- 1
- I te waru o nga marama, i te rua o nga tau o Tariuha, ka puta mai te kupu a Ihowa ki a Hakaraia, tama a Perekia, tama a Iro poropiti; i mea ia,
- 2
- He nui whakaharahara ta Ihowa riri ki o koutou mātua.
- 3
- Na, mea atu ki a ratou, Ko te kupu tenei a Ihowa o nga mano, Tahuri mai ki a au, e ai ta Ihowa o nga mano, a ka tahuri atu ahau ki a koutou, e ai ta Ihowa o nga mano.
- 4
- Kei rite koutou ki o koutou mātua; i karanga ra hoki nga poropiti o mua ki a ratou, i mea, Ko te kupu tenei a Ihowa o nga mano, Tena ra, tahuri mai i a koutou ara kino, i a koutou mahi kino; heoi kihai ratou i rongo, kihai ano hoki i whai taringa mai ki a au, e ai ta Ihowa.
- 5
- O koutou mātua, kei hea ratou? nga poropiti, e ora tonu ana ranei ratou?
- 6
- Na, aku kupu me aku tikanga i whakahaua e ahau ki aku pononga, ki nga poropiti, kihai ianei o koutou mātua i mau i era? a hoki mai ana, mea mai ana, Ta Ihowa o nga mano i whakaaro ai kia meatia ki a matou, he mea whakarite ki ā matou ara, ki ā matou mahi; pera tonu tana ki a matou.
- 7
- I te rua tekau ma wha o nga ra o te tekau ma tahi o nga marama, ara, o te marama Hepata, i te rua o nga tau o Tariuha, ka puta mai te kupu a Ihowa ki a Hakaraia tama a Perekia, tama a Iro poropiti; i mea ia,
- 8
- I titiro atu ahau i te po, na ko tetahi tangata e noho ana i runga i te hoiho whero, a tu ana ia i roto i nga ramarama i te wharua, i muri ano i a ia ko etahi hoiho, he whero, he kotingotingo, he ma.
- 9
- Katahi ahau ka mea atu, He aha enei, e toku ariki? a ka mea mai ki a au te anahera i korero mai ra ki a au, Me whakakite atu e ahau ki a koe te tikanga o enei mea.
- 10
- Na, ka oho mai te tangata i tu i roto i nga ramarama, a ka mea, Enei he mea unga atu e Ihowa kia haereere i te whenua.
- 11
- Na, ka oho mai ratou ki te anahera o Ihowa e tu ana i roto i nga ramarama, a ka mea, I te haereere matou i te whenua, nana, kei te ata noho te whenua katoa, marie tonu.
- 12
- Katahi ka oho mai te anahera a Ihowa, a ka mea, E Ihowa o nga mano, Kia pehea te roa ou ka kore nei e tohu i a Hiruharama, i nga pa ano hoki o Hura, e mauaharatia nei e koe i enei tau e whitu tekau?
- 13
- Na, ka oho mai a Ihowa ki te anahera i korero mai ki a au, he kupu pai, he kupu whakamarie.
- 14
- A ka mea ki a au te anahera i korero mai ki a au, Karanga, mea atu, Ko te kupu tenei a Ihowa o nga mano, He nui te hae i hae ai ahau ki Hiruharama, ki Hiona.
- 15
- He nui ano hoki te whakatakariri i whakatakariri ai ahau ki nga iwi e noho humarie ana: he iti nei hoki taku riri, a whakakahangia ana e ratou te he.
- 16
- Mo reira ko te kupu tenei a Ihowa; Kua hoki atu ahau ki Hiruharama i runga i te tohu tangata; ka hangā toku whare ki reira, e ai ta Ihowa o nga mano, ka whakamarokia ano hoki te taura ki runga ki a Hiruharama.
- 17
- Karanga ano hoki, mea atu, Ko te kupu tenei a Ihowa o nga mano, Tera oku pa e rauroha noa atu i te pai; tera ano hoki a Ihowa ka whakamarie i a Hiona, tera ano ia ka whiriwhiri i a Hiruharama.
- 18
- Na, ka anga ake oku kanohi, a ka kite ahau, nana, e wha nga haona.
- 19
- Na, ko taku meatanga atu ki te anahera i korero mai ki a au, He aha enei? Ano ra ko ia ki a au, ko nga haona enei nana i whakamarara a Hura, a Iharaira, a Hiruharama.
- 20
- Na ka whakakitea mai e Ihowa etahi kamura ki a au, tokowha.
- 21
- Katahi ahau ka mea atu, I haere mai enei ki te mea i te aha? A ka korero tera, ka mea, Ko nga haona enei i whakamarara nei i a Hura, a kahore noa iho e ara te māhunga o tetahi tangata: kua tae mai ia enei ki te whakawehi atu i a ratou, ki te pei atu i nga haona o nga Tauiwi, o te hunga i ara te haona ki te whenua o Hura, titaritari ai i a ia.
Address: 
Phone: 
Email: