- 1
- Nana, he ataahua koe, e taku hoa, nana, he ataahua koe, no nga kukupa ou kanohi i roto i ou makawe: tou mahunga, koia ano kei te kahui koati e kai ana i runga i Maunga Kireara.
- 2
- Ou niho, ano he kahui kua oti te kutikuti, i haere mai i te horoi; rite katoa ratou i te māhanga, kahore hoki he mea pakoro i roto i a ratou.
- 3
- Ou ngutu, ano he aho ngangana, ahuareka tonu to korero: rite tonu ki tetahi wahi o te pamekaranete ou rahirahinga i roto i ou makawe.
- 4
- Rite tonu tou kaki ki te pourewa o Rawiri, he mea i hangā hei iringa mo nga patu, kei reira nei nga whakangungu rakau kotahi mano e iri ana, he whakapuru tao te katoa na te hunga marohirohi.
- 5
- Ou u e rua rite tonu ki nga kuao aneterope e rua, he māhanga, e kai ana i roto i nga rengarenga.
- 6
- I te mea kiano i whai hau noa, a kiano i rere noa nga atarangi, ka haere ahau ki te maunga maira, ki te pukepuke parakihe.
- 7
- Ataahua katoa koe, e taku hoa; kahore hoki ou koha.
- 8
- Taua ka haere atu i Repanona, e taku hoa, taua i Repanona: matakitaki atu ai i te tihi o Amana, i te tihi o Heniri raua ko Heremona, i te nohoanga o nga raiona, i nga maunga o nga reparo.
- 9
- Riro pu toku ngakau i a koe, e taku tuahine, e taku hoa: riro pu toku ngakau i tetahi o ou kanohi i tetahi o nga mekameka whakapaipai o tou kaki.
- 10
- Ano te ataahua o tou aroha, e taku tuahine, e taku hoa! Ano te pai o tou aroha! nui atu i te waina: te kakara ano o ou hinu nui atu i nga kinaki kakara katoa.
- 11
- He honi kei ou ngutu, e taku hoa, e maturuturu ana; he honi, he waiu kei raro i tou arero: te kakara ano o ou kakahu, koia ano kei te kakara o Repanona!
- 12
- He kāri kua oti te tutaki taku tuahine, taku hoa, he manawa whenua kua oti te tutaki, he puna kua oti te hīri.
- 13
- He kāri pamekaranete nga mea e wana pa i a koe, he pai rawa ano hoki nga hua, he kamapia, he nara,
- 14
- He nara, he hapirone, he karamu, he hinamona, me nga rakau parakihe katoa; he maira, he aroe, me nga mea nui katoa o nga kinaki kakara.
- 15
- He puna no nga kāri, he poka wai ora, he awa ano hoki no Repanona.
- 16
- E ara, e te hau nota; haere mai hoki, e te tonga: pupuhi mai ki taku kari, kia rere atu ai nga kinaki kakara. Kia haere mai taku i aroha ai ki tana kari, ki te kai i ana hua pai.
Address: 
Phone: 
Email: