- 1
- Na, ko taku kupu tenei, Kua peia oti e te Atua tana iwi? Kahore rapea. No Iharaira hoki ahau, no te uri o Aperahama, no to Peniamine iwi.
- 2
- Kahore ano te Atua i pei i tana iwi i mohio ai ia i mua. Kahore oti koutou i mātau ki ta te Karaipiture korero i ta Iraia? i inoi ra hoki ia ki te Atua, i whakahe i a Iharaira, i mea,
- 3
- E te Ariki, kua patua e ratou o poropiti, kua whakahoroa o āta; ko ahau anake hoki kua mahue nei, a e whai ana ratou kia patua ahau.
- 4
- Heoi e pehea mai ana ki a ia te ki tapu? E whitu mano tāngata kua waiho nei e ahau maku, kahore nei i piko te turi ki a Paara.
- 5
- Whaihoki i tenei wa nei ano he toenga tenei he whiriwhiringa na te aroha noa.
- 6
- A ki te mea na te aroha noa, ehara i te mea na nga mahi: penei ehara te aroha noa i te aroha noa. Ki te mea hoki na nga mahi, ehara i te mea na te aroha noa: penei ehara te mahi i te mahi.
- 7
- Ha e pehea ana? Ko ta Iharaira e rapu nei, kihai tenei i taea e ratou; otira kua taea e te whiriwhiringa, ko era atu ia i whakapakeketia:
- 8
- (Ko te mea hoki ia i tuhituhia, Kua hoatu ki a ratou e te Atua he wairua hiamoe, he kanohi e kore ai ratou e kite, he taringa e kore ai ratou e rongo;) a taea noatia tenei ra.
- 9
- E mea ana hoki a Rawiri, Kia whakatupu mahanga to ratou tepara, hei rore hoki, hei tūtukinga waewae, hei utu ano hoki ki a ratou:
- 10
- Kia whakapouritia o ratou kanohi, kei kite ratou, kia piko tonu ano o ratou tuara.
- 11
- Na, ko taku kupu tenei, He tūtuki ta ratou e hinga ai? Kahore rapea: engari na to ratou hinganga te oranga o nga tauiwi, he mea kia hae ai enei.
- 12
- Na, hei taonga nei mo te ao to ratou hinganga, a hei taonga mo nga tauiwi to ratou whakaitinga: tera noa ake ano to ratou whakanuinga.
- 13
- Ki a koutou, ki nga tauiwi tenei kupu aku, ko te apotoro nei hoki ahau ki nga tauiwi, e whakanui ana ahau i taku mahi minita:
- 14
- Me kore e hae nga tāngata o toku kikokiko i taku, kia ora ai etahi o ratou i a au.
- 15
- Ko to ratou makanga atu nei hoki hei houhanga rongo ma te ao, a ka aha to ratou tangohanga mai? he teka ianei he oranga ake i te mate?
- 16
- Ki te mea hoki e tapu ana te mea matamua, ka pera ano te puranga: a ki te tapu te pakiaka, e pera ano nga manga.
- 17
- Ki te whatiia hoki etahi o nga manga, a ka honoa, atu koe te oriwa ngahere ki roto ki aua manga, ka whiwhi ngatahi ki te pakiaka, ki te momonatanga ano hoki o te oriwa;
- 18
- Aua e whakapehapeha ki nga manga. A ki te whakapehapeha koe, ehara i te mea nau i mau ake ai te pakiaka, engari na te pakiaka koe.
- 19
- Na, tera koe e mea mai, I whatiia atu nga manga, kia honoa iho ai ahau.
- 20
- E pai ana; na te whakapono kore ratou i whatiia atu ai, a na te whakapono koe i tu ai. Aua koe e whakakake, engari kia wehi:
- 21
- Na kihai nei i tohungia nga manga tupu e te Atua, kia tupato kei kore pea koe e tohungia.
- 22
- Na, tirohia iho te ngawari, me te pakeke, o te Atua: pakeke ki te hunga i hinga; ngawari ki a koe, ki te u koe ki tana tikanga ngawari: ki te kahore, ka tapahia ana hoki koe.
- 23
- Me ratou ano hoki, ki te kore ratou e u ki te whakapono kore, ka honoa ano ratou: e taea hoki ratou e te Atua te hono mai ano.
- 24
- He oriwa ngahere nei hoki koe i te rakau tupu, a ka tapahia mai, honoa ketia mai ki te oriwa pai; ina, tera noa ake he hononga mo enei, mo nga manga tupu, ki to ratou oriwa ake.
- 25
- E kore hoki ahau e pai, e aku teina, kia kuare koutou ki tenei mea ngaro, kei mea koutou he mātau koutou; kua tau te pakeke ki a Iharaira, mo tetahi wahi, kia riro mai ra ano te whakanuinga o nga tauiwi.
- 26
- Ko reira a Iharaira katoa ora ai: ko te mea hoki ia i tuhituhia, Tera e puta mai te Kai whakaora i Hiona, a māna e kaupare atu te karakia-kore i a Hakopa:
- 27
- Ko taku kawenata hoki tenei ki a ratou, ina ka tangohia e ahau o ratou hara.
- 28
- Na, i runga i te rongo pai, e hoa riritia ana ratou, he whakaaro ki a koutou; a i runga i te whiriwhiringa, e arohaina ana ratou, he whakaaro ki nga mātua.
- 29
- I a te Atua homaitanga hoki i tana karangatanga, kahore e puta ke te whakaaro.
- 30
- Ka rite hoki ki a koutou kihai i whakapono i mua ki te Atua, na, inaianei kua tohungia, he mea na to ratou whakapono kore:
- 31
- Whaihoki ko enei kahore i whakapono inaianei, a ka tohungia nei koutou ka tohungia hoki ratou.
- 32
- Kua oti hoki te katoa te kopani e te Atua ki roto ki te whakateka, he mea kia tohungia katoatia ai.
- 33
- Ano te hohonutanga te hua o a te Atua whakaaro, o tona mohio! e kore ana tikanga e taea te whakaaro iho, ana huarahi e kore e taea te rapu!
- 34
- Ko wai hoki te mohio ana ki te hinengaro o te Ariki? ko wai hoki tona hoa whakatakoto whakaaro?
- 35
- Ko ta wai hoki kua hoatu ki a ia i mua, a ka whakahokia he utu ki a ia?
- 36
- Nga mea katoa nei hoki nāna, kei runga ano i a ia, e ahu ana hoki ki a ia: mona te kororia ake tonu atu. Amine.
Address: 
Phone: 
Email: