- 1
- Na, kua homai ki a au he kakaho e rite ana ki te tokotoko: a ka tu te anahera, ka mea mai, E ara, whangangā te whare o te Atua, me te āta, me te hunga e koropiko ana i roto.
- 2
- Me whakarere ia ki waho te marae i te taha ki waho o te whare tapu, kaua ia e whangangā; kua hoatu hoki ki nga tauiwi: a e takatakahia e ratou te pa tapu e wha tekau ma rua nga marama.
- 3
- A maku e hoatu he tikanga ki aku kai whakaatu tokorua, a e poropiti raua kotahi mano e rua rau e ono tekau nga ra, he kakahu taratara ano te kakahu.
- 4
- Ko nga oriwa e rua enei, me nga turanga rama e rua, e tu nei i te aroaro o te Atua o te whenua.
- 5
- A ki te mea tetahi ki te tukino i a raua, ka puta mai he kapura i roto i o raua mangai, e pau ai o raua hoa riri: ki te mea hoki tetahi ki te tukino i a raua, ko te whakamatenga tenei mona.
- 6
- Kei a raua te tikanga mo te kopani i te rangi, kia kaua e ua te ua i nga ra o ta raua poropititanga: kei a raua ano te tikanga mo te whakaputa ke i nga wai hei toto, mo te patu ano i te whenua ki nga patunga katoa, i nga wa katoa e pai ai raua.
- 7
- Ano ka mutu ta raua whakaatu, ka whawhai ki a raua te kararehe e haere ake ana i roto i te poke torere, a e taea raua e ia, e whakamatea raua.
- 8
- Ka takoto ano o raua tinana ki te huarahi o te pa nui, e karangatia wairuatia nei ko Horoma ko Ihipa, ki te wahi hoki i ripekatia ai to tatou Ariki.
- 9
- A e toru nga ra me te hawhe e tirohia ai o raua tinana e nga huihuinga tāngata, e nga hapu, e nga reo, e nga iwi, e kore ano hoki e tukua o raua tinana kia hoatu ki te urupa.
- 10
- A e koa ki a raua te hunga e noho ana ki te whenua, e hari, e hoatu ano he mea hoatu noa e tetahi ki tetahi; no te mea i whakamamae enei poropiti tokorua i te hunga e noho ana i te whenua.
- 11
- A muri iho i nga ra e toru me te hawhe, ka tapoko te manawa ora ki a raua, he mea na te Atua, a ka tu o raua waewae ki runga; nui atu hoki te wehi i pa ki te hunga e titiro ana ki a raua.
- 12
- A ka rongo raua i te reo nui, i te rangi, e mea ana ki a raua, Haere ake korua ki konei. Na, haere atu ana raua ki te rangi i roto i te kapua; me te titiro ano o raua hoa riri ki a raua.
- 13
- I taua haora ano nui atu te ru, a ka hinga te wahi whakatekau o te pa, a e whitu mano tāngata i mate i taua ru: na, ka mataku era atu, a hoatu ana e ratou he kororia ki te Atua o te rangi.
- 14
- Kua pahemo te rua o nga aue; na, ka hohoro te toru o nga aue te haere mai.
- 15
- Ka whakatangi ano te whitu o nga anahera; na, he nui nga reo i te rangi, e mea ana, Kua riro nga rangatiratanga o te ao i to tatou Ariki, i tona Karaiti hoki; a ko ia hei kingi ake ake ake.
- 16
- Na, nga kaumatua e rua tekau ma wha, e noho ana i te aroaro o te Atua i runga i o ratou torona, ka takoto ratou ko o ratou kanohi ki raro, ka koropiko ki te Atua,
- 17
- Ka mea, Ko ta matou whakawhetai atu tenei ki a koe, e te Ariki e te Atua Kaha rawa, tenei koe inaianei, i mua ano koe, a e haere mai ana ano; no te mea kua riro i a koe tou mana nui, a e kingi ano koe.
- 18
- I riri hoki nga iwi, kua tae mai hoki tou riri, me te wa mo nga tupapaku e whakawakia ai, e hoatu ai hoki e koe he utu ki o pononga ki nga poropiti, ki te hunga tapu ano hoki, ki te hunga ano e wehi ana i tou ingoa, ki te hunga nonohi ki te hunga nunui; e whakangaromia ai hoki te hunga e whakangaro nei i te whenua.
- 19
- A i whakapuaretia ano te whare o te Atua i roto i te rangi, a ka kitea te āka o tana kawenata i roto i tona whare: na, he uira tera, me nga reo, me nga whatitiri, me te ru, me te whatu nui.
Address: 
Phone: 
Email: