- 1
- Na, i nga ra i whakariterite ai nga kai whakarite whakawa, kua pa te mate-kai ki te whenua. A ka haere tetahi tangata o Pete-rehema-hura ki te whenua o Moapa noho ai; a ia, tana wahine, me ana tama tokorua.
- 2
- Na, te ingoa o taua tangata, ko Erimereke, ko Naomi hoki te ingoa o tana wahine; nga ingoa hoki o ana tama tokorua, ko Maharono, ko Kiriono, He Eparati ratou, no Pete-rehema-hura. Na, haere mai ana ki te whenua o Moapa, noho ana i reira.
- 3
- Na, ka mate a Erimereke te tahu o Naomi, a mahue iho ko ia, ratou ko ana tama tokorua.
- 4
- Na, ka tango wahine raua ma raua i roto i nga wahine o Moapa; ko Oropa te ingoa o tetahi, ko Rutu te ingoa o tetahi, a noho ana i reira, kotahi tekau nga tau.
- 5
- Na, ka mate raua tokorua, a Maharono raua ko Kiriono, a ko te wahine anake te oranga o ana tama tokorua, o tona tahu.
- 6
- Katahi ia ka whakatika, ratou ko ana hunaonga, a hoki atu ana i te whenua o Moapa; i rongo hoki i te whenua o Moapa kua titiro mai a Ihowa ki tona iwi, kua hoatu e ia he taro ma ratou.
- 7
- Heoi haere atu ana ia i te wahi i noho ai, ratou tahi ko ana hunaonga tokorua, a haere ana i te ara, hoki ana ki te whenua o Hura.
- 8
- Na, ko te meatanga mai a Naomi ki ana hunaonga tokorua, Haere korua, e hoki ki nga whare o o korua whaea: ma Ihowa korua e atawhai; kia rite tana ki ta korua mahi ki nga tupapaku, ki a au.
- 9
- Ma Ihowa e homai ki a korua kia kite korua i te okiokinga i roto i te whare o tona tahu o tona tahu. Na, ka kihi ia i a raua, a rahi noa atu o ratou reo ki te tangi.
- 10
- Na, ko ta raua meatanga atu ki a ia, Engari me hoki tahi tatou ki tou iwi.
- 11
- Ano ra ko Naomi, Hoki atu, e aku tamahine: kia haere tahi korua i a au hei aha? he tama ano ianei enei kei roto i toku kopu hei tane ma korua?
- 12
- Hoki atu, e aku tamahine, haere, kua ruruhitia nei hoki ahau, a e kore e whai tahu. Me i ki atu ahau, E mea ana ano ahau, tera ano ahau e whai tane i tenei po, a ka whanau ano hoki etahi tamariki maku;
- 13
- Tera ranei korua e tatari ki a raua kia kaumatua ra ano? tera ranei e mau tonu korua ki a raua, a e whakakahore ki te tane? Kahore e aku tamahine, nui noa atu hoki toku pouri ina whakaaro ki a korua; no te ringa hoki a Ihowa kua puta mai nei ki a au.
- 14
- Na, ka puaki ano to ratou reo a ka tangi. Na, ka kihi a Oropa i tona hungawai; ko Rutu ia i piri ki a ia.
- 15
- Katahi tera ka mea mai, Nana, kua hoki tou taokete ki tona iwi, ki ona atua: hoki atu, whaia tou taokete.
- 16
- Na, ko te meatanga atu a Rutu, Kaua ra e tohe ki a au kia whakarerea koe, kia hoki atu i te whai i a koe; ta te mea ka haere ahau ki tau wahi e haere ai, ka noho hoki ki tau wahi e noho ai; ko tou iwi hei iwi moku, ko tou Atua, hei Atua moku.
- 17
- Ka mate ahau ki te wahi e mate ai koe, ka tanumia hoki ki reira: kia meatia tenei e Ihowa ki a au, etahi atu mea ano hoki, ki te wehea taua e tetahi mea ke ehara nei i te mate.
- 18
- A, tona kitenga e u ana tona ngakau kia haere tahi raua, na, mutu ake tana korero ki a ia.
- 19
- Na, haere ana raua tokorua, a tae noa ki Pete-rehema. A ka tae raua ki Pete-rehema, na, ka oho katoa te pa ki a raua, ka mea, Ko Naomi tenei?
- 20
- Na, ko tana meatanga atu ki a ratou, Kaua ahau e karangatia, ko Naomi; ko Mara ta koutou e karanga ai ki a au: he kawa rawa hoki ta te Kaha-rawa mahi ki a au.
- 21
- Ki tonu ahau i toku haerenga atu; na, kua whakahokia kautia mai e Ihowa. Na te aha ahau i karangatia ai ko Naomi e koutou, kua whakaaturia nei hoki toku he e Ihowa, kua tukinotia ahau e te Kaha-rawa?
- 22
- Heoi hoki mai ana a Naomi raua tahi ko tana hunaonga ko Rutu Moapi: hoki mai ana i te whenua o Moapa; a haere mai ana ki Pete-rehema i te timatanga o te kotinga parei.
Address: 
Phone: 
Email: