- 1
- I kite ano ahau i te rangi hou i te whenua hou: kua pahemo hoki te rangi tuatahi me te whenua tuatahi; a kahore atu he moana.
- 2
- I kitea ano e ahau e Hoani te pa tapu, a Hiruharama hou, e heke iho ana i te Atua i te rangi, rite tonu ana mea, ano he wahine marena hou kua oti te whakapaipai mo tana tāne.
- 3
- A i rongo ano ahau i te reo nui i te rangi e mea ana, Na, kei nga tāngata te tapenakara o te Atua, a e noho ia ki a ratou, ko ratou hoki he iwi mona, ko te Atua nei ano hoki hei hoa mo ratou, hei Atua ano mo ratou.
- 4
- Ka murua hoki e te Atua nga roimata katoa i o ratou kanohi; a kore ake he mate, kahore he aue, kahore he karanga, kahore he mamae, i nga wa i muri nei: kua pahemo atu hoki nga mea o mua.
- 5
- A ka korero mai tera e noho ana i runga i te torona, Na, ka hangā houtia e ahau nga mea katoa. I mea mai ano ia ki a au, Tuhituhia: ko nga kupu tika hoki enei ko nga kupu pono.
- 6
- I mea mai ano ia ki a au, Kua oti. Ko ahau te Arepa me te Omeka, te timatanga me te whakamutunga. Ka hoatu noa atu e ahau ki te tangata e mate wai ana he wai i te puna ora.
- 7
- Te tangata i a ia te wikitoria, e whiwhi ia ki nga mea katoa; ko ahau ano hei Atua mona, a ko ia hei tamaiti maku.
- 8
- Na, te hunga wehi, te hunga whakateka, te hunga whakarihariha, nga kai kohuru, te hunga puremu, te hunga makutu, te hunga makutu, te hunga karakia ki te whakapakoko, te hunga teka katoa, te wahi mo ratou kei te roto e ka ana i te ahi i te whanariki: ko te matenga tuarua tenei.
- 9
- Na, ka haere mai ki a au tetahi o nga anahera e whitu, kei a ratou nei nga oko e whitu e kī ana i nga whiu whakamutunga e whitu; ka ki mai ia ki a au, ka mea, Haere mai, maku e whakakite ki a koe te wahine marena hou, te wahine a te Reme.
- 10
- Na, kawea wairuatia ana ahau e ia ki tetahi maunga, he nui, he tiketike, a ka whakakitea mai ki a au te pa nui, a Hiruharama tapu, e heke iho ana i te rangi i te Atua;
- 11
- Kei taua pa ano te kororia o te Atua: rite tonu tona māramatanga ki to te kohatu he nui whakaharahara nei ona utu, rite tonu ki te kohatu hahapa, e mārama nei me he karahi;
- 12
- He taiepa kohatu ano tona, he mea nui he mea tiketike, tekau ma rua nga tatau, kotahi tekau ma rua ano nga anahera i nga tatau, tuhituhi rawa ki te ingoa, ara, ki o nga hapu kotahi tekau ma rua o nga tamariki a Iharaira:
- 13
- I te rawhiti e toru nga tatau; i te nota e toru nga tatau; i te tonga e toru nga tatau; i te weta e toru nga tatau.
- 14
- Kotahi tekau ma rua hoki nga turanga o te taiepa o te pa, kei aua turanga ano nga ingoa o nga apotoro o te Reme kotahi tekau ma rua.
- 15
- Na, tera i korero ra ki a au, he kakaho koura tana hei whanganga māna i te pa, i ona tatau, i tona taiepa kohatu.
- 16
- E wha nga poti o te pa i a ia i takoto ra, tona roa rite tonu ki tona whanui: na, ka whangangā, e ia te pa ki te kakaho, kotahi tekau ma rua mano nga paronga. Tona roa, te whanui, me te ikeike, rite tonu.
- 17
- Na, ka whangangā ano e ia tona taiepa kohatu, kotahi rau e wha tekau ma wha nga whatianga, he ruri na te tangata, ara na te anahera.
- 18
- Na, te mea i hangā ai tona taiepa kohatu he hahapa: he koura para kore ano hoki te pa, rite tonu ki te karahi mārama.
- 19
- He mea whakapaipai ano ki nga kohatu utu nui katoa nga turanga o te taiepa kohatu o te pa. Te turanga tuatahi, he hahapa; te tuarua, he hapaira; te tuatoru, he karakeroni; te tuawha, he emerara;
- 20
- Te tuarima, he hararonika; te tuaono, he harariu; te tuawhitu, he karihorita; te tuawaru, he perira; te tuaiwa, he topaha; te ngahuru, he karihoparaha; te tekau ma tahi, he hakiniti; te tekau ma rua, he ametihita.
- 21
- Na, nga tatau kotahi tekau ma rua kotahi tekau ma rua peara: tenei tatau tenei tatau kotahi tonu peara: a, te huarahi o te pa he koura para kore, ko ia ano kei te karahi piata.
- 22
- Na, kihai ahau i kite i tetahi whare i reira: ko te Ariki hoki ko te Atua Kaha rawa raua ko te Reme te whare o reira.
- 23
- Na, kahore taua pa i mea ki te ra mona, ki te marama ranei, hei whiti ki roto: e whakamaramatia ana hoki a reira e te kororia o te Atua, ko te Reme hoki tona māramatanga.
- 24
- A e haere i tona māramatanga nga iwi o te hunga e whakaorangia ana: e kawea mai ano hoki e nga kingi o te ao to ratou kororia me to ratou honore ki reira.
- 25
- E kore ano ona tatau e tutakina i te awatea: kore ake hoki o reira po.
- 26
- E kawea mai ano te kororia me te honore o nga tauiwi ki reira.
- 27
- E kore ano e tomo atu ki roto tetahi mea whakanoa, tetahi mea ranei e mahi ana i te mea whakarihariha, i te teka ranei: ko to hunga anake kua oti te tuhituhi ki ta te Reme pukapuka o te ora.
Address: 
Phone: 
Email: