- 1
- (Ki te tino kai whakatangi. He himene, he waiata na Rawiri.) Kia ara te Atua, kia whakamararatia ona hoa riri: kia whati hoki i tona aroaro te hunga e kino ana ki a ia.
- 2
- Aia atu ratou e koe, peratia me te paowa e aia ana: kia rite ki te ware pi e rewa ana i te kapura, te ngaromanga o te hunga kino i te aroaro o te Atua.
- 3
- Kia koa ia te hunga tika; kia hari ratou i te aroaro o te Atua: ae ra, kia tino hari pu ratou.
- 4
- Waiata atu ki te Atua, himenetia tona ingoa; e ekengia ana e ia nga rangi hei hariata, whakanuia ia, ara, tona ingoa a IHA, kia hari hoki ki tona aroaro.
- 5
- Hei matua mo nga pani, hei kai whakarite whakawa mo nga pouaru, te Atua i tona nohoanga tapu.
- 6
- E whakanohoia ana e te Atua te hunga mokemoke ki te whare; e whakaputaina mai ana e ia te hunga kua oti te here ki nga mekameka: te hunga tutu ia e noho i te wahi wai-kore.
- 7
- E te Atua, i tou haerenga atu i mua i to iwi: i to haerenga i te koraha; Hera:
- 8
- I wiri te whenua, i tuturu iho ano nga rangi i te aroaro o te Atua, me taua Hinai ano i te aroaro o te Atua, o te Atua o Iharaira.
- 9
- I taia mai, e koe, e te Atua, he ua nui; a i tou kāinga e ruwha ana ka whakaukia e koe.
- 10
- I noho to whakaminenga ki reira: na tou pai, e te Atua, i mea kai ai koe ma te hunga rawa-kore.
- 11
- Te homaitanga o te kupu a te Ariki: he nui te ope hei whakapuaki.
- 12
- Whati rawa nga kingi o nga taua: te wahine i noho i te whare nana i tuwha nga parakete.
- 13
- Ahakoa takoto noa koutou i waenganui i nga turanga kohua, e rite koutou ki te kukupa kua paparuatia nei nga pakau ki te hiriwa, ona hou ano hoki ki te koura whero.
- 14
- I ta te Kaha-rawa whakamararatanga i nga kingi i taua wahi, koia ano kei te hukarere o Taramona te ma.
- 15
- Kei Maunga Pahana te rite o te maunga o te Atua; he maunga tiketike me Maunga Pahana.
- 16
- He aha koutou ka mokowhiti ai, e nga maunga tiketike? ko te maunga tenei e hiahiatia nei e te Atua kia nohoia e ia: ae, ka nohoia e Ihowa ake ake.
- 17
- Nga hariata o te Atua, e rua tekau mano, mano mano iho; kei roto i a ratou te Ariki, me te mea ko Hinai, ko te wahi tapu.
- 18
- Kua kake atu koe ki runga, kua whakaraua e koe te whakaraunga: kua riro mai i a koe nga ohaohatanga mo te tangata; ae, mo te hunga tutu ano hoki, kia noho ai a Ihowa te Atua i waenganui i a ratou.
- 19
- Kia whakapaingia te Ariki, e whakawaha nei i a tatou ki nga mea papai i tenei ra, i tenei ra, te Atua o to tatou whakaoranga. Hera.
- 20
- Ko to tatou Atua te Atua o te whakaoranga: na Ihowa ano, na te Ariki, nga putanga ake i te mate.
- 21
- Ka maru ia i te Atua te mātenga o ona hoa riri: me te tumuaki huruhuru o te tangata e haere tonu ana i roto i ana kino.
- 22
- I mea te Ariki, Ka whakahokia mai ano e ahau i Pahana, ka whakahokia mai ano e ahau toku iwi i nga rire o te moana.
- 23
- Kia toua ai tou waewae ki nga toto o ou hoa riri, me nga arero o o kuri ki taua mea ra ano.
- 24
- I kite ratou, e te Atua, i o haerenga, i nga haerenga o toku Atua, o toku Kingi, i te wahi tapu.
- 25
- I haere nga kai waiata i mua, i muri mai ko nga kai whakatangi, i waenganui ko nga kotiro e patupatu ana i nga timipera.
- 26
- Whakapaingia te Atua i roto i nga whakaminenga, te Ariki hoki, e nga mea i puta mai i te matapuna o Iharaira.
- 27
- Ko Peniamine tena ko te tamaiti o muri rawa, ko to ratou ariki, nga rangatira o Hura, me to ratou ropu, nga rangatira o Hepurona, me nga rangatira o Napatari.
- 28
- Kua oti he kaha mou te whakahau iho e tou Atua: whakaukia, e te Atua, tau i mea ai mo matou.
- 29
- Ka maua mai e nga kingi nga hakari ki a koe, hei mea mo to temepara i Hiruharama.
- 30
- Riria nga kirehe o nga kakaho, te huinga o nga puru, me nga kuao kau, ara, te iwi, kia whakangohengohe mai ra ano ratou, me te kawe mai ano i nga pīhi hiriwa: whakamararatia nga iwi e whakaahuareka ana ki te whainga.
- 31
- E puta mai nga rangatira i Ihipa: meake whakamarokia e Etiopia ona ringaringa ki te Atua.
- 32
- Waiata atu ki te Atua, e nga rangatiratanga o te whenua: himene atu ki te Ariki; Hera.
- 33
- Ki a ia nei ko tona hariata ko nga rangi o nga rangi onamata: na, ka puaki tona reo, he reo kaha.
- 34
- Waiho te kaha i te Atua, kei runga nei i a Iharaira tana mahi rangatira: kei nga kapua hoki tona kaha.
- 35
- Ka wehingia atu koe, e te Atua, i roto i o wahi tapu: ko te Atua o Iharaira te kai homai i te kaha, i te mana, ki te iwi. Whakapaingia te Atua.
Address: 
Phone: 
Email: