- 1
- (He Makiri na Ahapa.) E te Atua, he aha i pangā ai matou e koe ake ake? he aha i pongere ai to riri ki nga hipi o to parae?
- 2
- Mahara ki to whakaminenga i hokoa nei e koe i mua, ki te iwi o tou kāinga tupu, i utua e koe; ki tenei maunga Hiona i nohoia nei e koe.
- 3
- Hiki ake ou waewae ki nga whakangaromanga e mau tonu nei, ki nga mahi kino katoa a te hoa riri i te wahi tapu.
- 4
- E hamama ana ou hoa riri i waenganui i o whakaminenga, e whakaturia ana e ratou a ratou tohu hei tohu.
- 5
- I whai ingoa ai te tangata i mua, na te hapai titaha ki nga rakau pururu.
- 6
- Inaianei ia e pakarua ana e ratou ona mea whakairo, a poto ake, ki nga titaha, ki nga hama.
- 7
- Kua toua tou wahi tapu e ratou ki te kapura, noa iho i a ratou te nohoanga o tou ingoa; kei te whenua e takoto ana.
- 8
- I mea o ratou ngakau, Me whakangaro ratou, a poto ake: kua tahuna e ratou nga whare huihui katoa o te Atua i te whenua.
- 9
- Kahore matou e kite i o matou tohu, kahore atu he poropiti, kahore hoki tetahi o matou e matau ana kia pehea ake te roa.
- 10
- E te Atua, kia pehea ake te roa o te tawainga a te hoa riri? ka kohukohu ranei te hoa riri ki tou ingoa ake ake?
- 11
- He aha i pepeke atu ai tou ringa, tou ringa matau hoki? unuhia ake i roto i tou uma.
- 12
- Ko te Atua hoki toku Kingi o tua iho, e mahi whakaora ana i waenganui i te whenua.
- 13
- Nau, na tou kaha i wawae te moana: pakaru ana i a koe nga mātenga o nga tarakona i nga wai.
- 14
- Mongamonga noa i a koe nga mātenga o rewiatana: a hoatu ana ia e koe hei kai ma te iwi o te koraha.
- 15
- I wahia e koe te puna me te roma; mimiti ake i a koe nga awa nunui.
- 16
- Nau te ao, nau hoki te po; nau i whiti ai te māramatanga me te ra.
- 17
- Nau i whakatu nga rohe katoa o te whenua: te raumati me te hotoke, he mea whakarite ena nau.
- 18
- Kia mahara ki tenei, kua tawai te hoa riri, e Ihowa: kua kohukohu ano te hunga poauau ki tou ingoa.
- 19
- Kaua e tukua atu te wairua o to kukupa ki te kirehe: kei wareware tonu ki te whakaminenga o o rawa-kore.
- 20
- Whakaaroa te kawenata; kua kikī hoki nga wahi pouri o te whenua i nga nohoanga nanakia.
- 21
- Kei hoki whakama te tangata e tukinotia ana: kia whakamoemititia tou ingoa e te ware, e te rawa-kore.
- 22
- E ara, e te Atua, tohea to tohe: mahara ki ta te tangata poauau tawainga ki a koe i nga ra katoa.
- 23
- Kei wareware ki te reo o ou hoa riri: e kake tonu ana te ngangau a te hunga e whakatika mai ana ki a koe.
Address: 
Phone: 
Email: