- 1
- Na, tuhituhia atu ki te anahera o te hahi i Harariha; Ko nga kupu enei a te Ariki, kei a ia nei nga Wairua e whitu o te Atua, me nga whetu e whitu; Ka mātau ahau ki āu mahi, na, he ingoa tou e ora ana koe, heoi he tupapaku ano koe.
- 2
- Kia mataara, whakaukia nga mea e toe nei, ka tata nei te mate: kahore hoki ahau i kite i au mahi kia tino rite ki te aroaro o te Atua.
- 3
- Kia mahara ra ki te rironga mai o nga mea i a koe, ki āu i rongo ai hoki, a puritia, ripeneta hoki. Na, ki te kore koe e mataara, ka tae atu ahau ki a koe, ano he tahae, e kore hoki koe e mātau ki te haora e tae atu ai ahau ki a koe.
- 4
- Tera kei a koe etahi ingoa he torutoru na i Harariha, kahore nei i poke o ratou kakahu; na e haereere tahi ratou me ahau, he ma hoki nga kakahu; no te mea e pai ana ratou.
- 5
- Te tangata i a ia te wikitoria, e whakakakahuria ia ki te kakahu ma; e kore ano hoki e murua e ahau tona ingoa i te pukapuka o te ora, e whakaaetia ano e ahau tona ingoa ki te aroaro o toku Matua, ki te aroaro ano hoki o ana anahera.
- 6
- Te tangata he taringa ona, kia rongo ia ki ta te Wairua e mea nei ki nga hahi.
- 7
- Na, tuhituhia atu ki te anahera o te hahi i Pirarerepia; Ko nga kupu enei a te tapu, a te pono, kei a ia nei te ki o Rawiri, ko ia hei whakapuare, a kahore tetahi hei tutaki; māna hoki e tutaki, a kahore tetahi hei whakapuare;
- 8
- E mātau ana ahau ki āu mahi: na, kua hoatu e ahau ki tou aroaro he tatau puare, e kore nei e taea te tutaki e tetahi: he kaha hoki tou, he mea iti nei, a kua puritia ano e koe taku kupu, kahore ano hoki koe i whakakahore ki toku ingoa.
- 9
- Na, maku e mea te hunga o te whakamenenga o Hatana, e mea nei he Hurai ratou, a ehara, he teka hoki na ratou; na, maku ratou e mea kia haere mai kia koropiko ki mua i ou waewae, a e mātau ratou kua arohaina koe e ahau.
- 10
- Na, kua puritia na e koe te kupu o taku manawanuitanga, whaihoki ka puritia koe e ahau i te wa o te whakamatautau ranga, meake nei puta ki te ao katoa, hei whakamatautau i te hunga e noho ana i te whenua.
- 11
- Na, ka hohoro taku haere atu: puritia tau, kei tangohia tou karauna e tetahi.
- 12
- Te tangata i a ia te wikitoria, maku ia e mea hei pou i roto i te whare o toku Atua, e kore ano ia e haere atu ki waho i nga wa i muri: maku hoki e tuhituhi ki runga ki a ia te ingoa o toku Atua, te ingoa hoki o te pa o toku Atua, o Hiruharama hou, ka heke iho nei i te rangi i toku Atua; me toku ingoa hou ano hoki.
- 13
- Te tangata he taringa ona, kia rongo ia ki ta te Wairua e mea nei ki nga hahi.
- 14
- Tuhituhia atu ki te anahera o te hahi o nga Raoriki; Ko nga kupu enei a te Amine, a te kai whakaatu, he pono nei ia he tika, te timatanga o ta te Atua hanganga;
- 15
- Ka mātau ahau ki āu mahi, ehara koe i te matao, ehara koe i te werawera: e pai ahau me i matao koe, me i werawera ranei.
- 16
- Na, he mea mahanahana kau koe, ehara i te matao ehara i te werawera, ka ruakina atu koe e ahau i roto i taku mangai.
- 17
- Na, e ki na koe, Kua whai taonga ahau, kua tini aku rawa, kahore hoki tetahi mea e matea ana e ahau; a kahore e mātau he waikorohuhu noa iho koe, he hē noa iho, he rawakore, he matapo, he mea kakahu kore:
- 18
- Ko taku kupu tenei ki a koe, kia hokona ki a au he koura mou kua oti te tahu ki te ahi, kia whai rawa ai koe; he kakahu ma hoki, hei kakahu ki a koe, kia kaua ai hoki e kitea te whakama o tou tūnga kautanga; pania hoki ou kanohi ki te rongoa, kia kite ai koe.
- 19
- Aku e aroha nei, ka riria e ahau, ka whiua: na, kia ngakau nui koe, ripeneta hoki.
- 20
- Tenei ahau te tu nei ki te tatau, te patuki nei: ki te whakarongo tetahi ki toku reo, a ka uaki i te tatau, e tomo atu ahau ki a ia, a hei hoa ahau mona ki te kai, hei hoa ano ia moku ki te kai.
- 21
- Te tangata i a ia te wikitoria, ka hoatu e ahau ki a ia kia noho ki toku taha ki runga ki toku torona, me ahau hoki, i a au nei te wikitoria, a kua noho ki te taha o toku Matua i runga i tona torona.
- 22
- Te tangata he taringa ona, kia rongo ia ki ta te Wairua e mea nei ki nga hahi.
Address: 
Phone: 
Email: