- 1
- Te kupu a Ihowa i puta mai ki a Tepania tama a Kuhi, tama a Keraria, tama a Amaria, tama a Hitikia, i nga ra o Hohia tama a Amono, kingi o Hura.
- 2
- Tera ka whakapotoa rawatia atu e ahau nga mea katoa i runga i te mata o te oneone, e ai ta Ihowa.
- 3
- Ka poto atu i a au te tangata, te kararehe, ka poto atu i a au te manu o te rangi, me te ika ano o te moana, nga tūtukitanga waewae ano hoki ngatahi ano ko te hunga kino; ka hatepea atu ano e ahau te tangata i runga i te mata o te oneone, e ai ta Ihowa.
- 4
- Ka whakamarokia atu ano toku ringaringa ki runga ki a Hura, ki runga ano i nga tangata katoa o Hiruharama, ka hatepea atu e ahau i tenei wahi nga toenga o Paara, te ingoa o nga Kemarimi, ratou ko nga tohunga;
- 5
- Me te hunga ano e koropiko ana i runga i nga tuanui ki te ope o te rangi, ratou ko te hunga e koropiko ana, e oati ana i a Ihowa, me te oati ano ratou i a Marakama;
- 6
- Me te hunga ano i tahuri atu nei i te whai i a Ihowa, a kihai i ui ki a Ihowa, kihai ano i rapu i a ia.
- 7
- Whakarongoa i te aroaro o te Ariki o Ihowa, ka tata hoki te ra o Ihowa: kua takoto hoki ta Ihowa patunga tapu, kua rite he manuhiri mana.
- 8
- Na, i te ra o ta Ihowa patunga tapu, ka whiua e ahau nga rangatira, ratou ko nga tamariki a te kingi, ko te hunga katoa ano he kakahu ke o ratou.
- 9
- I taua rangi ano ka whiua e ahau te hunga katoa e tupekepeke ana i runga i te paepae, a e whakaki ana i nga whare o o ratou ariki ki te tinihanga.
- 10
- I taua rangi ano, e ai ta Ihowa, ka karanga te reo i te kuwaha ika, te aue ano i te tuarua, he nui ano hoki te pakaru i nga pukepuke.
- 11
- E aue, e nga tangata o Makateha, kua moti hoki nga kai hokohoko katoa, kua hatepea atu nga kai mau hiriwa katoa.
- 12
- I taua rangi ano ka rapua e ahau ta Hiruharama, mea rawa ki nga rama, ka whiua ano hoki e ahau nga tangata kua totoka i runga i o ratou nganga, a e mea ana i roto i o ratou ngakau, E kore a Ihowa e mahi i te pai, e kore ano e mahi i te kino.
- 13
- Mo reira ka waiho o ratou rawa hei taonga pārau, o ratou whare ano hoki hei ururua: ka hanga whare ano hoki ratou, a kore ake e nohoia e ratou, ka whakatokia e ratou nga māra waina, otiia e kore e inumia e ratou te waina o aua māra.
- 14
- Ka tata te ra nui o Ihowa, ka tata, nui atu te hohoro, te reo o te ra o Ihowa: tera e nui noa atu te tangi o te marohirohi i reira.
- 15
- He ra riri taua ra, he ra mamae, he pawera, he ra whakangaro, whakamoti, he ra pouri, he mangu, he ra kapua, he pouri kerekere.
- 16
- Ko te ra ia o te tētere, o te whakaoho ki nga pa taiepa, ki nga taumaihi tiketike.
- 17
- Ka mamae ano i a au nga ngakau o nga tangata, ka rite ano hoki ratou ki nga matapo ina haere, mo ratou i hara ki a Ihowa: ka ringitia ano hoki o ratou toto ano he puehu, o ratou kikokiko ano hoki ano he paru.
- 18
- E kore ano to ratou hiriwa, to ratou koura, e tau hei whakaora i a ratou i te ra o ta Ihowa riri; engari ka pau te whenua katoa i te ahi, ara i tona hae; he whakapotonga hoki, he mea hohoro tonu ano, tana i nga tangata katoa o te whenua.
Address: 
Phone: 
Email: