- 1
- A ka whakatangi ano te rima o nga anahera, a ka kite ahau i tetahi whetu kua taka iho i te rangi ki te whenua: a ka hoatu ki a ia te ki o te poka torere.
- 2
- A uakina ana e ia te poka torere; a ka kake he paoa i roto i te poka, ano he paoa no te kapura nui; a pouri iho te ra me te rangi i te paoa o te poka.
- 3
- A ka puta atu i te paoa he mawhitiwhiti ki runga ki te whenua: i hoatu ano hoki ki a ratou he kaha, i rite ki nga kopiona o te whenua e whai kaha nei.
- 4
- I korerotia ano hoki ki a ratou kia kaua e kino i a ratou te tarutaru o te whenua, tetahi mea matomato ranei, tetahi rakau ranei; ko nga tāngata anake kahore nei te hiri a te Atua i o ratou rae.
- 5
- I tukua ano hoki ki a ratou kia kaua e whakamate i era, engari me whakamamae kia rima ra ano nga marama: na, to ratou whakamamae, ano ko te whakamamaetanga a te kopiona, ina wero i te tangata.
- 6
- A e rapu ano nga tāngata i te mate i aua ra, e kore ano e kitea; e hiahia ano ratou kia mate, heoi ka oma te mate i a ratou.
- 7
- Na, nga ahua o nga mawhitiwhiti rite tonu ki nga hoiho kua oti te whakanoho mo te tatauranga; a i runga i o ratou mātenga he mea e rite ana ki nga karauna koura, o ratou kanohi hoki, ano he kanohi tangata.
- 8
- He makawe ano to ratou, ano he makawe wāhine, o ratou niho ano hoki, me te mea no te raiona.
- 9
- He pukupuku ano o ratou, ano he pukupuku rino; te haruru o o ratou pakau, ano ko te haruru o nga hariata o nga hoiho maha e oma ana ki te tatauranga.
- 10
- He hiku ano o ratou koia ano kei to te kopiona, he wero ano hoki i roto i o ratou hiku: na, he kaha to ratou hei tukino i nga tāngata, e rima nga marama.
- 11
- He kingi ano to ratou, ko te anahera o te poka torere, tona ingoa i te reo Hiperu ko Aparona, tona ingoa i te reo Kariki ko Aporiona.
- 12
- Kua pahemo te tuatahi o nga aue; na, e rua ake enei aue e haere mai nei i muri i enei mea.
- 13
- Na, ka whakatangi te ono o nga anahera, a ka rongo ahau ki tetahi reo, he mea no nga haona e wha o te āta koura, i te aroaro o te Atua,
- 14
- E mea ana ki te ono o nga anahera, kei a ia nei te tētere, Wetekina nga anahera tokowha kua oti te herehere ki te awa nui ki Uparati.
- 15
- Na, ka wetekina nga anahera tokowha, kua rite noa ake nei, kia taka ra ano te haora, te ra, te marama, te tau, hei whakamate i te wahi tuatoru o nga tāngata.
- 16
- A te tokomaha o te taua o nga hoia hoiho e rua rau nga miriona: i rongo hoki ahau ki to ratou tokomahatanga.
- 17
- Ko taku tenei i kite ai i a au e titiro matakite ana, ko nga hoiho me nga kai noho i runga, he pukupuku nei o ratou, he mea ahi, he hakiniti, he whanariki: na, nga upoko o nga hoiho, ano he upoko raiona; a e puta mai ana i roto i o ratou mangai he kapura he paoa he whanariki.
- 18
- Mate ake te wahi tuatoru o nga tāngata i enei e toru, i te kapura, i te paoa, i te whanariki, i puta mai i roto i o ratou mangai.
- 19
- Ko to ratou kaha hoki kei o ratou mangai, kei o ratou hiku: o ratou hiku koia ano kei to te nakahi, he upoko ano o ratou, ko a ratou mea tukino enei.
- 20
- Na, era atu tāngata kihai nei i whakamatea e enei mate, kihai ratou i ripeneta ki nga mahi a o ratou ringaringa, kihai i mutu ta ratou koropiko ki nga rewera, ki nga whakapakoko koura, hiriwa, parahi, kohatu, rakau, ki nga mea kahore nei e titiro, kahore e rongo, kahore e haereere:
- 21
- Kihai ano hoki i ripeneta ki a ratou kohuru, ki a ratou mahi makutu, ki a ratou puremutanga, ki a ratou tahae.
Address: 
Phone: 
Email: