana nei hoki i mau ai to tatou wairua ki te ora, kahore hoki e tukua e ia o tatou waewae kia nekehia.
- 10
- Kua whakamatautauria hoki matou e koe, e te Atua: whakarewaia ana matou e koe, ano he hiriwa e whakarewaia ana.
- 11
- Kua kawea nei matou e koe ki roto ki te kupenga: whakapikaua ana e koe te mea whakaaue ki runga ki o matou hope.
- 12
- I meinga ano e koe o matou upoko kia ekengia hoihotia e te tangata; i ra roto matou i te kapura, i te wai: heoi whakaputaina mai ana matou e koe ki te wahi momona.
- 13
- Ka tomo atu ahau me nga tahunga tinana ki tou whare; ka whakamana ahau i aku kupu taurangi ki a koe,
- 14
- Era i puaki i oku ngutu, i korerotia e toku mangai i a au e pouri ana.
- 15
- Ka whakaekea atu e ahau mau nga mea momona hei tahunga tinana, ngatahi ano me te mea kakara; ka tukua e au nga hipi toa, nga puru me nga koati. Hera.
- 16
- Haere mai, whakarongo, e koutou katoa e wehi ana ki te Atua, a maku e whakapuaki atu tana i mea ai ki toku wairua.
- 17
- I tangi atu toku mangai ki a ia: i whakanuia ano ia e toku arero.
- 18
- Ki te whakaaroa e ahau te hara i toku ngakau: e kore te Ariki e whakarongo mai.
- 19
- Nei ra he pono kua whakarongo mai te Atua ki a au, kua tahuri mai ia ki toku reo inoi.
- 20
- Kia whakapaingia te Atua, kihai nei i whakapeau ke i taku inoi, i tona atawhai hoki ki a au.