- 1
- (He waiata na Mohi tangata a te Atua.) E te Ariki, ko koe to matou nohoanga, i tera whakatupuranga, i tera whakatupuranga.
- 2
- Kahore ano i whanau noa nga maunga, kahore i hangā e koe te whenua me te ao, ko koe ano te Atua no tua whakarere, a ake tonu atu.
- 3
- E whakahokia ana e koe te tangata kia mongamonga noa, a, e mea ana, Hoki atu, e nga tamariki a te tangata.
- 4
- Ki tau titiro hoki, e rite ana nga tau kotahi mano ki te rangi onanahi, kua pahure atu nei, ki te mataaratanga hoki i te po.
- 5
- Me te mea na te waipuke tau kahakinga i a ratou, he moe ratou: i te ata, ano he tarutaru e tupu ana.
- 6
- I te ata e tupu ana, e pihi ana: i te ahiahi kua kotia, kua maroke.
- 7
- Kua hemo nei hoki matou i tau riri: ka ohorere hoki i to aritatanga.
- 8
- Kua makā e koe a matou kino ki tou aroaro, ā matou mea huna ki te māramatanga o tou mata.
- 9
- Ka pau o matou ra katoa, me te riri ano koe: ka hemo ake o matou tau, ano he korero e korerotia ana.
- 10
- Nga ra o o matou tau e whitu tekau tau; a ki te whai kaha, a ka waru tekau nga tau; heoi he mahi mauiui, he pouri to ratou kaha; ka hohoro hoki te hatepea atu, a ka rere atu matou.
- 11
- Ko wai te matau ana ki te kaha o tau riri? rite pu ano ki te wehi ki a koe tau riri.
- 12
- Akona matou ki te tatau i o matou ra, kia anga ai te ngakau ki te whakaaro.
- 13
- Hoki mai, e Ihowa, kia pehea ake te roa? a kia puta ke he whakaaro mau ki o pononga.
- 14
- Kia na wawe matou i tau mahi tohu: kia hari ai matou, kia koa ai, i o matou ra katoa.
- 15
- Whakaharitia matou, kia rite ki nga ra i whakawhiua ai matou e koe, ki nga tau i kite ai matou i te kino.
- 16
- Kia puta mai tau mahi ki o pononga, me tou kororia ki ā ratou tamariki.
- 17
- A hei runga i a matou te ataahuatanga o Ihowa, o to matou Atua: whakapumautia ano ki a matou, te mahi a o matou ringaringa, ae ra, te mahi a o matou ringaringa, whakapumautia e koe.
Address: 
Phone: 
Email: