- 1
- I puta mai ano te kupu a Ihowa o nga mano, i mea,
- 2
- Ko te kupu tenei a Ihowa o nga mano, Nui atu te hae i hae ai ahau ki a Hiona, he nui hoki te riri i hae ai ahau ki a ia.
- 3
- Ko te kupu tenei a Ihowa; Kua hoki atu nei ahau ki Hiona, kua noho ano i roto i a Hiruharama, a ka karangatia a Hiruharama, Ko te pa pono, ko te maunga o Ihowa o nga mano, ko te maunga tapu.
- 4
- Ko te kupu tenei a Ihowa o nga mano, Tenei ake ka noho nga koroheke me nga ruruhi ki nga waharoa o Hiruharama, rite rawa te ringa o tenei, o tenei, i te tokotoko, he maha hoki no nga tau.
- 5
- Nga waharoa ano hoki o te pa kapi tonu i nga tamariki, i nga kotiro, e takaro ana i ona waharoa.
- 6
- Ko te kupu tenei a Ihowa o nga mano; Ki te mea i pakeke ki te titiro iho a nga morehu o tenei uri i enei ra, e pakeke ano ranei ki taku titiro iho, e ai ta Ihowa o nga mano?
- 7
- Ko te kupu tenei a Ihowa o nga mano, Tenei au te whakaora mai nei i toku iwi i te whenua ki te rawhiti, i te whenua ano hoki ki te hauauru.
- 8
- Ka kawea mai ano ratou e ahau, ka noho ratou ki waenganui o Hiruharama, a hei iwi ratou moku, ko au ano hoki hei Atua mo ratou i runga i te pono, i runga i te tika.
- 9
- Ko te kupu tenei a Ihowa o nga mano, Kia kaha o koutou ringaringa, e te hunga e rongo ana i enei ra ki enei kupu i roto i nga mangai o nga poropiti i korero i te ra i whakatakotoria ai te turanga mo te whare o Ihowa o nga mano, he mea kia hangā ai te temepara.
- 10
- I mua hoki i enei ra kahore he utu mo te mahi a te tangata, kahore he utu mo ta te kararehe; kahore hoki he ata noho mo te tangata i haere atu, mo te tangata ano i haere mai, i te ngakau mamae hoki; naku hoki i mea nga tangata katoa kia whawhai ki tona hoa, ki tona hoa.
- 11
- Na, e kore taku inaianei ki nga morehu o tenei iwi e rite ki to nga rangi o mua, e ai ta Ihowa o nga mano.
- 12
- No te mea ka tupu te purapura, ka tukua mai ona hua e te waina, ka tukua mai ano ona mau e te whenua, ka homai ano to ratou tomairangi e nga rangi; maku ano e mea nga morehu o tenei iwi kia whiwhi ki enei mea katoa.
- 13
- Na, i mua hei kanga koutou i roto i nga iwi, e te whare o Hura raua ko te whare o Iharaira, ka pena ano taku whakaoranga i a koutou, a hei manaakitanga koutou: kaua e wehi, kia kaha o koutou ringaringa.
- 14
- Ko te kupu hoki tenei a Ihowa o nga mano, Ka rite ki taku meatanga kia whiua koutou i te whakapataritaringa a o koutou mātua ki a au, e ai ta Ihowa o nga mano, a kihai ano ahau i ripeneta:
- 15
- Ka pera ano te hokinga ake o taku whakaaro i enei rangi ki te pai kia meatia ki Hiruharama, ki te whare ano hoki o Hura: kaua e wehi.
- 16
- Ko nga mea enei hei meatanga ma koutou; Korerotia te pono ki tona hoa, ki tona hoa, Kia pono te whakarite o te whakawa: i o koutou kuwaha, hei te whakarite whakawa ano e mau ai te rongo:
- 17
- Kaua ano hoki e whakaaroa he kino i roto i o koutou ngakau ki tona hoa, ki tona hoa; kaua ano e arohaina te oati teka; no te mea e kinongia ana enei mea katoa e ahau, e ai ta Ihowa.
- 18
- I puta mai ano te kupu a Ihowa o nga mano ki a au: i mea ia,
- 19
- Ko te kupu tenei a Ihowa o nga mano, Te nohopuku o te wha o nga marama, te nohopuku o te rima, te nohopuku o te whitu, te nohopuku o te ngahuru, ka ai ena hei oranga ngakau ki te whare o Hura, hei mea whakahari, hei wa pai: na, arohaina te pono raua ko te ata noho.
- 20
- Ko te kupu tenei a Ihowa o nga mano, Tenei ake ka tae mai nga iwi, nga tangata ano hoki o nga pa maha:
- 21
- A, ka haere nga tangata o tetahi pa ki tetahi atu, ka mea, Hapainga, kia haere rawa atu tatou ki te inoi ki te aroaro o Ihowa ki te rapu i a Ihowa o nga mano: ka haere ano hoki ahau.
- 22
- He tini ano hoki nga iwi, he kaha nga tauiwi e haere mai ki te rapu i a Ihowa o nga mano i Hiruharama, ki te inoi ano hoki ki te aroaro o Ihowa.
- 23
- Ko te kupu tenei a Ihowa o nga mano, I aua rangi ka hopu atu nga tangata kotahi tekau, he hunga no nga reo katoa o nga iwi, ka hopu atu ano ratou i te remu o to tetahi Hurai, ka mea, Kia haere tahi tatou; kua rongo hoki matou kei a koutou te Atua.
Address: 
Phone: 
Email: