- 1
- Ko koe taku e whakawhirinaki ai e Ihowa: kei whakama ahau ake ake.
- 2
- Whakaorangia ahau, i runga i tou tika, kia mawhiti atu ano ahau: tahuri mai tou taringa ki a au, whakaorangia hoki ahau.
- 3
- Kia ai koe hei teko e noho ai ahau, hei hokihokinga tonutanga atu maku: kua kiia iho ahau e koe kia whakaorangia: ko koe nei hoki toku kohatu me toku pourewa.
- 4
- Whakaorangia ahau, e toku Atua, i te ringaringa o te tangata kino, i te ringaringa o te tangata mahara-kore, o te tangata nanakia.
- 5
- Ko koe nei hoki, e te Ariki, e Ihowa, taku e tumanako atu nei, taku e whakawhirinaki atu nei no toku taitamarikitanga ake ano.
- 6
- Nau ahau i tautoko ake no te kopu mai ano; nau ahau i tango mai i roto i nga whekau o toku whaea; ko koe taku e whakamoemiti tonu atu ai.
- 7
- He miharotanga ahau na te tini; ko koe ia toku piringa kaha.
- 8
- Kia ki toku mangai i te whakamoemiti ki a koe, i tou honore hoki i te roa o te ra.
- 9
- Kaua ahau e pangā atu a te wa o te koroheketanga, kaua ahau e whakarerea ina hemo toku kaha.
- 10
- E korerotia kinotia ana hoki ahau e oku hoa riri, a e runanga tahi ana te hunga e whanga ana kia whakamatea ahau.
- 11
- E mea ana, Kua whakarerea ia e te Atua: whaia, hopukia; kahore hoki tetahi hei whakaora.
- 12
- E te Atua, kei matara atu koe i a au: e toku Atua, hohoro mai ki te awhina i a au.
- 13
- Kia whakama, kia pau, nga hoa riri o toku wairua: kia hipokina ki te tawainga, ki te whakama, te hunga e rapu ana i te hē moku.
- 14
- Ko au ia ka tumanako tonu atu: ka hono tonu ano hoki te whakamoemiti atu ki a koe.
- 15
- Ma toku mangai e whakakite atu tou tika, tau whakaoranga i te roa o te ra; kahore hoki ahau e mohio ehia ranei.
- 16
- Ka haere ahau i runga i te kaha o te Ariki, o Ihowa, ka whakahuatia e ahau tou tika, tou anake.
- 17
- E te Atua, he mea whakaako ahau nau, no toku tamarikitanga ake ano; a he whakapuaki taku i āu mahi whakamiharo, a, mohoa noa nei.
- 18
- Na, kaua ahau e whakarerea, e te Atua, a koroheke noa, hina noa ahau, kia whakakitea ra ano e ahau tou kaha ki tenei whakatupuranga, tou nui ki nga tangata katoa e puta mai amua.
- 19
- Kei runga rawa ano hoki tou tika, e te Atua, he nui nei hoki au mahi: e te Atua, ko wai te rite ana ki a koe?
- 20
- He nui, he kino nga pouritanga ngakau i whakakitea mai e koe ki a au; tera ano koe ka whakahauora i a au, ka whakahoki ake ano hoki i a au i nga wahi hohonu o te whenua.
- 21
- Ka whakaraneatia e koe toku nui: ka karapotia hoki ahau e koe ki te whakamarietanga.
- 22
- Ka whakamoemiti ano hoki ahau ki a koe i runga i te hatere, ara, ki tou pono, e toku Atua: ka himene atu ahau ki a koe i runga i te hāpa, e te mea Tapu o Iharaira.
- 23
- Ka tino hari oku ngutu ua himene atu ahau ki a koe: me toku wairua ano i hokoa nei e koe.
- 24
- Ka korerotia ano hoki e toku arero tou tika i te roa o te ra: kua whakama nei hoki, kua numinumi kau te hunga i rapu i te he moku.
Address: 
Phone: 
Email: